Just another WordPress site
A nécora (Necora puber) é un dos crustáceos máis valorados da nosa gastronomía e captúrase de xeito artesanal con nasas ou coa arte do bou de vara. A súa extracción regúlase mediante un plan experimental de xestión no que tamén se establecen os períodos de veda.
Ademais de ser un manxar, consumida simplemente cocida ten importantes valores nutricionais, que podes descubrir premendo aquí para consultar unha ficha sobre esta especie.
Este Nadal consume e regala produtos da nosa pesca artesanal!
Premendo aquí podes acceder a tendas on line adheridas ao selo pescadeRías, ¿de onde se non?, nas que podes adquirilos e recibilos na túa casa.
INDO e VINDO Espazo Gastronómico, no seu local ubicado en Cambados, ofrece catas, obradoiros e degustacións con produtos de tempada, proximidade e saudables. A súa adhesión ao selo pescadeRías reflicte o seu compromiso coa pesca artesanal e sostible.
En novembro realizáronse auditorías de seguimento no selo pescadeRías, ¿de onde se non? nas empresas distribuidoras Pulponor, S.Coop. Galega (cefalópodos) e Pescados Pulponor, S.L. (cefalópodos), que ademáis solicitou ampliación do grupo biolóxico peixe.
En Conservas Portomar, S.L.U. (Vilagarcía de Arousa) son especialistas na selección das mellores materias primas do mar, que cociñan con ingredientes 100% naturais e envasan de xeito artesanal, baixo os máis esixentes estándares internacionais de calidade.
Baixo as marcas El Pescador de Arosa e Portomar comercializan produtos certificados polo selo pescadeRías.
O restaurante Serpe de Pepe Vieira (Poio – Pontevedra), adherido ao selo pescadeRías, ¿de onde se non?, acadou a súa segunda Estrella Michelín durante a gala celebrada o pasado 22 de novembro.
A Guía Michelín España & Portugal 2023 distingue a Galicia con 16 Estrellas Michelín, 3 Estrellas Verdes e 26 restaurantes na categoría de Bib Gourmand. Parabéns a todos/as os/as galardoados/as.
O pasado 1 de decembro tivo lugar a entrega dos III Premios Economía Azul. Os proxectos galardoados nas 4 diferentes categorías foron o acondicionamento da lonxa de Portonovo para a mellora do uso turístico, a produción de algas por parte da empresa H. Q. Seaweed, a Aula do Mar creada pola Asociación de Saúde Mental da Mariña e o Centro de Transformación do Lixo Mariño, promovido pola Asociación de Mulleres do Sector Pesqueiro Seo de Fisterra e Ría de Muros-Noia.
O 22 de novembro comezou a campaña da vieira en Cambados. As capturas son descargadas na lonxa da Confraría de Pescadores San Antonio de Cambados e a empresa Porto de Cambados, S.L. pon no mercado esta vieira eviscerada con todas as garantías de seguridade alimentaria e calidade. Ambas entidades están certificadas polo selo pescadeRías.
O 21 de novembro comezou a campaña extractiva da ostra (Ostrea edulis) na Confraría de Pescadores San Bartolomé de Noia con 35 embarcacións autorizadas e topes de captura de 350 unidades por tripulante enrolado a bordo e día. A arte de pesca empregada polas embarcacións é o rastro de vieira e volandeira adaptado para a captura de ostra.
A breca (Pagellus erythrinus) e o pancho bicudo (Pagellus acarne) son dúas especies que podemos atopar habitualmente nas lonxas e mercados de Galicia e que podemos confundir por ter bastantes similitudes na súa forma e tonalidade. Premendo aquí podes atopar unha ficha con algunhas pautas para poder diferencialas.
