O restaurante Casa Barqueiro organizou a undécima edición do evento gastronómico solidario «Estrelas no Camiño de Santiago», este ano a beneficio da Asociación Saúde Mental A Creba e da Fundación de Persoas con Discapacidade Intelectual Barcala. O evento, que tivo lugar o 2 de xuño, contou coa participación de prestixiosos chefs que suman máis de 60 Estrelas Michelín, para dar visibilidade á saúde mental e apoio ás persoas con discapacidade intelectual.
A axenda do evento comezou pola mañá cunha experiencia inmersiva na ría de Muros-Noia. Os chefs visitaron ás instalacións do criadeiro de moluscos do Freixo e realizaron unha sementeira de máis de 65.000 exemplares de ameixa na praia de Testal. Estas actividades foron conducidas polos responsables da Confraría de Pescadores San Bartolomé de Noia, entidade certificada pola marca pescadeRías de onde se non? Para rematar, puideron desfrutar dunha degustación de produtos co selo Galicia Calidade.
A actividade central tivo lugar pola tarde na Finca Casa Barqueiro situada no Lugar de Gonte, A Coruña, coa celebración da feira gastronómica e da cea tipo cóctel. Os produtos certificados pola marca pescadeRías de onde se non? foron protagonistas dos menús gastronómicos. Os profesionais da cociña e demais persoas asistentes tiveron a oportunidade de coñecer en directo as bondades dos produtos procedentes da pesca artesanal galega.
