Do 3 ao 5 de setembro celebrouse a 24º Edición do Salón de Alimentación do Atlántico, SALIMAT ABANCA,  en Silleda. No espazo degustación do stand da Xunta de Galicia realizáronse tres catas con produtos do mar certificados pola marca pescadeRías, ¿de onde se non?.

As cociñeiras Begoña Vázquez (Restaurante Regueiro da Cova en Verín), Maica Couto e Diego Domínguez (Restaurante A Ostrería en Santiago de Compostela) e Criselda Iglesias (Tapería Lecer en Cangas do Morrazo) prepararon pratos con diferentes especies procedentes da nosa pesca artesanal: berberechos, ameixa rubia, polbo, sargo, navallas e algas.

Por outra banda, 9 importadores de España, Portugal, Francia, México e Reino Unido visitaron as instalacións de Real Conservera Española no marco das actividades de Salimat Abanca. Estes profesionais tiveron a oportunidade de coñecer a calidade do produto desta empresa conserveira certificada pola marca pescadeRías, ¿de onde se non?.

Preme aquí para ver un vídeo do evento.

Os días 27, 28 e 29 de agosto celebrouse en Vilanova de Arousa a II Feira da Conserva. As empresas Conservera Gallega e Conservas Antonio Pérez Lafuente, certificadas pola marca pescadeRías, ¿de onde se non?, estiveron presentes cos seus produtos do mar.

Durante o evento, tivo lugar unha degustación gastronómica en directo a cargo do cociñeiro Miguel Mosteiro de Gastrolab Arousa con produtos de ambas conserveiras como protagonistas.

O 13 de agosto, a OPP20 realizou un acto de presentación para dar a coñecer a súa marca Marisco de A Illa, así como a campaña de promoción “O pracer na túa boca”. A marca pretende mellorar a comercialización dos produtos do mar extraídos polos produtores/as da OPP20 e fomentar o seu consumo cos seguintes atractivos: Tradición sostible, produto de calidade, alimentación saudable e desfrute culinario. Os produtos comercializados por esta entidade están avalados así mesmo polo selo pescadeRias, ¿de onde se non?. Preme aquí para ver o vídeo da campaña.

O sargo común (Diplodus sargus) é un peixe semigraxo que podemos atopar frecuentemente nos mercados procedente da pesca artesanal.

O seu corpo é ovalado, alto e comprimido e a súa boca é pequena. De cor gris prateada, posúe unhas liñas estreitas verticais que baixan desde o lombo, máis marcadas nos exemplares máis novos. No nacemento da súa cola ten unha mancha negra. Está totalmente recuberto de escamas grandes e visibles. Se queres saber máis sobre esta especie. Pica aquí para ver unha ficha.

O 28 de agosto ás 00.00 horas comeza a veda do boi (Cancer pagurus) dende a desembocadura do río Miño ata o río Eo que se prolongará ata as 24 horas do 6 de novembro de 2021, ambos inclusive.

A extracción deste crustáceo regúlase a través de plans de explotación anuais nos que se determinan, entre outras cousas, os períodos de veda. Captúrase principalmente con miños. Tamén pode ser capturado con outras artes de enmalle fixas como trasmallos e raeiras ou con nasas.

Os días 13 e 14 de setembro celebrarase en Santiago de Compostela e Ribeira o I Foro de Fomento de Consumo de Peixe, Alimentación Saudable e Sostible (DIETLÁNTICA). Promovido pola Fundación Dieta Atlántica a través da Universidade de Santiago de Compostela e coa colaboración da Consellería do Mar da Xunta de Galicia, o foro contará con profesionais de recoñecido prestixio que debatirán sobre os beneficios dunha dieta saudable desde os puntos de vista nutricional, medioambiental e social. Preme aquí para máis información.

Entre o 10 e o 19 de setembro terá lugar a 14º Edición do Festival Internacional de Curtametraxes de Bueu – FICBUEU 2021.

O Domingo 19, directores/as e críticos/as do cinema e profesionais do audiovisual, música e radio asistirán á cata Descubrindo as excelencias do noso mar con pescadeRías, ¿de onde se non?, na cal terá lugar unha mostra de cociña en directo capitaneada por Criselda Iglesias (Tapería Lecer) con degustación de produtos do mar certificados .

A Cofradia Pescadores A Pastoriza de Vilanova de Arousa, está a realizar tarefas de rexeneración dos seus bancos marisqueiros. O pasado mes sementaron máis de 250.000 unidades de ameixa babosa nos seus bancos de marisqueo a flote. Previamente arouse a zona e fíxose unha limpeza do substrato.

