A marca pescadeRías de onde se non? vén de lanzar a primeira dunha serie de pílulas formativas dirixidas ao persoal das entidades usuarias, co obxectivo de reforzar os coñecementos en ámbitos clave como a seguridade alimentaria, a trazabilidade, a manipulación e hixiene, os envases, a xestión de residuos e a lexislación vixente.

Esta nova liña de materiais divulgativos preséntase en formato visual e accesible, facilitando a súa aplicación práctica no traballo diario ao longo de toda a cadea de valor.

A primeira pílula, en formato infografía, está centrada no anisakis. Inclúe información sobre que é, as patoloxías asociadas, a súa presenza nos peixes, o ciclo de vida e as principais medidas de control, tanto a bordo como en terra e nos puntos de venda, así como métodos de inactivación e recomendacións para as persoas consumidoras.

Podes acceder á infografía aquí.

O pasado mes celebrouse en Madrid o Salón Gourmets, no que participaron 29 empresas do sector mar-industria como coexpositoras no stand da Consellería do Mar, entre elas nove certificadas coa marca pescadeRías de onde se non?

Durante o evento desenvolvéronse showcookings, catas e actividades divulgativas na sala de catas inmersiva da Consellería do Mar, para poñer en valor os produtos da pesca artesanal galega.

Destacamos tamén a celebración do Día da Muller na Cociña Atlántica, coa proposta “Elas levan o timón”, unha homenaxe ás mulleres que sosteñen o mar e levan a nosa, e o levan á nosa mesa: mariscadoras, pescadoras, artesás…

Podes ver aquí un vídeo resumo das actividades.

O pasado 27 de abril, o equipo de xestión da marca pescadeRías de onde se non? impartiu unha xornada formativa sobre manipulación e hixiene alimentaria na Confraría de Pescadores San Roque de Portonovo.

Esta acción permitiu actualizar coñecementos en aspectos clave como a hixiene, a seguridade alimentaria, a trazabilidade e as boas prácticas na manipulación dos produtos do mar. A formación está orientada a reforzar a calidade e as garantías no traballo diario coa pesca artesanal galega.

A iniciativa enmárcase no compromiso da marca coa formación continua do sector, co fin de contribuír á profesionalización e á mellora dos estándares en toda a cadea de valor.

A Consellería do Mar promoverá en maio a presenza dos produtos da pesca artesanal galega en tres feiras internacionais:

Á feira TuttoFood, que terá lugar en Milán do 11 ao 14 de maio, asistirán 13 empresas coexpositoras; entre elas, as empresas certificadas Costas y Miñán S.L. (Conservas Mariscadora) e Conservas La Brújula S.L.

En Sial Shanghai, que se celebrará do 18 ao 20 de maio, participarán 5 empresas coexpositoras, entre as que destacamos Conservas La Brújula S.L., certificada pola marca pescadeRías de onde se non?

Na feira PMLA Ámsterdam, que nesta edición terá lugar os días 19 e 20 de maio, participarán 13 empresas coexpositoras: entre elas, a entidade certificada Conservas Portomar S.L.U.

Os produtos da pesca artesanal galega teñen unha nova cita en Vigo co Galicia Market Place, que se celebrará o vindeiro 12 de maio no Círculo de Empresarios de Galicia, en colaboración coa Consellería do Mar e ABANCA.

O evento ofrece unha oportunidade para empresas da cadea mar-industria, cun espazo propio para visibilizar proxectos, establecer contactos e xerar novas oportunidades de negocio. Está confirmada a presenza no espazo expositivo das marcas certificadas Capitán Alga e Conservas Mariscadora. A xornada combinará exposición de produtos, conferencias, entrevistas e tech talks.

Completarase cun xantar sectorial e actividades gastronómicas como catas, degustacións e showcooking.

Información e inscricións aquí.

Durante o mes de abril, leváronse a cabo as auditorías de recertificación das entidades certificadas Da Lonxa ao Prato S.L. e Mariscos Islas Cíes S.L. e de seguimiento da Lonxa de Cambados.

A Confraría de Cambados está certificada desde o ano 2009 para a primeira venta de bivalvos, cefalópodos, crustáceos, peixe e para algas desde o 2020.

Da Lonxa o Prato, S.L., situada no porto de Ribeira, conta coa certificación para depuración, expedición, cetaria e distribución de bivalvos, peixes, cefalópodos, crustáceos, equinodermos e antozoos desde o ano 2021.

Pola súa banda, Mariscos Islas Cíes S.L., con sede en Domaio, está certificada desde 2021 como depuradora, cetaria e empresa distribuidora de bivalvos, crustáceos, peixes, cefalópodos, gasterópodos, equinodermos e antozoos.

