Un ano máis, o restaurante Casa Barqueiro organiza o evento gastronómico solidario «Estrelas no Camiño de Santiago», a beneficio da Asociación Galega da Síndrome X Fráxil.

O evento terá lugar o 10 de xuño na Finca Casa Barqueiro situada no Lugar de Gonte, A Coruña, e contará coa participación de prestixiosos chefs Estrela Michelín.

Dentro de este evento, os produtos certificados pola marca pescadeRías de onde se non? serán protagonistas dos menús gastronómicos. Preto de 40 profesionais da cociña que suman más de 80 Estrelas Michelín terán a oportunidade de coñecer en directo as bondades dos produtos certificados pola marca.

De xeito complementario, no mes de maio levouse a cabo a campaña Bocado Solidario, en colaboración con Estrella Galicia e as cinco asociacións de hostalería de Galicia. Cada un dos restaurantes que participaron deseñou un Bocado Solidario e, de cada consumición deles, destinou unha doazón en favor da Asociación Galega da Síndrome X Fráxil.

Información e reservas aquí.

A Consellería do Mar asistiu á feira anual PLMA’s World of Private Label que se celebrou en Ámsterdam os días 28 e 29 de maio, organizada pola Private Label Manufacturers Association. A presenza da Consellería do Mar neste evento enmarcouse nunha colaboración coa Federación Española de Industrias de Alimentación y Bebidas.

Conservas Portomar S.L.U. e Conservas La Brújula S.L., empresas certificadas, participaron como coexpositoras xunto con outras oito empresas galegas, e presentaron os seus produtos do mar xunto con 2.900 exhibidores de 70 países.

A marca pescadeRías de onde se non? participou na 8ª edición do Galicia Market Place Mar, organizada polo Círculo de Empresarios de Galicia, que se celebrou o xoves 30 de maio.

Ana Pérez, coordinadora do equipo técnico da marca, interveu na mesa redonda de Consumo. As entidades certificadas Frigoríficos Rosa de los Vientos S.L., HQ Seaweed S.L., Porto de Cambados S.L. e a Confraría de Pescadores San José de Cangas tiveron presenza no espazo escaparate, de presentación de produtos artesanos/gourmet e novas iniciativas do mar de Galicia. Podes ver un vídeo resume aquí.

Estivemos no Salón de Alimentación do Atlántico Salimat-Abanca do xoves 30 de maio ao domingo 2 de xuño dando a coñecer os produtos do mar de Galicia certificados. As actividades de cata de produtos no stand institucional da Consellería do Mar tiveron lugar o venres 31 e o sábado 1.

Participaron na exposición sete empresas de produtos do mar, entre elas Real Conservera Española S.L. e Insuapesca S.L., ámbalas dúas certificadas pola marca pescadeRías de onde se non?

Podes ver un resume das actividades neste vídeo.

O sábado 8 de xuño ás 12.00 h terá lugar o showcooking «Tesouros da nosa pesca artesanal» no Mercado Mar de Mares. Os cociñeiros Javier Freijeiro e Moncho Bargo, do Restaurante Pracer, presentarán a súa proposta creativa con produtos da marca pescadeRías de onde se non?

Participarán no mercado como expositores as empresas certificadas Porto-Muiños S.L. e Mariscos de Barallobre. O mercado Mar de Mares está enmarcado no Festival Mar de Mares, que se celebra do 8 ao 16 de xuño

A Consellería do Mar asistirá á feira do sector gourmet Fancy Food Show en Nova York da man do ICEX.

A feira celebrarase do 23 ao 25 de xuño e está prevista a participación de empresas galegas do sector mar-industria, entre elas, as seguintes empresas certificadas pola marca: Conservas La Brújula S.L., Conservas Portomar S.L., HQ Seaweed S.L. e Fish Factory S.L.

Seguimos formando ao persoal das entidades certificadas en hixiene e seguridade alimentaria e requisitos da marca pescadeRías de onde se non? .

En maio recibiron formación o equipo directivo e persoal responsable do transporte e preparación para primeira venda da Confraría de Pescadores «Pedra da Oliveira» de Vilaboa, a nova traballadora do equipo de venda da lonxa da Confraría de Pescadores “La Anunciada” de Baiona e a responsable de calidade de Artesa Rías Baixas S.L.

Unha delegación do Ministerio de la Producción del Perú visitou Galicia no mes de maio para coñecer o sector pesqueiro galego e os programas de promoción de consumo de peixe da Consellería do Mar.

Visitamos con eles e co equipo do Centro tecnológico del Mar-Fundación Cetmar que os acompañaba, o porto, a lonxa e a praza de abastos de Bueu para darlles a coñecer a marca pescadeRías de onde se non?

O equipo técnico da marca pescadeRías de onde se non? impartiu unha charla sobre a marca no obradoiro de peixería e elaboración de produtos da pesca e acuicultura organizado polo Concello de Marín no Espazo Emprendedor Parque Azul.

O alumnado do obradoiro traballou aspectos como diferenciación de especies, o etiquetado de produtos do mar, orixe, frescura, trazabilidade e sustentabilidade ligados á marca.

