pescadeRías Newsletter

Publicada a ORDE do 18 de decembro de 2020 pola que se establecen as bases e se regula o procedemento para a concesión, en réxime de concorrencia competitiva, de axudas para a innovación no sector pesqueiro cofinanciadas co Fondo Europeo Marítimo e de Pesca (FEMP), e se convoca para o ano 2021, tramitado como expediente anticipado de gasto. Poderán ser beneficiarios/as propietarios/as de buques pesqueiros ou organizacións ou asociacións, incluídas as confrarías.

Procedementos PE205G e PE205H. En prazo ata o 11 de febreiro.

Publicada a ORDE do 29 de decembro de 2020 pola que se establecen as bases e se regula o procedemento para a concesión, en réxime de concorrencia competitiva, de axudas para investimentos que fomenten a pesca sustentable para propietarios de buques pesqueiros cofinanciadas co Fondo Europeo Marítimo e de Pesca (FEMP) e se convoca para o ano 2021 o devandito procedemento, tramitado como expediente anticipado de gasto.

Procedementos PE120A, PE120B, PE120C, PE120E e PE120F. En prazo ata o 25 de febreiro.

No mes de xaneiro, o persoal da Confraría de Pescadores de A Pobra do Caramiñal, que se atopa en proceso de certificación no selo pescadeRías, ¿de onde se non?, formouse de xeito telemático en Hixiene e Manipulación de alimentos.

Esta mesma formación foi impartida ao persoal da empresa distribuidora de conservas de peixe e marisco Fish Factory S.L. (Conservas La Curiosa), tamén en trámites para acadar o selo.

A Confraría de Pescadores de Vigo, certificada polo selo pescadeRías, ¿de onde se non?, protagonizou unha reportaxe de Euronews, na que se daba a coñecer o camiño que seguen os produtos dende o mar ata o prato.

Os reporteiros acompañaron a José Manuel Sotelo Durán, na súa embarcación Saladino Primero, durante unha xornada de captura de polbo. Premendo aquí podes acceder á noticia e ver o vídeo.

En xaneiro, adheríronse tres novos minoristas ao selo pescadeRías, ¿de onde se non?.

Os establecementos Pescadería Botero Gundín, en Arteixo, e Peixería Botero Gundín na praza de abastos de Malpica; e a peixería ambulante Peixes e Mariscos O Currelo, que fai a súa ruta de reparto polos concellos de Muros, Outes, Mazaricos e Negreira. Benvidos!!

O lixo mariño, no que o plástico é o residuo predominante, supón un grave problema medioambiental a nivel global, que conleva perdas económicas na pesca comercial, o tráfico marítimo ou en actividades recreativas e turísticas. Os microplásticos (partículas e fibras de menos de 5 milímetros) tenden a atraer contaminantes persistentes e bioacumulables, así como organismos vivos de pequeno tamaño que os utilizan como sustrato.

Aquí podes descargar a «Guía sobre microplásticos» publicada por ADEPESCA en colaboración coa Comunidad de Madrid.

O proxecto “SEATRACES: ferramentas intelixentes de trazabilidade y etiquetado para unha produción pesqueira sostible” ten como obxectivo desenvolver métodos que permitan controlar e verificar a información presente nas etiquetas dos produtos da pesca e acuicultura e demostrar as vantaxes da trazabilidade para os produtores.

Carmen González Sotelo, investigadora no CSIC e coordinadora de SEATRACES, explícanos neste artigo, algún dos aspectos e actividades que aborda o proxecto. Premendo aquí, accederás á 2ª Conferencia do proxecto impartida por Carmen González Sotelo.

O choco está na súa tempada, e podemos atopalo facilmente estes primeiros meses do ano na nosa peixería de confianza, polo que é un bo momento para o seu consumo.

Lucía Freitas, chef dos restaurantes A Tafona by Lucía Freitas, que conta co recoñecemento dunha Estrela Michelín e dous Soles Repsol, e Lume Santiago, amósanos como elaboralo ao curry.

Unha receita 10 coa que sorprender se vos animades a preparala. Preme aquí para acceder a ela.