Aperturas e peches de campaña

Publicado el por purificacion.alfonso@ardoraformacion.com

Outubro trae novidades aos mercados galegos. Comeza a campaña do ourizo (Paracentrotus lividus), que se estenderá ata marzo ou abril, segundo as zonas e os plans de xestión das entidades. Tamén se abre a veda do santiaguiño (Scyllarus arctus), que poderá capturarse ata o 31 de decembro.

Na ría de Vigo arranca a campaña da vieira (Pecten maximus), coa participación da Confraría de Cangas e a evisceración a cargo de Porto de Cambados e Artesa Rías Baixas.

En Noia, a campaña marisqueira comezará o 13 de outubro, coa participación de case 1.400 profesionais.

Mentres comezan estas campañas, outras rematan: a lagosta (Palinurus elephas) despediuse dos mercados o 30 de setembro.

A especie do mes: ourizo

Publicado el por purificacion.alfonso@ardoraformacion.com

O ourizo de mar (Paracentrotus lividus) é un equinodermo de corpo redondeado, cuberto de espiñas fortes e longas, que pode alcanzar os 7 cm de diámetro. A súa coloración varía do morado ao verde escuro e pardo.

Habita en fondos rochosos, desde a zona intermareal ata os 30 m de profundidade, onde se alimenta sobre todo de algas. É unha especie habitual no litoral galego.

Do ourizo consómense as gónadas, moi apreciadas polo seu intenso sabor a mar e textura cremosa. Pódense degustar crúas ou empregar en revoltos, arroces, pastas, sopas, mollos e cremas. Tamén se comercializan en conserva e utilízanse para elaborar patés e maionesas.

Podes ampliar a información aquí.

Aperturas e peches de campaña

Publicado el por purificacion.alfonso@ardoraformacion.com

O pasado 30 de abril rematou a campaña do ourizo na confrarías con plan de xestión ou integradas en plans conxuntos.

Durante a campaña capturáronse 434 Tm desta especie. A Confraría de Carreira e Aguiño, co 10,48% do volume comercializado, liderou a primeira venda. A continuación, entre o 8-9% do volume de primeira venda sitúanse as lonxas de Lira, Baiona e Malpica.

Pola súa banda, o polbo iniciou o seu período de paro biolóxico, que se estenderá ata o 1 de xullo, para favorecer a explotación responsable da especie.

En paralelo, prevese a apertura da campaña da zamburiña na ría de Ferrol durante a primeira quincena de maio, condicionada aos resultados das análises de toxicidade.

Proxecto PERIZIA

Publicado el por purificacion.alfonso@ardoraformacion.com

No artigo deste mes, Luis Taboada Antelo, investigador do Instituto de Investigacións Mariñas (IIM-CSIC), e Fabián Ben Conde, da Federación Nacional de Confrarías de Pescadores, presentan os avances do proxecto PERIZIA, centrado na conservación e explotación sostible do ourizo en Galicia.

O traballo analiza a situación deste recurso e expón a aplicación de tecnoloxías innovadoras que permiten obter datos obxectivos sobre as poboacións co fin de mellorar a toma de decisións na súa xestión.

O resultado evidencia a utilidade destas ferramentas para xerar información precisa e aplicable, e senta as bases dunha xestión máis eficiente, transparente e baseada en datos.

Podes ler o artigo aquí.

Entidade do mes: Confraría de Pescadores de Carreira e Aguiño

Publicado el por purificacion.alfonso@ardoraformacion.com

A Confraría de Pescadores de Carreira – Aguiño, fundada no ano 1924, é unha das entidades históricas do sector pesqueiro galego e un referente na posta en valor dos produtos do mar.

Certificada pola marca pescadeRías de onde se non? desde 2008, a súa certificación abrangue crustáceos, bivalvos e equinodermos. No ano 2025, o principal recurso comercializado por volume foi o ourizo, con 60 toneladas capturadas, seguido da navalla, o percebe e a ameixa babosa. Por importe de vendas, o percebe destacou como o recurso máis relevante, cunha facturación próxima aos 950.000 euros, que representou o 34% da recadación total.

