Entre o 8 e o 10 de xullo terá lugar en Os Pendellos, Agolada, o IX Encontro da Artesanía Tradicional e Popular de Galicia. 42 expositores de Artesanía de Galicia e 31 expositores de alimentación estarán presentes na nova edición do Corazón da Artesanía.

Como en edicións anteriores, os produtos certificados polo selo pescadeRías, ¿de onde se non? terán presenza neste evento nunha mostra de cociña en directo a cargo do chef Álvaro Fuentes, de Taberna Meloxeira de O Grove. Preme aquí para ver o programa.

Entre o 15 e o 17 de xullo terá lugar unha nova edición da Festa da Vieira de Cambados no parque de Torrado, onde se instalarán tres postos nos que se servirá marisco de Porto de Cambados, S.L.

A maiores, durante estes días, promocionarase a venda de vieiras nos locais de hostalaría desta localidade. A vieira de Porto de Cambados. S.L. está certificada polo selo pescadeRías, ¿de onde se non?.

Un ano máis, a Confraría De Pescadores de Lira organiza unha degustación popular de produtos da Reserva Mariña de Lira. A primeira cita terá lugar o sábado 23 de xullo no porto de Lira e a segunda celebrarase o sábado 6 de agosto. Entre as 12:30 e as 20 horas poderanse degustar percebes, navallas, berberechos, nécoras e polbo procedentes da lonxa desta localidade, certificada polo selo pescadeRías, ¿de onde se non?. Preme aquí para ver o cartel do evento.

Tras ser declarada este ano Festa de Interese Turístico de Galicia, o vindeiro domingo 31 de xullo celebrarase a XXIII edición da Festa do Percebe de Aguiño. Ao redor de mil quilos deste crustáceo poderán ser degustados no porto desta localidade a partir das 12:00 horas.

O percebe que se comercializa na Lonxa de Aguiño está certificado polo selo pescadeRías, ¿de onde se non?.

Entre o 17 e o 18 de setembro terá lugar na Explanada do Parrote en A Coruña unha nova edición do Mercado e Festa do Mar, no marco do Festival Mar de Mares, onde como cada ano estará presente o selo pescadeRías, ¿de onde se non?.

Este espazo permite expoñer, difundir e vender produtos e servizos do tecido produtivo galego ligadas ao mundo do mar coas premisas de calidade e sostibilidade. Xa está aberto o prazo para participar como empresa expositora. Podes consultar as bases premendo aquí.

A Lonxa de Ferrol está certificada polo selo pescadeRías para a primeira venda de peixes, crustáceos, cefalópodos, bivalvos, antozoos e equinodermos. No mesmo edificio, a Confraría ten unha pequena depuradora de bivalvos e centro de expedición de equinodermos, tamén certificados, e unha peixería chamada A Túa Lonxa, adherida ao selo. Unha especie característica que se comercializa nas súas instalacións é a zamburiña, en campaña ata o mes de outubro. Case a totalidade das capturas desta especie en Galicia proceden da Ría de Ferrol.

O xurelo (Trachurus trachurus) é unha especie procedente da nosa pesca artesanal capturada principalmente coa arte do cerco durante o verán. Tamén se usan para súa pesca artes de enmalle e a liña. Os xurelos nadan en grandes cardumes a unha profundidade de entre 100 e 200 metros, subindo á superficie polas noites para alimentarse, momento no que poden ser capturados.

Se queres saber máis sobre esta especie e os seus importantes valores nutricionais, preme aquí para ver unha ficha.

A xarda, un peixe azul procedente da nosa pesca artesanal, económico e con importantes valores nutricionais, foi protagonista no programa Vivir o Mar o pasado 12 de xuño. Dende Mariscos Carlos, peixería adherida ao selo pescadeRías, ¿de onde se non? no Mercado de Abastos de Santiago de Compostela, falaron de como limpalo, prepalalo e diferencialo do cabalón e Jorge Gago do Restaurante A Maceta, tamén en Santiago e adherido ao selo, ofreceu unha suxestión de preparación. Premendo aquí podes ver o espazo adicado a esta especie no programa a partir do minuto 18:43.

Ubicado na vila de Rianxo (A Coruña), o restaurante Aghro da Corna adheriuse este mes ao selo pescadeRías, ¿de onde se non?.

En Aghro da Corna pódese desfrutar dunha cociña chea de contrastes nos que se unen mar e montaña para crear pratos 100% galegos.

Tralos seus fogóns está o chef Manu Gómez que ofrece unha cociña alternativa e moderna pero con moita tradición. Foi galardoado como campeón do mundo de cociña contemporánea.