Un ano máis, os produtos da pesca artesanal galega co selo pescadeRías de onde se non? estarán presentes nos menús elaborados polo alumnado de hostalaría do CIFP Carlos Oroza nas xornadas dedicadas aos produtos de calidade diferenciada, que se celebrarán ao longo dos meses de maio e xuño.

O alumnado de cociña traballará con navalla fresca, así como con polbo e volandeira en formato conxelado, todos eles produtos certificados que protagonizarán propostas culinarias centradas na orixe e na calidade.

As sesións centradas na pesca artesanal galega desenvolveranse no restaurante Álvaro Cunqueiro do centro os días 15 de maio e 5 de xuño, e tamén na Sociedade Gastronómica do CD Vasconia, en Donostia, o 22 de maio.

A Confraría de Pescadores Santiago Apóstol de Barallobre inaugurou o pasado mes unha tenda física para reforzar a aposta pola venda directa e a valorización dos produtos do mar de proximidade.

A peixería de Barallobre, situada no edificio da lonxa, está aberta de martes a venres, de 09:30 a 13:30 e os sábados de 09:30 a 12:00. A peixería incorpora ademais un acuario de grandes dimensións que combina función comercial e divulgativa, e dá continuidade a unha traxectoria iniciada en 2008 coa venda directa de marisco.

Esta iniciativa enmárcase nun modelo de cadea curta de comercialización que busca achegar o produto ao consumidor final, reducir intermediarios e mellorar os retornos para o sector. Dámoslles a benvida á marca!

As instalacións da Confraría de Pescadores de Ferrol acollen actualmente un curso de peixería dirixido á formación de novos profesionais para o sector. Esta iniciativa, organizada e promovida polo Concello de Ferrol, conta coa participación de 11 persoas de distintas nacionalidades, e favorece a integración e a capacitación laboral.

O curso ten un enfoque eminentemente práctico e inclúe un período de prácticas en establecementos comerciais, que se desenvolverá nas próximas semanas. Esta acción formativa dá resposta á crecente demanda de persoal cualificado no ámbito da venda de peixe, un perfil clave para garantir o relevo xeracional nas peixeirías tradicionais, tanto nas prazas de abastos como noutros puntos de venda especializados.

Damos a benvida á marca ao Hotel Restaurante Javier Montero, situado en Ribadeo (Lugo), que se incorpora coa súa aposta por unha cociña tradicional creativa.

Á fronte está Javier Montero, quen combina a súa experiencia profesional coas raíces da cociña herdada da súa nai, o que da lugar a unha proposta innovadora e con identidade propia. A súa oferta gastronómica baséase en produtos de tempada e de proximidade, e adáptase á dispoñibilidade do mercado en cada momento.

Os menús degustación evolucionan ao longo do ano, mentres que o equipo de sala ofrece un asesoramento personalizado para a selección de viños, completando así unha experiencia coidada e de calidade.

Grupo Envimar NW S.L., empresa distribuidora situada na lonxa de Ribeira e certificada pola marca pescadeRías de onde se non?, vén de obter a certificación, o que reforza o seu compromiso coa seguridade alimentaria no sector pesqueiro.

Esta norma internacional garante un control rigoroso da inocuidade e da trazabilidade ao longo de toda a cadea, desde a recepción ata a entrega de produto fresco e conxelado. O sistema integra os principios APPCC e aposta pola mellora continua dos procesos.

Con este recoñecemento, Envimar consolídase como unha empresa aliñada cos máis altos estándares internacionais, ofrecendo unha garantía adicional de calidade e confianza para clientes e distribuidores.

Neste novo capítulo de Tripulación PescadeRías, coñeceremos de preto o traballo de Paula Pardo, oceanógrafa e técnica de prevención da Asociación Mar Seguro de Galicia.

Paula explicaranos o seu papel no servizo de prevención mancomunado e os principais riscos aos que se enfrontan as tripulacións da pesca de baixura. Tamén abordará as accións que desenvolve no ámbito da prevención en actividades de pesca e marisqueo, clave para a seguridade do sector.

Ademais, compartirá as incidencias máis habituais do seu día a día, e daranos unha visión próxima e realista da súa experiencia profesional.

Podes ver o vídeo aquí.

A Consellería do Mar vén de publicar a resolución pola que se aproba o Plan experimental para a xestión do polbo (Octopus vulgaris) para a campaña 2026/2027, que reforza un modelo baseado na sustentabilidade e na adaptación ao ciclo biolóxico da especie.

