Os tamaños mínimos son unha das ferramentas clave para garantir a sustentabilidade da pesca e do marisqueo.
O tamaño mínimo dun peixe ou marisco é a medida que debe acadar para poder ser capturado e comercializado legalmente. A súa función é sinxela pero fundamental: permitir que os exemplares máis novos medren e se reproduzan antes de seren extraídos, para asegurar así o futuro das especies e da actividade pesqueira. Estes tamaños non son arbitrarios. Establécense a partir de estudos científicos que analizan o ciclo vital de cada especie, a idade á que alcanza a madurez sexual e o estado dos recursos.
A normativa europea establece tamaños mínimos de referencia a efectos de conservación e define con precisión como deben medirse os exemplares. En Galicia, a Consellería do Mar adapta e concreta estas referencias mediante ordes específicas, tendo en conta as particularidades das rías e das pesqueiras galegas. Ademais, existen listaxes oficiais e materiais divulgativos que facilitan a identificación das tallas mínimas por especie.
En función do grupo biolóxico, a forma de medir o tamaño tamén cambia. Nos peixes, o tamaño exprésase normalmente en centímetros de lonxitude total, desde a punta da cabeza ata o extremo da cola. Nos crustáceos, como a nécora ou o boi, mídese unha parte concreta do corpo, xeralmente o cefalotórax. No caso dos moluscos bivalvos, como ameixas, berberechos ou vieiras, a referencia é o tamaño da cuncha. A continuación amósanse algúns exemplos das dimensións empregadas para a medición nos tamaños mínimos en distintos grupos biolóxicos:
A nivel europeo, os tamaños mínimos de referencia a efectos de conservación están recollidos en múltiples regulamentos. En Galicia, a Consellería do Mar desenvolveu esta normativa mediante a Orde do 27 de xullo de 2012 pola que se regulan os tamaños mínimos de diversos produtos pesqueiros na Comunidade Autónoma de Galicia, que establece tamén como deben medirse os exemplares.
Respectar os tamaños mínimos é unha responsabilidade compartida. As persoas do mar aplícano no seu traballo diario, pero o seu cumprimento tamén é clave na cadea de comercialización e nos hábitos de consumo.
Para saber máis preme aquí.