A marca pescadeRías de onde se non? acudirá á 27ª edición do Salón de Alimentación do Atlántico Salimat Abanca do 30 de maio ao 2 de xuño. A Consellería do Mar participará cun stand institucional, que incluirá unha sala de catas onde terán lugar as actividades de promoción dos produtos do mar. Está prevista a participación de empresas coexpositoras, que presentarán os seus produtos frescos e elaborados certificados pola marca.

Ademais, a Consellería do Mar asistirá á feira anual PLMA’s World of Private Label que se celebra en Ámsterdam os días 28 e 29 de maio, organizada pola Private Label Manufacturers Association. A presenza da Consellería do Mar neste evento enmárcase nunha colaboración coa Federación Española de Industrias de Alimentación y Bebidas. Está prevista a participación de empresas coexpositoras galegas, xunto con 2.900 exhibidores de 70 países.

A marca pescadeRías de onde se non? participou no Fórum Gastronómico que se celebrou en A Coruña do 7 ao 9 de abril, acompañada de tres entidades certificadas que acudiron a promocionar os seus produtos: Porto-Muiños, S.L.; a Confraría de Pescadores San Andrés de Portosín e a Confraría de Pescadores Santiago Apóstol de Barallobre.

Os produtos protagonistas das catas foron os moluscos -vieira, navalla e carneiro-, cefalópodos como o choco e o polbo; a raia, e o peixe azul, en colaboración co distintivo Azul de Portosín.

Podes ver un vídeo resume das actividades da marca no Fórum Gastronómico aquí.

Do 22 ao 25 de abril celebrouse en Madrid o Salón Gourmets, a feira líder en Europa de alimentos e bebidas de alta calidade dirixida a profesionais, na que a marca pescadeRías de onde se non? puido darse a coñecer a través das actividades organizadas no stand institucional da Consellería do Mar.

Participaron como coexpositores certificados: Confraría de Pescadores San Andrés de Portosín, O Percebeiro S.L., Conservera Gallega S.A., Costas y Miñán S.L., Conservas Portomar SLU., Fish Factory, S.L., Conservas La Brújula, S.L. e Porto-Muiños, S.L.

Podes ver aquí un vídeo resume.

A canle francoalemana Arte TV dedicou unha reportaxe á vieira galega, á que denominou “O ouro do mar”

José Antonio Domínguez, do blog Rutas y restaurantes, foi o anfitrión do programa en A Coruña, e deleitou á audiencia da canle cunha receita de vieiras ao albariño. Explicou paso a paso o procedemento, con consellos para tratar o produto de xeito que se poida apreciar ao máximo o seu sabor e textura. A receita foi elaborada con produto certificado de Porto de Cambados, S.L., adquiridas en Pescados y Mariscos Rabina.

Podes ver a reportaxe aquí.

O 30 de abril impartiuse unha charla informativa sobre a marca pescadeRías de onde se non? ao alumnado de 2º curso de Gastronomía do Centro Superior de Hostalaría de Galicia, en colaboración coa empresa certificada Artesa Rías Baixas S.L.

As persoas participantes coñeceron os oficios do mar e os produtos certificados amparados pola marca, a importancia do etiquetado e a trazabilidade dos produtos do mar, así como conceptos relacionados coa seguridade alimentaria. Ademais, puideron visualizar o proceso de comercialización da vieira certificada por parte de Artesa Rías Baixas S.L.

O sábado 27 de abril realizouse unha visita guiada á  praza de abastos de Bueu para a Asociación de Mulleres en Igualdade de Galicia.

As participantes comezaron a visita polo porto, onde recibiron información sobre o tipo de pesca, embarcacións e artes coas que se capturan os produtos certificados pola marca pescadeRías de onde se non? Xa na praza, fixeron un recorrido polas bancadas para ver os mariscos e os peixes expostos, identificar as súas características de frescura e interpretar os distintos apartados dunha etiqueta de peixes e mariscos.

A formación de todo o persoal implicado na cadea mar-industria é fundamental para que a trazabilidade dos produtos do mar sexa efectiva. O equipo de xestión da marca imparte formación aos distintos axentes certificados para que poidan aplicar estes coñecementos no seu día a día.

No mes de abril impartiuse formación sobre a marca ao persoal da Confraría de Pescadores San José de Cangas e da Confraría de Pescadores Nuestra Señora de las Arenas de Fisterra.

Despedímonos por uns meses do polbo (Octopus vulgaris) e o ourizo (Paracentrotus lividus), xa que as súas campañas acaban de pechar. O polbo abrirá de novo o 1 de xullo e o ourizo a partir do mes de outubro.

Por outra banda, volverán a estar presentes nos mercados o ameixón (Callista chione), desde o 6 de maio, debido á apertura da campaña na Ría de Muros, e os anemones (Anemonia viridis), xa que algunhas confrarías da provincia de A Coruña comezan a súa extracción este mes.