A Organización das Nacións Unidas ONU celebra o 5 de xuño o Día Internacional da Loita contra a pesca ilegal, non declarada e non regulamentada, e tamén o Día Internacional do Medio Ambiente.

Desde a marca pescadeRías de onde se non? queremos poñer o foco na responsabilidade de todos os axentes implicados na cadea de consumo de produtos do mar -desde o sector extractivo ata o consumidor final- e compartir o vídeo publicado pola ONU “A pesca sustentable comeza por nós». Preme aquí para velo.

Algunhas especies presentan características físicas similares e resultan difíciles de distinguir no punto de venda. Isto non nos debe sorprender, pois é habitual que a clasificación taxonómica das especies vaia cambiando no tempo conforme avanza o coñecemento científico. Hoxe poñemos o foco en dúas especies de peixes que poden levar a confusión: o sargo común (Diplodus sargus) e a choupa (Spondylioma cantharus).

Preme aquí para ver as diferenzas. En caso de dúbida, consulta a etiqueta e pregunta ao teu peixeiro ou peixeira de confianza.

No mes de maio tiveron auditoría de seguimento a Confraría de Pescadores de Aldán-Hío (cefalópodos, peixes, bivalvos e gasterópodos), HQ Seaweed S.L. (algas) e Frigoríficos Rosa de los Vientos S.L. (cefalópodos e bivalvos).

As auditorías de seguimento son de obrigado cumprimento para todos os axentes certificados e pásanse nun momento intermedio durante o período de vixencia da certificación. As certificacións outórganse por cinco anos.

Damos a benvida á peixería Carrefour Market de Sada, que comercializa produto da pesca artesanal galega, e acaba de adherirse á marca pescadeRías de onde se non?

O seu proveedor é Orixe da Ría S.L., distribuidor certificado que compra diariamente nas lonxas galegas.

Orixe da Ría S.L. provee tamén á peixería do Carrefour Market de Sanxenxo, adherida á marca con anterioridade.

No mes de maio abriu a campaña da zamburiña (Mimachlamys varia) na Ría de Ferrol,  o ameixón (Callista chione), na Ría de Muros e Noia, e os anemones  (Anemonia viridis).

Durante este mes capturáronse dúas toneladas de zamburiña, que se comercializaron nas lonxas das Confrarías de Ferrol e Barallobre. O volume de ameixón extraído foi perto de 10 toneladas, e o 98% da primeira venda fíxose na lonxa da Confraría de Muros.   De anemones capturáronse 518 quilos e a primeira venda canalizouse a través da lonxa da Confraría de Barallobre.

Están abertas as seguintes convocatorias de axudas e subvencións de interese para o sector pesqueiro e marisqueiro:

Subvencións da Deputación de Pontevedra ás confrarías de pescadores/as, federacións de confrarías e agrupacións de mariscadoras da provincia de Pontevedra para investimentos. Información aquí.

Axudas da Consellería do Mar a persoas armadoras e tripulantes, por paralización temporal da actividade marisqueira. Información aquí.

O longueirón (Ensis siliqua) é un molusco bivalvo con dúas cunchas rectas e alongadas, o cal o diferencia da navalla (Ensis magnus), que é lixeiramente curva. Nótase moito nas valvas a liña de crecemento e presenta dúas zonas de cor diferente, separadas por unha diagonal: unha zona de liñas horizontais marróns ou alaranxadas e outra de liñas verticais.

Vive en fondos areosos, no intermareal inferior e no infralitoral. A súa extracción faise mediante mergullo a pulmón ou con subministro de aire dende superficie, capturando os individuos de un en un coa man. Máis información aquí.

Da Lonxa ao Prato S.L. é  unha empresa familiar con base en Ribeira e profundamente imbricada no sector da pesca desta localidade. Dedícase á venda de produtos pesqueiros frescos, a maioristas e minoristas, tanto a nivel local e autonómico, como nacional e internacional.

Teñen unha instalación depuradora de moluscos bivalvos e cetárea propia. Están certificados pola marca para a comercialización de bivalvos, peixes, cefalópodos, crustáceos, equinodermos e antozoos.

O artigo do mes está centrado no consumo de peixe azul e amósanos unha perspectiva dupla: os seus beneficios para a saúde e para o medio ambiente.

O catedrático de Enxeñería Química da Universidade de Santiago de Compostela Gumersindo Feijoo explica os aportes nutricionais do peixe azul e os efectos da dieta atlántica sobre a poboación. Tamén proporciona información sobre o impacto ambiental das modalidades de pesca empregadas na súa captura e a pegada de carbono asociada. Podes ler o artigo completo aquí.

O restaurante Liresca de Cee proponnos cociñar un dos peixes que está en tempada neste mes de xuño: o pinto (Labrus bergylta).

A súa caldeirada de pinto con parmentier de pataca de Coristanco e “fabas do marisco” (alubia verdina da Costa da Morte) xunta no mesmo prato os nosos sabores do mar e da terra, produto local, temporalidade e sustentabilidade.