Novembro20 secundarias galego

Aínda que máis curtas que en anos anteriores debido á pandemia, a Confraría de Pescadores de Noia celebrou o 15 de outubro, as V Xornadas de Exaltación do Berberecho de Noia, coa presenza de catro grandes cociñeiras.

Durante a mañá, Lucía Freitas (Restaurante A Tafona e Lume), Yolanda León (Restaurante Cocinandos), Iria Espinosa (Restaurante Árbore da Veira) e María Varela (A Parada das Bestas), coñeceron de primeira man o marisqueo na Ría de Muros-Noia e a calidade do seu produto, a selección na lonxa e o proceso de depuración dos moluscos bivalvos. Pola tarde, ofreceron un showcooking na sala de exposicións do Coliseo de Noia co Berberecho como protagonista. Preme aquí para ver o vídeo resumo.

O salón de actos do Concello de Noia acolleu o 22 de outubro, a xornada de diferenciación e promoción do Berberecho de Noia, certificado por pescadeRías, ¿de onde se non?, que supuxo o arranque da Campaña Pescados y Mariscos de España, organizada pola Federación Nacional de Confrarías de Pescadores en colaboración co Ministerio de Agricultura, Pesca e Alimentación e Alimentos de España, co obxectivo de promover o  consumo e poñer en valor os produtos pesqueiros de orixe nacional. Ademais do berberecho de Noia, participarán na campaña o percebe de Asturias, a gamba branca de Villajoyosa e o langostino de Sanlúcar de Barrameda.

Preme aquí para ver unha noticia sobre o evento.

A Organización de Produtores de Marisco e Cultivos Mariños da Provincia de Pontevedra, OPP–20, estreou este verán o centro de estabulación de crustáceos nas instalacións da lonxa de A Ila de Arousa. É un sistema en circuito pechado no que a auga de mar captada trátase con ozono. Conta cun sistema de bombeo, esterilización e filtrado, equipo de refrixeración e nove tanques de estabulación, ademáis de 10 mesas de aceiro inoxidable para realizar a selección de produto. Esta instalación permite manter os crustáceos en auga de mar desde que chegan á lonxa ata que son comercializados durante a poxa. Esta actuación enmárcase dentro do Plan de Produción e Comercialización de 2019 da OPP–20 e está cofinanciada polo FEMP.

A Confraría de Pescadores de Mugardos realizou, no mes de outubro, a sementeira de 4.120.000 individuos de ameixa babosa (Venerupis corrugata) na Enseada da Barca e 950.000 individuos na Enseada do Baño. Os traballos realizados polos mariscadores a mariscadoras consistiron na mellora do substrato realizando aporte de áridos, remoción de substrato co vehículo anfibio da Confraría e sementeira. Os proxectos para a conservación desta especie autóctona, así como a restauración do seu hábitat na Enseada do Baño e da Barca, están enmarcadas dentro das axudas a proxectos colectivos financiados polo FEMP.

O día 2 de novembro comezou a campaña da volandeira na Ría de Arousa. Os puntos de control, descarga e venta serán as lonxas de Cambados e Rianxo, ámbalas dúas certificadas polo selo pescadeRías, ¿de onde se non?. Este bivalvo captúrase con artes específicas como son o bou de vara e o rastro da vieira.

Por outra banda, o pasado 19 de outubro, comezou a campaña de libre marisqueo na Ría de Arousa, na cal están autorizadas preto de 1.350 embarcacións pertencentes ás distintas confrarías da Ría, en cuxas lonxas serán comercializados os bivalvos extraídos.

Conforme se recolle na RESOLUCIÓN do 9 de xuño de 2020 pola que se aproba o Plan de xestión da centola e do boi 2020-2021, ambas especies poderán comezar a ser extraídas a partires do vindeiro 9 de novembro entre a desembocadura do Miño e o Cabo de Estaca de Bares. A veda continúa dende este punto ata o Río Eo ata o 29 de novembro.

En canto aos peches, o 31 de outubro, rematou o período autorizado para a pesca da anguía nas Rías de Vigo, Arousa e Ferrol, conforme se establece nos correspondentes Plans de Xestión para esta especie.

A XXV edición das Xornadas Técnicas de Difusión do Sector Pesqueiro de Celeiro celebraranse os días 20 e 21 de novembro. Organizadas pola OPP-77 Celeiro, as xornadas poderán seguirse de xeito presencial na Confraría de Pescadores de Celeiro, con aforo limitado e a través de streaming. Serán dous días nos que intercambiar experiencias e debater as claves do futuro de la pesca.

Para máis información e inscricións preme aquí.

Na Peixería Volandeira, ubicada no Mercado das Travesas (Vigo) e adherida o pasado mes de outubro ao selo pescadeRías, ¿de onde se non? , podemos atopar unha amplia variedade de peixes e mariscos frescos procedentes da pesca artesanal.

Para unha maior comodidade, realiza envíos a domicilio e ofrece á súa clientela a posibilidade de recibir por wasap a listaxe de produtos dispoñibles cada día, así como os seus prezos.

Ubicado no porto deportivo de Ribeira, no Restaurante Náutico, adherido en outubro ao selo pescadeRías, ¿de onde se non?, podemos degustar peixes e mariscos procedentes da lonxa da localidade.

O seu equipo está formado por persoas cunha longa experiencia na restauración. Pódese desfrutar dunha cociña tradicional tanto nas súas instalacións, con vistas á Ría, como nas propias casas, xa que ofrecen servizo de comida a domicilio.

A Comisión Europea puxo en marcha a convocatoria “Da Granxa á Mesa” do Pacto Verde Europeo (topic LC-GD-6-1-2020).

Ten como obxectivo abordar desafíos cara a sistemas alimentarios sostibles. Require propostas e solucións innovadoras como fontes alternativas de proteínas, alimentos sostibles dos océanos e acuicultura, asesoramento en dietas saudables e sostibles, entre outros. A data límite de presentación de propostas é o 26 de xaneiro de 2021. Podes atopar máis información aquí.