A especie do mes: a peneira

A peneira (Haliotis tuberculata) é un molusco gasterópodo coa cuncha en forma de orella, de cor parda escura, cunha espiral pequena e unha última volta notablemente grande. A cuncha é resistente, co interior nacarado e sete orificios dispostos en liña.

Habita sobre substratos rochosos, desde o intermareal inferior ata profundidades superiores aos 40 m, aínda que é máis abundante entre os 3 e os 10 m de profundidade. En Galicia, distribúese pola zona media e externa das rías. Aliméntase principalmente de macroalgas e microalgas.

Podes ampliar a información aquí.

Aperturas e peches

O 1 de outubro comezou a campaña do ourizo (Paracentrotus lividus), santiaguiño (Scyllarus arctus) e peneira (Haliotis tuberculata).

A extracción de ourizo comezou nas confrarías da provincia de Pontevedra que teñen plan de explotación para este recurso, mentres que as confrarías das provincias de A Coruña e Lugo empezarán en novembro e decembro. O santiaguiño poderá capturarse ata o 5 de xaneiro. Comezou tamén a campaña nos bancos de libre marisqueo de Arousa e está previsto que o 14 de outubro arranque na Ría de Muros e Noia.

Por outra banda, o 30 de setembro pechou a campaña da lagosta (Palinurus elephas) e o 31 de outubro está previsto o peche da campaña de pesca con boliche.