A marca pescadeRías de onde se non? pon en marcha un programa de sesións formativas dirixidas ao persoal de lonxas, centrado no recoñecemento e diferenciación de especies mariñas de interese comercial en Galicia.

As accións, de catro horas de duración, repetiranse en distintas localidades para facilitar a asistencia do persoal das lonxas certificadas pola marca. O contido inclúe unha introdución ás principais características dos peixes e aos elementos anatómicos clave para a súa identificación. Ademais, impartirase un módulo específico sobre parasitos en peixe, con especial atención ao Anisakis, un aspecto indispensable para a seguridade alimentaria.

O primeiro curso terá lugar na Lonxa de Fisterra o 28 de outubro, en horario de 09:00 a 13:00, e está destinado ao persoal das lonxas de Muros, Lira, Corcubión, Fisterra e Malpica.

📞 Información e inscricións: 678 79 60 10
📧 Correo: ardora@ardoraformacion.com

Xa temos gañadoras do Sorteo con Sabor a Mar organizado pola marca pescadeRías de onde se non? o pasado mes de setembro.

As premiadas foron Alejandra Álvarez (@xanaalv) en Instagram, e Eva Pérez en Facebook. Cada unha delas recibiu un lote con produtos da marca pescadeRías de onde se non? e da campaña Galicia Sabe Amar, que inclúe unha cunca, mandil, paraugas pregable, calcetíns e diversos utensilios de cociña.

Desde pescadeRías de onde se non? queremos dar as grazas a todas as persoas que participaron no sorteo e que apoian día a día a pesca artesanal galega.

Os produtos da pesca artesanal galega están presentes na feira Conxemar 2025, que se celebra en Vigo do 7 ao 9 de outubro, nunha nova edición deste gran encontro internacional da industria dos produtos do mar conxelados.

A feira, considerada unha cita ineludible para o sector, conta cun stand institucional da Consellería do Mar no que participan 16 empresas galegas. Entre elas destacan tres entidades certificadas pola marca pescadeRías de onde se non?: Mariscos Daporta S.L., HQ Seaweed S.L. e Porto-Muíños S.L., que dan a coñecer as bondades dos produtos da pesca artesanal galega.

A marca pescadeRías de onde se non? terá presenza en destacados eventos gastronómicos nas próximas semanas, con participación en San Sebastián Gastronómika e Gastrónoma Valencia. Na cita donostiarra estarán presentes as empresas certificadas Horesmar e Artesa Rías Baixas S.L., que amosarán produtos da pesca artesanal galega ante profesionais da alta cociña. En Valencia, participarán dez entidades vinculadas á comercialización de produtos do mar, entre elas cinco certificadas pola marca: Fish Factory S.L., a Confraría de Pescadores Santiago Apóstol de Barallobre, Costas y Miñán S.L., Artesa Rías Baixas S.L. e Conservas La Brújula S.L. Dúas citas que reforzan o valor e prestixio dos produtos da pesca artesanal galega.

Ademais de acudir a Conxemar, a Consellería do Mar participará este mes en dúas das feiras internacionais máis relevantes do sector alimentario: ANUGA 2025, que se celebrará en Colonia do 4 ao 8 de outubro, e a China Fisheries & Seafood Expo 2025, en Qingdao, do 29 ao 31 de outubro. No stand institucional da Consellería en ANUGA participarán 17 empresas e entidades da industria de produtos do mar, entre elas tres certificadas pola marca pescadeRías de onde se non?: Conservas La Brújula S.L., Conservas Portomar S.L.U. e Costas y Miñán S.L. En China, o stand institucional acollerá cinco entidades vinculadas á comercialización de produtos do mar, incluídas Conxemar e a Cámara de Comercio de Pontevedra, Vigo e Vilagarcía de Arousa.

Este mes en Tripulación pescadeRías conversamos con María Muíños, responsable da Lonxa de Canido, xestionada pola Confraría de Vigo. Con ela coñecemos de preto como funciona a lonxa, desde a organización interna ata o proceso de venda ao público. María tamén nos fala da importancia de apostar polo consumo de peixe e marisco fresco, capturado pola nosa frota artesanal, e do valor engadido que achegan en termos de calidade, sostibilidade e confianza.

Unha oportunidade única para achegarnos ao traballo e á dedicación das persoas que fan posible levar o mellor do mar ás nosas mesas.

Podes ver o vídeo da entrevista aquí.

