Uncategorized

Do 3 ao 5 de setembro celebrarase a 24º Edición do Salón de Alimentación do Atlántico, SALIMAT ABANCA,  en Silleda. O Salón potenciará alimentos diferenciados constituíndo, para a persoa visitante, un gran escaparate de produtos de calidade e innovadores a través dun amplo programa de actividades, presentacións e showcookings. 

Os produtos do mar de Galicia certificados serán os protagonistas nas catas realizadas no espazo degustación do stand da Xunta de Galicia. Ademais, celebrarase no centro de negocios, o encontro entre compradores para favorecer a distribución nacional e internacional.

Un ano máis, a Confraría De Pescadores de Lira organiza unha degustación popular de produtos da reserva mariña de Lira.

A primeira cita tivo lugar o sábado 24 de xullo no porto de Lira e a segunda celebrarase o vindeiro sábado 14 de agosto. Nela poderedes degustar, entre as 12 e as 20 horas, os mellores produtos procedentes da lonxa desta localidade, certificada polo selo pescadeRías, ¿de onde se non?.

O 24 e 25 de xullo tivo lugar a Festa de Exaltación da Xouba de Rianxo, que este ano realizouse en modalidade on line, a través de dous showcookings dos cociñeiros Federico López Arcay (A Quinta da Agua) e Hugo Rey (Curral do Marqués).

Ambos restaurantes están adheridos ao selo pescadeRías, ¿de onde se non?. Podes ver os vídeos coas elaboracións premendo nas seguintes ligazóns: A Quinta da Auga e Curral do Marqués.

A navalla, Ensis magnus (=arcuatus), é un molusco bivalvo cunha superficie brillante que semella vernizada. As súas valvas arqueadas (en forma de navalla) permiten diferenciala do longueirón. Extráese a man dunha nunha, a pé ou, máis frecuentemente, a mergullo en apnea ou con subministro de aire dende superficie. De carne saborosa e consistente, podemos degustalas simplemente abertas á grella cunhas pingas de limón. Preme aquí para ver unha ficha informativa.

A veda para o choco (Sepia officinalis) comezou o día 5 de xullo na Ría de Pontevedra, o día 19 de xullo na Ría de Vigo e o día 1 de agosto na Ría de Arousa.

Ata finais de outubro queda prohibida a captura, tenza a bordo, transbordo, comercialización ou venda desta especie nas tres rías, por dentro das liñas de referencia do anexo III do Decreto 15/2011 do 28 de xaneiro polo que se regulan as artes, aparellos, útiles, equipamentos e técnicas permitidos para a extracción profesional dos recursos mariños vivos en augas de competencia da Comunidade Autónoma de Galicia.

As agrupacións de marisqueo a pé e a flote da Confraría de Pescadores de Cambados realizan preengorde de ameixa en batea entre os 0,5 e 15 mm (proceso que dura entre dous e tres meses) para despois sementala nos seus bancos marisqueiros.

Cada tres semanas lavan e peneiran as ameixas e volven introducilas en mallas limpas coa densidade axeitada para favorecer o seu crecemento. De media cada ano pasan pola súa batea experimental en torno a 8 millóns de unidades de ameixa xaponesa e 5 millóns de ameixa babosa.

O vicepresidente primeiro e conselleiro de Presidencia, Xustiza e Turismo, Alfonso Rueda e a conselleira do Mar, Rosa Quintana, presentaron o venres 6 de agosto a nova campaña para a promoción dos produtos do mar, co obxectivo de impulsar o consumo de peixes e mariscos entre a cidadanía. Baixo o lema GALICIA SABE AMAR destácase de xeito fresco e atractivo a calidade e grande variedade de produtos do mar cos que conta Galicia. A campaña pon en valor a diversidade de formatos e posibilidades que ofrecen os peixes e mariscos permitindo a elaboración de pratos da máxima calidade. Preme aquí para ver o vídeo.

Mariscos Inés, S.L. é unha empresa familiar con máis de 25 anos de experiencia no sector da depuración de bivalvos que tamén distribúe peixes e mariscos tanto a maioristas de distintos puntos da península como ao mercado minorista. Está certificada na marca pescadeRías para bivalvos, gasterópodos, cefalópodos, peixes, crustáceos e equinodermos. Así mesmo, ofrece os seus produtos na peixería ubicada nas súas instalacións de Redondela, adherida ao selo este mes.

