O obxectivo da norma é adaptar e actualizar as definicións e criterios relativos á presentación, conservación, comercialización e partes dos produtos da pesca e da acuicultura, para axustalos á realidade actual do sector e aos cambios na normativa europea e estatal en materia pesqueira, de información alimentaria e de seguridade alimentaria.
Recentemente aprobouse o Real Decreto 1082/2025, do 3 de decembro, que regula o procedemento para determinar as denominacións comerciais nacionais e denominacións de alimentos en conserva ou preparados admitidas en España aplicables aos produtos da pesca e da acuicultura.
Esta nova normativa, impulsada polo Ministerio de Agricultura, Pesca e Alimentación e polo Ministerio de Dereitos Sociais, Consumo e Axenda 2030, actualiza o marco vixente para adaptalo aos avances científicos, aos cambios nos hábitos de consumo e á realidade actual do mercado. O seu propósito central é reforzar a protección das persoas consumidoras e garantir unha información clara, veraz e comprensible. Para iso, o real decreto clarifica o ámbito das conservas e preparados e achega maior seguridade xurídica ao procedemento de determinación das denominacións legais.
A implantación deste sistema desenvolverase en dúas fases: a actualización normativa a través deste real decreto e a posterior publicación das denominacións comerciais de conservas e preparados nunha resolución da Secretaría General de Pesca.
A regulación establece tamén a base para publicar periodicamente listaxes de denominacións comerciais autorizadas para produtos frescos, conxelados, salgados, afumados, conservas e preparados en todo o territorio estatal. As denominacións comerciais que poidan emitir as comunidades autónomas terán carácter complementario ás de ámbito nacional.
A norma entrará en vigor o 2 de xaneiro de 2026.
Podes descargar a norma aquí.