Entre as novidades destaca a limitación da pesca accesoria, medida que supón un avance relevante na protección do recurso. Mantense o peso mínimo de captura en 1 quilo por peza e establécense cotas diferenciadas ao longo da campaña para evitar a saturación do mercado.

Así, entre xullo e agosto o tope será menor, e incrementarase a partir de setembro. Ademais, fíxanse horarios de actividade regulados e mantense a veda previa como elemento clave de xestión.

Accede ao plan aquí.

O pasado 30 de abril rematou a campaña do ourizo na confrarías con plan de xestión ou integradas en plans conxuntos.

Durante a campaña capturáronse 434 Tm desta especie. A Confraría de Carreira e Aguiño, co 10,48% do volume comercializado, liderou a primeira venda. A continuación, entre o 8-9% do volume de primeira venda sitúanse as lonxas de Lira, Baiona e Malpica.

Pola súa banda, o polbo iniciou o seu período de paro biolóxico, que se estenderá ata o 1 de xullo, para favorecer a explotación responsable da especie.

En paralelo, prevese a apertura da campaña da zamburiña na ría de Ferrol durante a primeira quincena de maio, condicionada aos resultados das análises de toxicidade.

A Consellería do Mar aprobou un novo baremo para a obtención do permiso de explotación para o marisqueo a pé, co obxectivo de mellorar a valoración das solicitudes e reducir os empates que obrigaban a resolver mediante sorteo.

O novo sistema introduce cambios na ponderación da formación, a experiencia profesional e o empadroamento, e reforza criterios vinculados á capacitación e ao coñecemento do sector. Ademais, recoñécense novas actividades formativas como mérito.

Esta actualización, que substitúe ao baremo vixente desde 2013, busca facer o proceso máis obxectivo e adaptado á realidade actual do marisqueo en Galicia.

Accede ao novo baremo aquí.

A especie do mes é a navalla (Ensis magnus), un molusco bivalvo moi apreciado na gastronomía galega pola súa textura e sabor delicado. Caracterízase pola súa cuncha alongada e arqueada, que lembra á forma dunha navalla.

Habita enterrada en fondos de area e grava, en zonas intermareais e infralitorais, onde se captura habitualmente a mergullo. Trátase dun organismo rico en proteínas, vitaminas e minerais, cun baixo contido en graxas.

A navalla destaca tamén pola súa versatilidade na cociña, sendo á prancha unha das preparacións máis populares, aínda que admite múltiples elaboracións que realzan o seu carácter mariño.

Amplía aquí a información.

A Confraría de Pescadores do Porto do Son conta coa certificación da marca pescadeRías de onde se non? desde 2021 para a comercialización en primeira venda de cefalópodos, bivalvos, peixes, crustáceos e equinodermos.

Durante o ano 2025, a súa lonxa acadou un volume de comercialización de 1.173.494 quilos, cun valor total de 1.648.813 euros.

A maior parte das vendas corresponderon a peixes, seguidos de crustáceos, cefalópodos e equinodermos. Neste contexto, o peixe azul destaca como principal recurso, cun peso moi significativo de especies como o xurelo, o bocarte e a sardiña, que representan o 90 % do volume total comercializado.

Este ano a confraría comezou a etiquetaxe individual para os peixes de maior tamaño.

O artigo do mes presenta a iniciativa da Rede Galega de Escolas Azuis (RGEA), unha alianza que conecta os ecosistemas acuáticos coas novas xeracións a través da educación. O texto está asinado por Andreu Blanco, en colaboración coas entidades que integran a rede.

Impulsada polo proxecto NEREIDA e coordinada polo Centro de Investigación Mariña da Universidade de Vigo, a RGEA reúne institucións científicas e axentes do sector para achegar o mar, os ríos e a súa cultura ao alumnado.

A rede, aberta a novas colaboracións, promove a participación do sector pesqueiro na formación, fortalecendo o vínculo entre coñecemento, territorio e sustentabilidade.

Para ler o artigo e coñecer como podes colaborar coa RGEA, preme aquí.

O cociñeiro Ángel Parada, colaborador de Espazo Remollo, presentou esta proposta culinaria na aula de catas do Salón Gourmets 2026: navalla con miso de albariño e maionesa de alga codium.

Trátase dunha receita delicada na que as navallas son as protagonistas, acompañadas por unha velouté de albariño e miso, e unha maionesa de codium. Estes ingredientes achegan equilibrio, profundidade e matices, de xeito que realzan o sabor do produto sen enmascaralo. A proposta destaca pola súa coidada execución e polo respecto ao produto, ao combinar técnica culinaria e creatividade cun enfoque contemporáneo.

Un prato que pon en valor o potencial gastronómico deste produto.

Podes ver a receita completa aquí.