O pasado mes adheríronse dúas novas peixerías á marca pescadeRías.

No Mercado de Abastos de Muros Peixes e Mariscos Nero ofrece excelentes produtos locais procedentes da pesca artesanal.

A empresa certificada Mariscos Inés, con sede en Redondela, adheriu a peixería que ten nas súas instalacións na que ofrece os seus produtos como establecemento minorista de acceso ao público en xeral.

Publicada a RESOLUCIÓN da xefatura territorial da Consellería do Mar na Coruña, pola que se convoca o proceso selectivo para o acceso ao permiso de explotación, modalidade ourizo a pé, para o exercicio da actividade extractiva na confraría de pescadores de Malpica.

O plan de xestión do ourizo na modalidade a pé en Malpica é de nova incorporación e foi aprobado pola Consellería do Mar o pasado mes de maio. O número de prazas convocadas son 10.

Fogar do Santiso é un proxecto familiar de restauración que ten como obxectivo por en valor a cultura galega e o rural. Co paso do tempo convertiuse nun referente cultural e gastronómico en Galicia. No camiño cara a sustentabilidade e como modelo na restauración e na dignificación do rural, comezan unha viaxe hacia o autoabastecemento pasando a producir as súas propias materias primas en ecolóxico e a axudar a outros produtores. Nos seus establecementos de restauración de Lapamán, Oleiros, Santiago de Cospostela, Allariz e Teo, que acaban de adherir á marca, apostan polos produtos do mar certificados por pescadeRías.

A maiores dos establecementos de Fogar do Santiso, en xullo adheríronse dous novos restaurantes ao selo, ambos no Concello de Cangas.

No restaurante La Curva, próximo á praia de Nerga, ofrecen unha cociña tradicional na cal peixes e mariscos están moi presentes con fermosas vista á Ría de Vigo.

A tapería Chinchorro, en Aldán, conta cunha ampla terraza e ofrece unha cociña sinxela con produtos galegos de tempada, onde peixes e mariscos procedentes da pesca artesanal das lonxas da contorna son protagonistas.

Damos a benvida a unha nova entidade certificada, a Confraría de Pescadores San Telmo de Porto do Son. A entidade pasou auditoría de certificación para os grupos biolóxicos bivalvos, cefalópodos, crustáceos, equinodermos e peixe no mes de xullo. Poderemos atopar o logotipo da marca pescadeRías nas súas etiquetas de primeira venda destes produtos.

Por outra banda, a Confraría de Pescadores de Portonovo, certificada para os grupos peixes, cefalópodos, bivalvos e equinodermos, superou unha auditoría de recertificación, ampliando o seu alcance de certificación a crustáceos.

Publicada a ORDE do 25 de xuño de 2021 pola que se establecen as bases reguladoras e a convocatoria, para o ano 2021, para a concesión de axudas, en réxime de concorrencia competitiva, ás organizacións de produtores pesqueiros do sector dos produtos da pesca e da acuicultura no ámbito exclusivo da Comunidade Autónoma de Galicia, para a preparación e aplicación dos plans de produción e comercialización correspondentes a 2020, cofinanciadas co Fondo Europeo Marítimo e de Pesca (FEMP). En prazo ata o 13 de agosto de 2021.

O sábalo (Alosa alosa) e a saboga (Alosa fallax) son especies pertencentes á familia dos Clupeidos, a mesma na que se inclúen a sardiña ou o arenque. En decembro de 2020 iniciouse o proxecto 1MARDEALOSAS co obxectivo de mellorar o estado do coñecemento sobre a distribución, bioloxía e ecoloxía das dúas especies de alosas europeas no medio costeiro do noroeste ibérico a partir das capturas accesorias ou incidentais que se producen na pesqueira e co fin de propoñer medidas de protección, conservación e xestión para estas especies ameazadas. Preme aquí para acceder a un artigo sobre este proxecto.

En Galicia temos unha ampla variedade de especies pesqueiras que nos ofrecen grandes posibilibidades culinarias. Os peixes de pequeno tamaño como a piarda podemos comelos enteiros, normalmente fritidos.

Rita Portas Garrido, de Estribela (Pontevedra), proponnos este mes preparalas en tortilla. Unha receita tradicional mariñeira herdada da súa nai e da súa avoa, Rita «A Peixiña», que compraba peixe na lonxa de Marín para secalo e vendelo polas casas.

