Outubro20 secundarias galego

A Xunta de Galicia comezou a aplicar a tecnoloxía blockchain á trazabilidade da marca de calidade pescadeRías, de onde se non?. Incorpórase como parte do proceso de cada operación da cadea de trazabilidade ata que chega ao consumidor final. A aplicación permite poñer a disposición das persoas usuarias un informe completo de trazabilidade que pode atopar en calquera etiqueta do produto, que presenta, entre outras, as características do peixe ou marisco, a data e zona de captura, peso e a traza de todos os axentes da marca polos que pasou ese produto.

A marca pescadeRías, ¿de onde se non? foi noticia en La Voz de Galicia. O artigo pon en valor á marca como selo de identidade para a promoción e defensa dos produtos da frota artesanal, así como a dimensión social da marca.  Amosa a evolución do volume de produto certificado e da súa presenza no mercado e o incremento do número de entidades certificadas e adheridas desde os seus inicios. Destaca, entre outros, o recoñecemento outorgado pola Comisión Europea como exemplo de boas prácticas.

Podes velo aquí.

A sardiña, a xarda e o xurelo son peixes azuis cuxo consumo está asociado aos meses de verán. As tres especies son ricas en proteínas e ácidos graxos insaturados tipo omega-3, beneficiosos para a saúde, destacando o seu papel na prevención de doenzas cardiovasculares e dexenerativas. Podes descargar unha ficha informativa premendo aquí.

Aínda que a partir de agora non estarán na súa mellor época de consumo en fresco, pódense seguir atopando nos mercados tanto en fresco como en conserva.

Do 11 ao 19 de setembro celebrouse a 13 edición do Festival Intenacional de Curtametraxes de Bueu – FICBUEU. Directores/as, críticos/as, xurado e profesionais da industria de cine nacionais coñeceron e degustaron produtos certificados como a navalla, o polbo, as xoubas e o sargo, nun showcooking  levado a cabo en Casa Quintela de Bueu o 12 de setembro.

A sétima edición do Festival Mar de Mares celebrou o seu primeiro Mercado do Mar en liña do 24 ao 27 de setembro, coa colaboración da Consellería do Mar. Amosáronse os produtos e servizos de 12 iniciativas, entre as que se atopan, o selo pescadeRías, ¿de onde se non? e as empresas certificadas Conservas Currimar, Porto-Muiños e Pulponor Sociedade Cooperativa Galega.

Os produtos certificados da marca pescadeRías, ¿de onde se non? estiveron presentes na segunda edición do encontro de diálogo, debate e reflexión Foro La Toja Vínculo Atlántico.

O evento celebrouse entre o 1 e o 3 de outubro nas instalacións do Eurostars Gran Hotel La Toja.

O 1 de outubro comezou a campaña de extracción de ourizo na provincia de Pontevedra. As lonxas das Confrarías de A Guarda, Baiona, Bueu, Aldán-Hío, Vigo, Portonovo e Cangas comercialízanno certificado polo selo pescadeRías, ¿de onde se non?.

Nas provincias de A Coruña e Lugo a apertura será entre os meses de novembro e xaneiro.

En 2019, no conxunto das lonxas galegas, comercializáronse preto de 700.000 quilos deste equinodermo por un valor próximo aos 6 millóns de euros.

O pasado 14 de setembro, máis de 1500 persoas, entre mariscadores/as a pé e desde embarcación, comezaron a campaña marisqueira en Noia 2020. O presidente da Xunta de Galicia, Alberto Núñez Feijoo e a conselleira do Mar, Rosa Quintana Carballo, acompañaron aos/ás mariscadores/as o primeiro día da actividade. Durante a primeira semana de extracción, comercializáronse na lonxa de Testal e no centro de primeira venda de O Freixo, máis de 102.000 kg de berberecho, alcanzando un prezo de 20,20 €/kg.

Premendo aquí podes ver algunhas fotos publicadas en La Voz de Galicia.

A Organización de produtores de Marisco e Cultivos Mariños OPP20, entidade certificada polo selo pescadeRías, ¿de onde se non?, está levando a cabo a campaña “Marisco de A Illa, unha tradición saudable”.

A finalidade da campaña é promover o consumo e amosar as bondades dos seus produtos, en colaboración co sector da restauración.

Nesta primeira etapa céntranse en tres dos produtos máis característicos ameixa rubia, ameixa babosa e camarón.

A Xunta de Galicia está levando a cabo a campaña “Bye, bye plástico” co obxectivo de concienciar á sociedade na loita contra os residuos plásticos no mar.  Baixo o lema “Bye, bye plástico. Non é por ti, é por nós” e protagonizada por nenos e nenas, a campaña busca fomentar a participación da poboación e transmitir consellos prácticos arredor da importancia de reducir, reutilizar e reciclar os plásticos.

Nos últimos 10 anos produciuse en todo o mundo máis plástico que en toda a historia da humanidade e nove millóns de toneladas de residuos plásticos, dos que un 80% proceden de terra, acaban cada ano nos océanos do planeta. Preme aquí para ver o vídeo.