Do 3 ao 5 de outubro celebrarase a 24ª edición da Feira Internacional de Produtos do mar Conxelados CONXEMAR no Instituto Feiral de Vigo.

A Feira CONXEMAR, consolidada como referente do sector do conxelado a nivel mundial e cunha superficie expositiva actual de 37.000 m², é un gran punto de encontro para o sector transformador, maioristas, importadores, exportadores, fabricantes, distribuidores, frigoríficos, maquinaria e industria auxiliar. A feira renóvase baixo o concepto Blue Transformation, poñendo o foco na innovación e sustentabilidade.

A Consellería do Mar estará presente co stand institucional da Xunta de Galicia e cun espazo para 14 empresas coexpositoras, entre as que se atopan  as seguintes entidades certificadas pola marca pescadeRías, ¿de onde se non?: O Percebeiro S.L., Costas y Miñán S.L. e a Confraría de Pescadores San Andrés de Portosín. Ademais, participan con stand propio as empresas certificadas Frigoríficos de Camariñas S.L., Mariscos Daporta S.L., Frigoríficos Rosa de los Vientos S.L., Conservas Portomar, Porto-Muiños e Frigorífica Botana S.L.

Ao redor de 30 profesionais do cinema nacional e internacional, asistentes á 16ª Edición do Festival Internacional de Cinema de Bueu FICBUEU, participaron na degustación guiada “Descubrindo as excelencias do noso mar con pescadeRías, de onde se non?”, que se celebrou o sábado 16 de setembro na Praza de abastos de Bueu.

Sergio Roma, do Restaurante O Souto de Pontevedra, fixo as delicias das persoas asistentes coas elaboracións presentadas a base de navalla, polbo, xarda e robaliza certificadas.

A Lonxa de Portonovo acolleu unha nova edición da Festa da Empanada Mariñeira de produtos certificados polo selo pescadeRías, ¿de onde se non?

Celebrouse con gran éxito de participación os días 23 e 24 de setembro, organizada polo Clube de Piragüismo e a Confraría de Pescadores de Portonovo. Houbo degustación de empanadas elaboradas con produtos certificados de diferentes confrarías de Galicia, maridaxes, demostracións de cociña en directo e concurso popular da empanada mariñeira.

Un ano máis, os produtos certificados polo selo pescadeRías, ¿de onde se non? estiveron presentes na XI Xuntanza de Bloggers Gastronómicos que tivo lugar en Vilagarcía de Arousa o 23 e 24 de setembro.

Pepe Solla, do restaurante Casa Solla, deseñou o menú do evento principal da xuntanza, que se celebrou no Pazo O Castriño. As persoas participantes puideron coñecer, ademais, o marisqueo a pé e a historia da Illa de Cortegada, entre outras actividades.

O 23 e 24 de setembro celebrouse unha nova edición do Mercado do Mar na explanada do Parrote en A Coruña, no marco da X edición do Festival Mar de Mares.

O domingo 24 tivo lugar a cata guiada Tesouros das nosas Rías, a cargo de Diego Domínguez de A Ostrería e Nómade de Santiago de Compostela. O chef presentou dúas elaboracións moi recoñecidas: navalla cítrica e sargo con salmorejo e pan de Cea.

O Mercado do Mar contou coa participación como expositor da empresa Porto-Muíños, certificada pola marca pescadeRías, ¿de onde se non? para algas.

A Consellería do Mar estará presente co stand institucional da Xunta de Galicia no Congreso Saborea Andalucía que se celebrará en Sevilla do 3 ao 5 de outubro. Galicia é a comunidade autónoma invitada desta edición.

A  marca pescadeRías, ¿de onde se non? estará presente no stand institucional da Xunta de Galicia.

Durante o evento celebraranse presentacións e degustacións guiadas de produtos certificados e impartiranse dous relatorios, un sobre a promoción dos produtos do mar en Galicia e outro sobre a marca pescadeRías, ¿de onde se non?

Do 9 ao 11 de outubro celebrarase a XXV edición de San Sebastián Gastronomika. O Kursaal acollerá este encontro gastronómico de referencia mundial da alta cociña.

A Consellería do Mar estará presente co stand institucional da Xunta de Galicia, xunto con 6 empresas coexpositoras, entre as que se atopan as entidades certificadas Costas y Miñán S.L. e O Percebeiro S.L.

Os produtos certificados pola marca pescadeRías, ¿de onde se non? serán protagonistas nas degustacións guiadas que se levarán a cabo durante o evento.

Dúas entidades certificadas conmemoraron os seus cen anos de historia no mes de setembro: a Confraría de Pescadores Nuestra Señora de las Arenas de Fisterra, o día 2, e a Confraría de Pescadores San Andrés de Portosín, o día 16.

Na celebración de ámbolos dous centenarios homenaxeouse aos patróns maiores que dirixiron as entidades ao longo dos 100 anos, poñendo en valor o compromiso e o labor realizado na defensa dos intereses dos profesionais do mar.

Parabéns pola traxectoria!