Preme aquí para acceder a ela.

Durante o mes de xuño comezaremos unha campaña promocional da marca pescadeRías, ¿de onde se non? en prazas de abastos e peixerías adheridas ao selo, que transcorrerá ao longo dos próximos meses en distintas localidades. Presume dos produtos do mar e cóntanos o que sabes dos peixes e mariscos que mercas.

Preparade os vosos móbiles ou cámaras de fotos e estade atentos á nosa páxina web e redes sociais de Facebook e Instagram. Nos vindeiros días publicaremos as bases da campaña. Haberá premios para todos/as, só con participar!!

Un ano máis, estaremos coa Consellería do Mar no Salón da Alimentación do Atlántico SALIMAT-ABANCA que se celebra do 6 ao 9 de xuño en Silleda. Os produtos do mar de Galicia serán os protagonistas das catas realizadas no espazo degustación do stand da Xunta de Galicia, que correrán a cargo de Criselda Iglesias (Tapería Lecer), Ana Portals (Solleiros Espazo Gastronómico), José Manuel Mallón (Remollo, Espazo Gastronómico), Miguel González (Hotel Rústico San Jaime), Alejandro Iglesias (Restaurante Cabanas) e Gerson Iglesias (Adega das Calfas). Descarga aquí o programa e a invitación.

Os días 18 e 19 de xuño, Baiona acollerá un novo punto de encontro do sector do mar coa celebración do 20º Congreso AECOC de Produtos do Mar. Do 14 ao 16 de xuño terá lugar a III Feira Naútica de Camariñas, FENAUCAM, organizada polo Clube Naútico de Camariñas. Ademais,  a marca pescadeRías, ¿de onde se non? estará presente na degustación de produtos do mar que se levará a cabo o 20 de xuño na Real Academia de Belas Artes de San Fernando en Madrid, no marco da presentación que realizará a Asociación Música en Compostela, coa colaboración da Consellería do Mar.

A marca pescadeRías, ¿de onde se non? estará presente na V edición do Galician Cinema & Food Festival que se celebrará no Instituto Cervantes de Nova York e no Cosentino City Manhattan, do 24 ao 27 de xuño.

Ás actividades do programa, que xunta cinema e gastronomía de Galicia, asistirán profesionais da prensa especializada e da industria da distribución. O público asistente poderá degustar conservas certificadas de Conservas de Portomar, Ramón Peña, Los Peperetes e Porto-Muiños.

A Confraría de Pescadores San Juan de Redondela organiza a 4ª Edición da Festa Gastronómica do Longueirón Vello os vindeiros 8 e 9 de xuño no peirao de Cesantes. Entre outras actividades, as persoas visitantes poderán degustar diferentes preparacións con longueirón vello, visualizar un documental sobre a súa extracción, así como asistir a unha demostración de cociña en directo con Santiago Figueroa do Gastrobar78 de Redondela, o sábado ás 18:00 horas.

O Concello de Boiro celebrou o 16 de maio unha cata comentada con moluscos bivalvos da Cooperativa Ría de Arosa, certificados polo selo pescadeRías, ¿de onde se non?. As persoas asistentes puideron coñecer as especies de moluscos bivalvos, o proceso de extracción e comercialización, así como aprender a realizar diferentes propostas culinarias da man do cociñeiro José Manuel Mallón de Remollo Espazo Gastronómico. Preme aquí para ver un vídeo.

O 23 de maio Marta Villaverde, Subdirectora Xeral de Pesca e Mercados da Pesca e Ramón Fernández Conchas, Xefe de Servizo de Mercados da Consellería do Mar impartiron un obradoiro arredor do estado do sector pesqueiro, a marca pescadeRías, ¿de onde se non? e a trazabilidade dos produtos da pesca no Curso de Especialista de Innovación, Competitividade e Emprendemento en torno ao Mar, ICEMAR.

Máis de 150 profesionais, representantes do sector da comunicación, distribución, restauración e comercialización de Uruguay asistiron á 2ª edición de Saborea Galicia, organizada pola Secretaría Xeral da Emigración, en colaboración coas Consellerías do Mar e do Medio Rural e de Artesanía de Galicia, para a promoción de produtos pesqueiros e agroalimentarios. O público asistente puido coñecer os produtos certificados de conservas Los Peperetes e Porto-Muiños nos showcooking dirixidos por Rafa Centeno, chef do restaurante Maruja Limón.