O pasado 1 de outubro comezou a campaña do ourizo (Paracentrotus lividus) nas confrarías da provincia de Pontevedra. A extracción está regulada nos plans de xestión aprobados pola Consellería do Mar, que afectan a oito confrarías certificadas pola marca pescadeRías de onde se non? na provincia de Pontevedra. A campaña prolongarase ata marzo ou abril, segundo o estipulado en cada plan e en función da evolución do estado do recurso. Nos dous primeiros días de campaña, o ourizo acadou prezos en lonxa de entre 15 e 18 euros por quilo, o que indica unha forte demanda.

A campaña do santiaguiño (Scyllarus arctus) comezou tamén o 1 de outubro. Por outra banda, a lagosta (Palinurus elephas) despídese dos mercados ata o 1 de xaneiro.

En setembro realizáronse diversas auditorías no marco da marca pescadeRías de onde se non?, un proceso esencial para garantir o cumprimento dos requisitos de certificación esixidos pola marca.

A empresa Marítima de Hoteles y Restaurantes S.L. (HORESMAR), situada na Lonxa de Vigo, tivo a súa auditoría inicial para obter a certificación como distribuidora de peixe, crustáceos, bivalvos e cefalópodos. Conservas Antonio Pérez Lafuente S.A., con sede en Vilanova de Arousa, afrontou a auditoría de seguimento como transformadora de bivalvos e peixe. Pola súa parte, a Confraría de Pescadores de Rianxo renovou a súa certificación como lonxa de peixe, cefalópodos, crustáceos e bivalvos, que ten vixente desde 2015.

A Pescadería Áncora, situada en Bandeira (Silleda), vén de incorporarse á rede de entidades adheridas á marca de calidade pescadeRías de onde se non?, consolidando así a súa aposta polos produtos da pesca artesanal galega.

O establecemento ofrece peixe e marisco fresco procedente maioritariamente da lonxa de Ribeira, o que garante orixe certificada, frescura e trazabilidade. O seu horario de apertura é de martes a sábado, de 09:00 a 14:00 horas, e conta cun servizo a domicilio que facilita o acceso ao mellor produto do mar. Ademais, admite pagamentos con tarxeta e Bizum, que da resposta ás novas necesidades da clientela.

A entidade do mes de outubro é Pescados Loureda S.L., certificada pola marca pescadeRías de onde se non? desde novembro de 2024 para peixe, cefalópodos, crustáceos e bivalvos. Con sede no porto da Coruña, a empresa merca diariamente en diversas lonxas galegas, garantindo frescura, trazabilidade e calidade nos produtos da pesca artesanal galega.

Especializada no abastecemento de comedores escolares, hospitais e outras colectividades, destaca pola súa aposta por un modelo responsable baseado na estratexia Desperdicio Cero. Ofrece máis de cen referencias e máis de vinte tipos de preparación de peixe fresco e aporta valor pola súa capacidade de aconsellar e acompañar á súa clientela.

A especie protagonista deste mes é o santiaguiño (Scyllarus arctus), un crustáceo decápodo moi apreciado que acaba de iniciar a súa campaña de capturas, vixente ata o 5 de xaneiro.

O seu nome provén da forma das espiñas do dorso do caparazón, que lembra a cruz de Santiago. De corpo aplanado e robusto, presenta unha coloración parda con tons vermellos e unhas antenas anchas en forma de paleta. Vive en fondos rochosos entre os 3 e 50 metros de profundidade e péscase con nasas e trasmallos.

A súa carne é delicada, de sabor fino e intenso.

Podes ampliar a información aquí.

O artigo do mes presenta o desenvolvemento dun Índice de Maduración Visual (IMV) para a ostra plana (Ostrea edulis). O traballo foi realizado por Carlos Brezmes Comesaña, biólogo da Delegación Territorial de Ferrol da Consellería do Mar, xunto con asistencias técnicas das confrarías da Ría de Ferrol.

O obxectivo é crear un método práctico e accesible para avaliar o estado de maduración sexual da especie. O IMV baséase na observación da cor e aspecto da gónada, de xeito que permite estandarizar o seguimento reprodutivo e facilitar unha xestión sostible da pesqueira. Podes ler o artigo aquí.

Paco Caneda, cociñeiro e profesor do Obradoiro de Emprego de Hostalaría da Mancomunidade do Salnés, comparte unha das súas propostas máis destacadas: un arroz verde cremoso de raia con polbo e boletus. A elaboración, presentada na Festa da Raia de Portonovo (Sanxenxo), destaca pola combinación da tradición mariñeira galega coa innovación gastronómica, resultando nun prato cheo de sabor e cor.

Cun uso creativo de produtos do mar certificados, esta receita pon en valor a versatilidade da raia e do polbo, dous clásicos da nosa cociña.

Podes consultar a receita completa aquí.