O pasado mes de abril comezou a campaña da anguía (Anguilla anguilla) para as confrarías da Ría de Arousa e da Ría de Vigo, que estará vixente ata o 28 de setembro. Nas primeiras catro semanas de campaña capturáronse 3.184 quilos na Ría de Vigo e 777 na Ría de Arousa, por un valor de 46.208 e 10.879 euros, respectivamente.

As primeiras vendas concentráronse na lonxa de Arcade, que acaparou o 78% do volume descargado, seguida das lonxas de Carril (20%) e Vigo (2%).

Damos a benvida á marca a Conservas Antonio Alonso S.A., que no mes de abril pasou a auditoría de certificación inicial para moluscos bivalvos.

Conservas Antonio Alonso S.A., maestros conserveiros desde 1873, é a empresa deste sector máis antigua de España en activo, e veñen de celebrar no 2023 os seus 150 de historia. Comercializan a marca Palacio de Oriente, todo un referente da conserva galega.

O pasado mes de abril adheríronse á marca os seguintes restaurantes: A artesa da moza crecha, Liresca e Salitre.

A artesa da moza crecha, en Betanzos, ten como máxima “Innovación na tradición” e está estreitamente ligado aos produtos da Biosfera Mariñas Coruñesas e Terras do Mandeo.

O restaurante Liresca, en Lires (Cee), aposta por unha cociña na que destacan os produtos locais, con peixes e mariscos procedentes de Fisterra e das confrarías da Costa da Morte.

O restaurante Salitre, en A Coruña, ofrece unha carta protagonizada por peixes e arroces que misturan tradición e frescura.

Dámoslles a benvida!

Ampliación do prazo de renovación dos permisos de explotación a pé da confraría de pescadores de Vilanova de Arousa. Información aquí.

Algas a pé na confraría de pescadores de Corcubión. Preme aquí.

Xefatura territorial da Consellería do Mar da Coruña: renovación dos permex de recursos específicos a pé de percebe, ourizo, anemones, poliquetos e algas para o ano 2025 Información aquí.

Renovación de percebe, algas, equinodermos, solénidos, peneira, anémones e poliquetos, no permiso de explotación de embarcacións para o trienio 2025-2027. Xefatura territorial de A Coruña información aquí, Dirección Territorial Celeiro-Viveiro información aquí e Dirección Territorial de Vigo información aquí.

O sanmartiño (Zeus faber) é un peixe de corpo alto e comprimido, cunha cabeza moi grande e carente de escamas, excepto na liña lateral. Presenta espiñas ao lado do abdome e a aleta dorsal ten radios moi longos. De cor dourada ou gris verdosa, ten unha mancha negra rodeada de branco ou amarelo no centro do corpo, a ambos os dous lados. Pode chegar aos 60 centímetros de largura, aínda que adoita medir entre 20 e 50. Acada a madurez sexual aos 4 anos.

Aliméntase principalmente de peixes das familias dos clupeidos (como a sardiña) e gádidos (como a faneca), e consomen en menor medida cefalópodos e crustáceos.

Podes atopar máis información sobre esta especie nesta ligazón.

A actividade das persoas socias da confraría de pescadores de Malpica de Bergantiños está centrada na pesca artesanal: a pesca do cerco e a pesca con artes menores (enmalle, anzol e nasas) son as súas principais modalidades.

No ano 2023, as principais especies descargadas por volume foron a sardiña, a pescada, a saboga e a xarda. En volume de ingresos destacan, nesta orde, o polbo, a robaliza, o xurelo e o linguado.

Está certificada pola marca pescadeRías de onde se non? para a comercialización cefalópodos, crustáceos e peixe.

Este mes queremos presentarvos un aparello hidráulico para a remoción de sedimentos en bancos marisqueiros. Foi desenvolvido por técnicos de SEAGA e investigadores do CIMA.

O seu deseño e as experiencias adquiridas no seu manexo están a disposición daquelas agrupacións e confrarías que desexen poñer en práctica o uso cotián das tarefas de remoción hidráulica para mellorar o estado do substrato dos seus bancos marisqueiros.

Podes ler aquí o artigo completo.

A receita do mes chéganos da man de Fernando “Caco” Agrasar e Gonzalo Blanco do Restaurante Salitre de A Coruña. Trátase dunha elaboración de xarda con emulsión do seu escabeche, e foi presentada na última edición do Fórum Gastronómico con grande éxito de crítica.

A xarda, tamén chamada rincha, é un peixe azul que nestes meses está en comida. A receita que vos propoñemos é sinxela de preparar e moi fresca e saborosa en boca, de xeito que resalta o sabor do peixe.

Para ver a receita completa, preme aquí.