En xuño a Cooperativa Cíes Artesanais (bivalvos, cefalópodos, crustáceos e peixe) e a depuradora de bivalvos Mariscos Gusbuzo, S.L. tiveron unha auditoría para acadar a certificación no selo pescadeRías. A Sociedad Cooperativa Gallega Ría de Arosa (bivalvos, crustáceos, equinodermos e gasterópodos), Conservas Antonio Pérez Lafuente, S.A. (bivalvos e peixe) e Conservera Gallega, S.A. (bivalvos) superaron auditorías de recertificación, e Real Conservera Española, S.L. (bivalvos, equinodermos e peixe) e Javier Beiro (Mar da Morosa) (depuradora e distribuidor de bivalvos, cefalópodos, crustáceos e peixe) superaron auditorías de seguemento.

En xuño impartiuse formación en Hixiene Alimentaria e Manipulación de Produtos Pesqueiros ás empresas Da Lusada, S.L., Mariscos Gusbuzo S.L. e Cíes Artesanais S. Coop. Galega.

Que o persoal con responsabilidades na manipulación dos produtos que comercializan teña a formación actualizada nestas materias é un requisito necesario para a certificación no selo pescadeRías, ¿de onde se non?.

Na última edición dos Premios Galicia Alimentación do Clúster Alimentario de Galicia, as Navallas das Rías Galegas ao natural da empresa certificada Real Conservera Española, S.L., foron galardoadas na categoría de Produto Excelente. O xurado destacou a calidade da materia prima e a súa elaboración artesanal: Recoñécese con todo isto un produto final excelente, con historia, carisma, artesanal e natural que ten a orixe na mellor materia prima e que é un embaixador da excelencia dos produtos galegos.

Publicadas as bases da convocatoria da XIII edición dos Premios de Excelencia á Innovación para Mulleres Rurais do MAPA, correspondentes ao ano 2022, nas seguintes categorías: Excelencia á innovación na actividade agraria, Excelencia á innovación na actividade pesqueira ou acuícola, Excelencia á innovación en diversificación da actividade económica no medio rural e Excelencia á comunicación. En prazo ata o vindeiro 8 de xullo. Preme aquí para ver as bases.

Publicada a Resolución do 18 de xuño de 2022, da Secretaría Xeral de Pesca, pola que se modifica a do 2 de abril de 2022, pola que se establecen disposicións de ordenación da pesqueira da sardiña ibérica (Sardiña pilchardus) que se pesca en augas ibéricas da zona CIEM 8c e 9a.

A partir do 1 de xullo a nécora e o lumbrigante volveron a comercializarse nas lonxas galegas tras o fin da súa veda. Así é como o recolle o Plan Xeral de explotación marisqueira para o trienio 2021-2023.

O día 4 de xullo remata a veda do polbo en Galicia que comezara o pasado 20 de maio, tal e como se establece na RESOLUCIÓN do 29 de abril de 2022 pola que se aproba o Plan experimental para a xestión do polbo (Octopus vulgaris) con nasa para a campaña 2022-2023.

RESOLUCIÓN da Xefatura Territorial da Consellería do Mar na Coruña, pola que se convoca o proceso selectivo para o acceso ao permiso de explotación, modalidade de marisqueo xeral a pé, para o exercicio da actividade extractiva no ambito da confraría de pescadores de O Pindo.

RESOLUCIÓN da Xefatura Territorial da Consellería do Mar na Coruña, pola que se convoca o proceso selectivo para o acceso ao permiso de explotación, modalidade percebe a pé para o exercicio da actividade extractiva na confraría de pescadores de O Pindo.

A sardiña é un peixe con altos valores nutricionais e o seu consumo axuda a combater a hipertensión, a obesidade e a diabetes, entre outras enfermidades. Dende o punto de vista ambiental, captúrase con artes moi selectivas como son o cerco e o xeito. Se consideramos a pegada de carbono de ambas, son unha das opcións alimentarias con menor impacto por contido proteico achegado (entre o 0,5 e o 0,7 kg de CO₂/kg de sardiña). Se queres saber máis, preme aquí para ver un artigo.

O xurelo é un peixe azul que nos aporta proteínas de alto valor biolóxico e ten un alto contido en ácidos graxos omega 3. Nestes meses de verán está no seu mellor momento de consumo.

Alejandro Iglesias, do Restaurante Cabanas en Lalín, presentou na última edición do Salón de Alimentación do Atlántico – SALIMAT A BANCA, unha receita de xurelo acompañado de Grelos de Galicia, rica e saudable. Preme aquí para acceder a ela.