Esta actividade é a primeira parte dunha sementeira que se completará o próximo ano con 1.000.000 de unidades máis desta mesma especie.

O pasado 4 de setembro tivo lugar a segunda edición da Triple Coroa Illas Atlánticas, na que máis de 120 nadadores percorreron 23 kms entre Ons e Combarro. Un dos obxectivos do evento foi a posta en valor da riqueza natural das Illas Atlánticas así como o patrimonio marítimo e cultural de Galicia. Os produtos pescadeRías estiveron presentes na degustación de produtos galegos que tivo lugar no Mosteiro de Poio en dúas preparacións: empanada de millo con xoubas e Fabas de Lourenzá con polbo.

O pasado 20 de agosto impartiuse un curso de hixiene e manipulación de alimentos a responsables do cabildo, mariscadores a flote e pescadores de anguía da Confraría de Pescadores Virxe do Carme de Arcade.

A formación no ámbito da hixiene e a manipulación do produto é requisito indispensable para superar as auditorías que se levan a cabo para a certificación no selo pescadeRías, ¿de onde se non?.

Conservera Gallega, S.A. é unha empresa centenaria dedicada á fabricación de conservas de peixes e mariscos ubicada en Vilanova de Arousa.

Elaboran as súas conservas de xeito tradicional con produtos de máxima calidade que seleccionan e empacan artesanalmente e que comercializan baixo as marcas Paco Lafuente e Rosa Lafuente.

En Agosto, Insuapesca S.L. adheriu a súa peixería ubicada no Mercado de Abastos de Muros ao selo pescadeRías, ¿de onde se non?.

En Insuapesca ofrecen á súa clientela peixes e mariscos procedentes da pesca artesanal de lonxas da contorna e dan a posibilidade de facer o teu pedido a través de whatssapp.

Ao longo do mes de agosto realizaron auditorías de recertificación a Confraría de Pescadores de Arcade (bivalvos e peixes) e a Confraría de Pescadores de Muros (bivalvos, cefalópodos, peixes, crustáceos e equinodermos). Así mesmo, a depuradora José Mª Daporta e Hijos, que tiña como alcance moluscos bivalvos, solicita ampliación de certificación ao grupo biolóxico crustáceos.

Convocatoria de axudas destinadas á creación de organizacións de produtores pesqueiros e asociacións de organizacións de produtores pesqueiros.

Convocatoria de axudas autonómicas para proxectos colectivos de modernización das infraestruturas dos portos pesqueiros, das lonxas ou establecementos autorizados para a primeira venda de produtos pesqueiros e dos lugares de desembarque, para a mellora da eficiencia enerxética, da protección do medio ambiente, da seguridade e das condicións de traballo, e da calidade e do control e rastrexabilidade dos produtos desembarcados da pesca.

O prazo para ambas remata o 13 de setembro.

O proxecto OCIMER “Optimización do cultivo integral e a metodoloxía de repoboación do ourizo de mar» ten como obxectivo implementar novas técnicas optimizadas de cultivo e metodoloxía de repoboación do ourizo de mar (Paracentrotus lividus), que contribúan a mellorar a calidade das gónadas producidas, ampliando o seu período de comercialización no mercado, así como á recuperación das poboacións de zonas sobreexplotadas e da actividade pesqueira asociada. Está a desenvolverse nas instalacións do CIM- Uvigo da Estación de Ciencias Mariñas de Toralla (ECIMAT) e ten como socia á Confraría de Pescadores San Xosé de Cangas, contando co apoio do Parque Nacional das Illas Atlánticas de Galicia. Preme aquí para acceder a un artigo sobre este proxecto.

O reló (Dosinia exoleta) é un bivalvo de contorno case circular con valvas grosas, interior branco e exterior habitualmente claro, cunhas pequenas bandas en zigzag moi vistosas. Case a totalidade das capturas proceden do marisqueo desde embarcación con rastro. O seu prezo é moi asequible.

Aínda que son algo máis duros cas ameixas, preparados á mariñeira, tal e como nos propoñen desde a OPP20 no seu recetario da campaña «O pracer na túa boca» para a promoción do Marisco de A Illa de Arousa, poden ser un excelente entrante.

Preme aquí para ver a receita elaborada polo cociñeiro galego Adrián Albino (Restaurante Niño Corvo).