xuno23 secundarias galego

Do 6 ao 11 de xuño celebráronse as 1ª Xornadas das Zamburiñas de Ferrol organizadas pola Confraría de Pescadores de Ferrol e FÉRVELLO (establecementos de Hostalaría Ferrol Vello). Numerosos establecementos da cidade, entre eles o restaurante adherido Josefa’s Bar, ofreceron unha receita tradicional recuperada: «zamburiñas á ferrolana». O venres 9 Javier Olleros do Restaurante Culler de Pau capitaneou un showcooking no que a zamburiña foi a protagonista. A zamburiña de Ferrol está certificada pola marca pescadeRías, ¿de onde se non?.

A cita solidaria Estrelas Solidarias no Camiño organizada por Casa Barqueiro, en colaboración coa Xunta de Galicia reuniu o 5 de xuño en Negreira a 25 cociñeiros/as con 60 Estrelas Michelin.

Os produtos certificados por pescadeRías, ¿de onde se non? formaron parte da cea de degustación de produtos galegos ofrecida aos chef invitados  e da cea solidaria na que participaron ao redor de 300 persoas. A cita permitiu recadar fondos para a Asociación Galega do Síndrome X Fráxil. Aquí podes ver algunhas fotos.

Entre o 8 e o 11 de maio a Consellería do Mar ensalzou a calidade dos produtos do mar de Galicia na feira internacional Tutto Food celebrada en Milán (Italia). As empresas certificadas polo selo pescadeRías, ¿de onde se non? Real Conservera Española, S.L. e El Percebeiro, S.L. tamén estiveron presentes neste evento.

Por outra banda, do 10 ao 13 de maio, celebrouse en Burela unha nova edición de EXPOMAR, onde a empresa certificada Conservas Artesanas Curricán, S.L. participou cun stand.

Durante o mes de maio recibiron formación en Hixiene Alimentaria e Manipulación de Produtos Pesqueiros o persoal da Confraría de Pescadores de Cedeira, da Confraría de Pescadores de Moaña e da Confraría de Pescadores de Cabo de Cruz. Na acción formativa realizada en Moaña participou así mesmo a directiva da asociación de mariscadoras e mariscadores a pé desta localidade.

Ter actualizada a formación nesta materia é requisito necesario para a certificación no selo pescadeRías, ¿de onde se non?.

A lonxa de A Illa de Arousa está xestionada pola Organización de Productores de Marisco y Cultivos Marinos de la Provincia de Pontevedra (O.P.P.20). Nas súas instalacións no porto do Xufre póxanse cada día unha gran cantidade de moluscos bivalvos procedentes dos seus numerosos e produtivos bancos marisqueiros, extraídos a pé, dende embarcación ou mediante mergullo. Tamén comercializan certificado polo selo pescadeRías, ¿de onde se non? algas, antozoos e crustáceos, entre os que destaca o camarón.

A zamburiña (Chlamys varia) é un pectínido de recoñecida calidade pola súa fina e delicada carne e o seu intenso sabor a mar.

As súas valvas, de cor violácea, son máis alongadas que as da volandeira e presentan unha soa orella. A súa carne é rosada, violácea ou crema, cunha gónada das mesmas tonalidades. Captúrase desde embarcación con rastro de vieira ou volandeira, maioritariamente na Ría de Ferrol. Se queres saber máis sobre este bivalvo preme aquí para ver unha ficha.

Os restaurantes Marlima I e Marlima II adheríronse en maio ao selo pescadeRías, ¿de onde se non?.

Nos seus locais, ambos na localidade de Sanxenxo, ofrecen á súa clientela unha ampla variedade de peixes e mariscos procedentes da pesca artesanal.

Entre as súas especialidades destaca o arroz con lumbrigante e os peixes do día, que se poden degustar dende as súas terrazas con vistas á Ría. Dispoñen de viveiros propios e tamén preparan comidas por encargo.

Dende o pasado mes de maio a peixería do hipermercado Carrefour de A Coruña está adherida ao selo pescadeRías, ¿de onde se non?.

Tras a adhesión este ano da peixería do hipermercado de Carrefour Ferrol e de Carrefour Market en Sanxenxo, son xa tres os establecementos que esta cadea ten adheridos á marca, nunha clara aposta pola pesca artesanal e os produtos de proximidade.

Busca o distintivo do selo!

En maio, a empresa Majeja Mariscos, S.L. (depuradora, cetárea, distribuidora e transformadora) certificouse no selo pescadeRías para os grupos biolóxicos bivalvos, crustáceos, cefalópodos e peixe. A Confraría de Pescadores de Cabo de Cruz (bivalvos) renovou a súa permanencia na marca superando a auditoría de recertificación. As Confrarías de Pescadores de A Pobra do Caramiñal (bivalvos, crustáceos, cefalópodos e peixe) e de Porto do Son (cefalópodos, bivalvos, peixe, crustáceos e equinodermos) e a Cetaria Salitre (crustáceos, cefalópodos, bivalvos e peixe) tiveron auditorías de seguimento no selo.

Publicada a RESOLUCIÓN da Xefatura Territorial da Consellería do Mar na Coruña, pola que se convoca o proceso selectivo para o acceso ao permiso de explotación, modalidade de marisqueo a pé, para o exercicio da actividade extractiva na confraría de pescadores de Mugardos.

O número de PERMEX ofertados é de 3 e o prazo de solicitudes remata o vindeiro 10 de xuño.