novembro19 secundarias galego

Os días 5 e 6 de novembro, a Rede Española de Mulleres no Sector Pesqueiro celebrou en Xixón o seu 6º Congreso Nacional, organizado polo Ministerio de Agricultura, Pesca e Alimentación, baixo o título «pola Igualdade na Pesca».

O Congreso contou con mesas redondas e obradoiros sobre distintas temáticas de interese para as mulleres do sector. Deuse protagonismo á iniciativa empresarial feminina, a través de recoñecementos a asociacións de mulleres do sector en ámbitos como o desenvolvemento de novos produtos e servizos, o medio ambiente, a diversificación, a inclusión social ou á promoción do liderado e empoderamento feminino.

O 28 de outubro, a Asociación de Amigos da Cociña Galega – Amicogal, celebrou o seu 43 aniversario na Cidade da Cultura, coa I Edición do evento Gastronosa, un encontro entre empresas produtoras e o sector da hostalaría.
A xornada contou coa participación de 30 expositores de produtos galegos de calidade, ademais de catas, degustacións, showcookings e actuacións musicais. Os produtos certificados estiveron presentes da man das empresas Frigoríficos Rosa de los Vientos, Mares de Galicia e O Percebeiro. Participaron cociñeiros de restaurantes adheridos como Mesón de Alberto, Hostal La Viuda, Restaurante Cabanas e O Camiño do Inglés. Preme aquí para ver un vídeo.

Do 17 ao 20 de outubro, celebráronse as IV Xornadas de Exaltación do Berberecho de Noia, organizadas pola Confraría de Pescadores San Bartolomé de Noia.
Os cociñeiros Iván Domínguez (Restaurante NaDo), Daniel López (Restaurante O Camiño do Inglés), Fernando Agrasar (Restaurantes As Garzas e Salitre), Cristian Santiago (Restaurante Marea) e Óscar Vidal (Asador O Pazo), coñeceron de primeira man o marisqueo na Ría de Muros-Noia e a calidade do produto, a selección do berberecho na lonxa e o proceso de depuración. Xa pola tarde, ofreceron unha masterclass co Berberecho de Noia como ingrediente principal. Preme aquí para ver un vídeo das actividades realizadas.

En outubro comezou a extracción de peneira na provincia de Pontevedra, conforme estaba establecido nos plans de xestión para este recurso. A partires de novembro, comezarán a aparecer capturas deste gasterópodo en distintas lonxas coruñesas. A peneira (Haliotis tuberculata) é considerada un manxar cada vez máis presente na nosa gastronomía. Preme aquí para ver unha ficha desta especie.

Por outra banda, o pasado 14 de outubro, comezou a campaña de libre marisqueo na Ría de Arousa, así como nas zonas de concesión do ámbito territorial da Confraría de Ribeira.

Conforme se recolle na RESOLUCIÓN do 13 de xuño de 2019 pola que se aproba o plan de xestión da centola e do boi 2019-2020, estas dúas especies poderán comezar a ser extraídas a partires do vindeiro 10 de novembro entre a desembocadura do Miño e o Cabo de Estaca de Bares. A veda continúa dende este punto ata o Río Eo ata o 1 de decembro.

En canto aos peches, o 31 de outubro, rematou o período autorizado para a pesca da anguía, conforme se establece nos Plans de Xestión para esta especie.

O día 4 de novembro comezou a campaña da volandeira na Ría de Arousa, cun tope de capturas por tripulante de 50 quilos e un máximo de 3 tripulantes por embarcación. Os puntos de control, descarga e venta serán as lonxas de Cambados e Ribeira, ámbalas dúas certificadas polo selo pescadeRías, ¿de onde se non?.

Este bivalvo captúrase normalmente de novembro a marzo con artes específicas como son o bou de vara e o rastro da vieira. Tamén podemos atopala no mercado eviscerada, tanto en fresco como conxelada.

O pasado 25 de outubro, tivo lugar a cerimonia de entrega dos II Premios Economía Azul,  creados para recoñecer os proxectos destacados subvencionados polas axudas concedidas ao abeiro das Estratexias de Desenvolvemento Local Participativo.

O proxecto Do mar á mesa: Depuración e punto de venda, da depuradora da Confraría de Pescadores de Cedeira, certificada polo selo pescadeRías, ¿de onde se non? recibiu o premio na categoría «Apoio á pesca costeira artesanal». Aquí podes ver un vídeo sobre esta iniciativa.

O pasado 16 de outubro, o Ministerio de Agricultura, Pesca e Alimentación celebrou a X Edición dos Premios de Excelencia á Innovación para Mulleres Rurais 2019.

Currimar Conservas Tradicionales, a Confraría de Pescadores A Pastoriza de Vilanova de Arousa, a Confraría de Pescadores San Antonio de Cambados e a Federación Galega de Redeiras Artesás O Peirao, foron galardoadas na categoría Excelencia á Innovación na Actividade Pesqueira e Acuícola.

Parabéns a todas.

O Proxecto de Vídeo Submarino Rías de Vida, impulsado pola Asociación Cultural Rías de Vida e co financiamento do GALP Ría de Pontevedra, a Consellería do Mar e o Fondo Europeo Marítimo e de Pesca, FEMP, foi presentado o día 26 de outubro, no Centro Cultural Xaime Illa de Raxó, Poio.

A colección consta de 25 documentais do ecosistema mariño da Ría de Pontevedra, que foron realizados por Pedro Alonso Seoane, videógrafo submarino e Luís López Cordeiro, fotógrafo submarino. Os audiovisuais están dispoñibles na canle de Youtube de Rías de Vida.

21 alumnos/as de 2º curso do Ciclo Superior de Dirección de Cociña do CIFP Compostela de Lamas de Abade participaron nunha xornada formativa co fin de coñecer a marca pescadeRías ¿de onde se non?

Posteriormente deseñaron un menú a base de produtos da pesca artesanal certificados que presentaron para degustación no Gastrobar do propio centro educativo.