O día 17 de maio ás 16:00 horas comezou a veda do polbo en Galicia que durará ata as 5:00 horas do vindeiro 1 de xullo. Durante este período poderemos seguir desfrutando do polbo galego conxelado ou en conserva.

En 2018, o polbo acadou prezos record o cal supuxo para as loxas galegas unha facturación de arredor dos 18 millóns de euros polas ventas deste cefalópodo. Preme aquí para ver unha noticia relacionada.

O venres 10 de maio, publicouse no BOE a Resolución de 24 de abril de 2019, da Secretaría Xeral de Pesca, pola que se establecen disposicións de ordenación da pesquería da sardiña ibérica (Sardina pilchardus) que se pesca en augas ibéricas da zona CIEM VIIIc e IXa, na cal se establece como data de apertura o 1 de maio e de peche o 1 de novembro. Os buques que usen a arte do xeito seguirán estando autorizados si continúa habendo posibilidades de pesca dispoñibles para este segmento.

Dende a súa certificación en 2018, a Lonxa de Ribeira incrementou a cotización media dos produtos, así como o número de profesionais do comercio minorista, restauración, sector da distribución e sector transformador que acoden diariamente á lonxa para realizar as súas compras. Cabe destacar que os responsables de xestión da lonxa apostan polo etiquetado individual de peixes nos exemplares de maior calidade. Podes atopar máis información neste artigo de La Voz de Galicia.

Durante o mes de maio, contamos cun novo restaurante adherido ao selo pescadeRías, ¿de onde se non? en Ferrol, CasAlexo. Ofrece unha cociña fresca e de mercado, apegada aos produtos de tempada do mar e da terra.

Tamén se adheriron este mes tres novos minoristas: Peixes e Mariscos Rodrigo Villar Romero, ubicada na praza de abastos de Redondela, Peixes Sabela, no mercado de Bueu, e Pescados y Mariscos Galicia, na cidade de A Coruña.

Durante este mes a empresa adicada á evisceración de vieras e zamburiñas Vieiras de Ferrol, S.L., acadou a certificación no selo pescadeRías, ¿de onde se non?, para a depuración, procesado e distribución de bivalvos.

Por outra banda, a Cooperativa Ría de Arosa, certificada para bivalvos, ampliou o seu alcance a crustáceos, gasterópodos e equinodermos, e as lonxas de Cangas e Pontedeume superaron unha auditoría de seguemento da marca.

ORDE do 26 de abril de 2019 pola que se establecen as bases reguladoras xerais e se convocan para o ano 2019, en réxime de concorrencia competitiva, axudas a proxectos colectivos, financiados polo Fondo Europeo Marítimo e de Pesca (FEMP), que contribúan á protección e á recuperación da biodiversidade mariña a través dunha mellor xestión e conservación dos recursos mariños e dos seus ecosistemas, así como ao fomento da sensibilización ambiental, dirixidas a confrarías de pescadores, organizacións de produtores, cooperativas do mar e outras asociacións de profesionais do sector. Preme aquí para acceder ao procedemento, o prazo remata o 14 de xuño.

Durante o mes de maio, impartiuse formación en Hixiene Alimentaria e Manipulación de Alimentos ao persoal da Lonxa de Fisterra.

Así mesmo, o equipo responsable do sistema de xestión da empresa Vieiras de Ferrol, S.L., certificada este mes polo selo pescadeRías, ¿de onde se non?, recibiu formación en sistemas APPCC. Un dos requisitos esixidos pola marca é que os establecementos conten cun sistema APPCC implantado, garantindo así o cumprimento de todos os requisitos hixiénico-sanitarios establecidos pola lexislación vixente.

No restaurante A Maceta, adherido ao selo pescadeRías, ¿de onde se non?, ubicado no casco histórico de Santiago de Compostela, ofrecen unha cociña de mercado na que apostan polos produtos de tempada.  O seu chef, Jorge Gago, amósanos como preparar unha das receitas que forman parte da súa carta: Salmonete de rocha con zume de carne e algas.

O salmonete de rocha é un peixe semigraso, moi apreciado na cociña, que habita en fondos de area e pedra ata 25 m de profundidade,  onde se alimenta de pequenos crustáceos e moluscos, que localiza coas súas barbichas.