Cada mes de xullo, a confraría organiza a tradicional Festa do Percebe de Aguiño, unha cita clave para achegar este produto de alta calidade ao público.

Índice gonadal do ourizo na zona V

Publicado el por purificacion.alfonso@ardoraformacion.com

O artigo deste mes, elaborado por un equipo multidisciplinar formado polas asistencias técnicas das confrarías de Lira, Fisterra e Corcubión, un técnico da Xefatura Territorial da Coruña e un investigador do Cima, analiza os factores ambientais que condicionan o ciclo reprodutivo do ourizo.

O estudo destaca o papel da temperatura da auga, da dispoñibilidade de macroalgas, da dinámica do afloramento costeiro e do cambio climático, variables que inflúen directamente no desenvolvemento das gónadas e no momento da posta. Unha información esencial para comprender e xestionar este recurso clave da pesca artesanal.

Podes ler o artigo aquí.

Peches de campaña

Publicado el por purificacion.alfonso@ardoraformacion.com

A campaña de extracción de ourizo de mar (Paracentrotus lividus) en Galicia chegou ao seu fin o pasado 30 de abril. A veda manterase ata o outono, cando poderá retomarse a actividade nos meses de outubro ou novembro, dependendo das zonas e dos plans de xestión das entidades.

Este peche temporal coincide coa etapa de reprodución natural da especie, que adoita producirse nos meses de marzo e abril. 

O produto, considerado un manxar, conta cunha importante demanda tanto no mercado nacional como internacional.

Manuel A. Reiriz en Tripulación pescadeRías

Publicado el por purificacion.alfonso@ardoraformacion.com

Este mes incorpórase á Tripulación pescadeRías Manuel A. Reiriz, armador da embarcación Os Gómez e presidente dos mariscadores e mariscadoras da Confraría de Pescadores de Carreira e Aguiño.

Manuel explícanos en que consiste o seu traballo diario, as especies que captura e a importancia dos plans de xestión como ferramenta para a explotación sostible dos recursos.

Tamén nos amosa a descarga e primeira venda en lonxa do ourizo, un recurso esencial neste porto, no que hai 57 embarcacións e 128 tripulantes autorizados para a súa explotación.

Podes ver o vídeo aquí.

Aperturas de campaña

Publicado el por purificacion.alfonso@ardoraformacion.com

O 3 de marzo comeza a campaña do ourizo (Paracentrotus lividus) das confrarías de Aguiño e Ribeira, con 78 embarcacións e 179 tripulantes habilitados. No ano 2024 comercializáronse 70.771 quilos de ourizo na lonxa de Aguiño e 33.688 na lonxa de Ribeira, certificados pola marca pescadeRías de onde se non? Está previsto que a campaña se estenda durante os meses de febreiro, marzo e abril.

Ese mesmo día retomarase a campaña de marisqueo na Confraría de Noia, con previsión de que se manteña aberta ata Semana Santa.

Aperturas e peches

Publicado el por purificacion.alfonso@ardoraformacion.com

O 1 de outubro comezou a campaña do ourizo (Paracentrotus lividus), santiaguiño (Scyllarus arctus) e peneira (Haliotis tuberculata).

A extracción de ourizo comezou nas confrarías da provincia de Pontevedra que teñen plan de explotación para este recurso, mentres que as confrarías das provincias de A Coruña e Lugo empezarán en novembro e decembro. O santiaguiño poderá capturarse ata o 5 de xaneiro. Comezou tamén a campaña nos bancos de libre marisqueo de Arousa e está previsto que o 14 de outubro arranque na Ría de Muros e Noia.

Por outra banda, o 30 de setembro pechou a campaña da lagosta (Palinurus elephas) e o 31 de outubro está previsto o peche da campaña de pesca con boliche.