Podes ver varias imaxes dos eventos aquí.

Pulponor Sociedade Cooperativa Galega, certificada pola marca pescadeRías, ¿de onde se non? dende o ano 2015, dedícase á distribución de produtos conxelados, sendo o polbo o seu produto estrela.

O polbo da pesca artesanal galega que comercializan conxelado é un produto da mellor calidade, totalmente natural e cun sistema de embalaxe exclusiva con garantía de orixe das lonxas de baixura galegas.

O obxectivo da cooperativa é satisfacer, de forma eficiente, as necesidades de todos os profesionais do sector aos que se dirixen: pulpeiros/as, restauración e grandes superficies. Contan tamén con servizo para particulares a través da súa web www.pulponor.com

A choupa (Spondyliosoma cantharus) é un peixe semigraxo co corpo ovalado, alto e compacto. Pódese confundir co sargo. Para diferencialos podemos fixarnos na lixeira chepa que ten a choupa por detrás da cabeza. Ademais, carece da mancha negra que ten o sargo onde nace a aleta pectoral.

Os adultos presentan unha tonalidade gris azul prateada, con estrías douradas e discontInuas nos costados que van desde o opérculo ata a aleta caudal. Os exemplares novos son de cor gris escura. Entre os ollos presenta unha característica banda escura que chega ata o fociño.

Podes atopar máis información sobre esta especie nesta ligazón.

No mes de setembro impartiuse formación en hixiene e manipulación dos produtos da pesca ao persoal da empresa Da Lonxa ao Prato S.L., situada na Lonxa de Ribeira.

Esta empresa conta con depuradora de bivalvos, cetaria de crustáceos e realiza distribución dos produtos da pesca dende a Lonxa de Ribeira.

Todo o persoal da industria alimentaria ten que contar con formación actualizada en manipulación de alimentos, así como coñecer os principios básicos do APPCC, segundo a frecuencia que determine o Plan de Formación de cada empresa.

En setembro adheríronse á marca a peixería do Centro Carrefour As Cancelas e os restaurantes O Souto e Nómade.

Na peixería do Centro Carrefour As Cancelas de Santiago de Compostela podemos atopar produtos certificados procedentes da pesca artesanal.

O Souto é un bar restaurante situado no casco histórico de Pontevedra. Aposta por unha cociña de produto que adquire en provedores de proximidade certificados.

Nómade é un bar de viños de autor con cociña de proximidade en Santiago de Compostela. Centrados na calidade e na sustentabilidade, viño e cociña fan protagonista ao pequeno produtor e ao produto de tempada.

A depuradora de moluscos Mariscos Ramais S.L. renova a súa certificación na marca pescadeRías, ¿de onde se non? para o grupo biolóxico bivalvos.

Así mesmo, a empresa distribuidora Mares de Galicia S.A. tamén renova a súa certificación para bivalvos, estando ademais certificada como transformadora deste grupo biolóxico.

Da Lonxa ao Prato S.L., depuradora de bivalvos ubicada na Lonxa de Ribeira, amplía a súa certificación na marca como distribuidora de peixe, cefalópodos, crustáceos, equinodermos e antozoos.

O 2 de outubro comeza a campaña 2023-2024 do ourizo (Paracentrotus lividus) nas Confrarías de Pescadores da provincia de Pontevedra. Así mesmo, o 1 de outubro iniciarase o período autorizado para a extracción do santiaguiño (Scyllarus arctus) nas costas galegas, que se extenderá ata o 5 de xaneiro do vindeiro ano.

Por outra banda, xa está aberta a convocatoria das axudas autonómicas para proxectos ao abeiro das Estratexias de Desenvolvemento Local Participativas. Máis información aquí.

Pedro Montero, Garbiñe Ayensa, Silvia Calvo e Silvia Allen-Perkins, do INTECMAR, presentan o artigo Mellorando o coñecemento das condicións hidrográficas nas zonas dedicadas ao cultivo de especies marisqueiras.

O INTECMAR, xunto con MeteoGalicia e o CETMAR, leva máis de dez anos participando no Observatorio Costeiro da Xunta de Galicia que se dedica á observación e predición das condicións meteorolóxicas e oceanográficas da costa de Galicia. Esta información resulta de grande utilidade para os técnicos de marisqueo, xa que dá soporte na xestión sostible e coordinada do medio mariño.

Para ver o artigo completo, preme aquí.

Este mes propoñemos unha receita elaborada por Sergio Roma, do Restaurante O Souto de Pontevedra, que foi presentada no FICBUEU: Nigiri, croqueta de kimchi, cheddar e robaliza lañada. Esta curiosa combinación é fantástica para degustar como aperitivo.

A robaliza (Dicentrarchus labrax) é un peixe semigraxo que está no seu mellor momento de consumo durante o outono e inverno. Ademais de ser fonte de proteínas de alto valor biolóxico e ácidos graxos omega3, destaca o seu contido en fósforo e selenio e en vitaminas do grupo B.

Podes acceder á receita aquí.