O mar en tapas

Publicado el por purificacion.alfonso@ardoraformacion.com

A Confraría de Pescadores da Illa de Arousa-OPP20 organiza os días 13 e 14 de setembro a terceira edición de O Mar en Tapas, unha ruta gastronómica por 11 establecementos hostaleiros da Illa.

O produto estrela será a ameixa rubia, un bivalvo emblemático das rías galegas e distintivo desta confraría, que o pasado ano liderou a súa comercialización tanto en volume como en cotización. Ao longo da fin de semana, as persoas participantes poderán degustar diferentes propostas culinarias elaboradas con este marisco, elixir as súas favoritas e participar no sorteo de dous lotes de marisco da Illa.

Podes ampliar a información aquí.

Xuntanza de blogueiros

Publicado el por purificacion.alfonso@ardoraformacion.com

Os produtos da pesca artesanal galega, certificados pola marca pescadeRías de onde se non? volverán estar presentes na XIII Xuntanza de Blogueiros Gastronómicos de Galicia, que se celebrará en Ribadeo os días 20 e 21 de setembro.

Máis de 25 blogueiros terán oportunidade de coñecer de preto o patrimonio mariñeiro e gastronómico da Mariña Lucense, cun programa que inclúe visitas á Praia das Catedrais, ao porto de Rinlo e ao forte de San Damián, ademais dun tapeo polos locais da vila. O encontro pechará cun xantar no restaurante Javier Montero, que ofrecerá unha mostra da súa cociña tradicional creativa.

Gala da Asociación Española contra o Cancro

Publicado el por purificacion.alfonso@ardoraformacion.com

O sábado 9 de agosto celebrouse no Gran Hotel de La Toja a tradicional gala benéfica organizada pola Asociación Española Contra o Cancro (AECC), un evento solidario que reuniu a numerosas persoas comprometidas coa causa.

A cita contou cunha degustación de navallas e polbo procedentes da pesca artesanal galega e certificados pola marca pescadeRías de onde se non?

O apoio á investigación e á loita contra o cancro foron os protagonistas deste evento anual, que no seu décimo aniversario volveu converterse nun espazo de encontro, compromiso social e solidaridade.

Marta Franco únese á Tripulación pescadeRías

Publicado el por purificacion.alfonso@ardoraformacion.com

Marta Franco, armadora de artes menores e socia da Confraría de Vigo, únese á tripulación de pescadeRías de onde se non? para compartir connosco a súa vida no mar.

Nesta reportaxe danos a coñecer as especies que captura, as artes coas que traballa, e os labores asociados á súa actividade. Ademais, amósanos como se pesca ao boliche, un arte tradicional e respectuosa co mar. Unha testemuña que pon en valor a pesca artesanal galega e a entrega das persoas que a fan posible.

Preme aquí e acompáñanos nesta travesía coa tripulación pescadeRías.

Axudas remuda xeracional na pesca

Publicado el por purificacion.alfonso@ardoraformacion.com

A Consellería do Mar publicou a convocatoria de axudas para fomentar a remuda xeracional no sector pesqueiro, cofinanciadas polo Fondo Europeo Marítimo, de Pesca e de Acuicultura (FEMPA). O obxectivo é facilitar o embarque do alumnado de ciclos formativos náutico-pesqueiros, de xeito que se lles ofrece a oportunidade de realizar prácticas a bordo que melloren as súas capacidades profesionais e impulsen a súa incorporación ao sector.

Así mesmo, a liña de axudas pretende busca apoiar ás persoas armadoras, coa compensación de parte dos gastos derivados da acollida destes estudantes.

Máis información aquí.

Especie do mes: Longueirón vello

Publicado el por purificacion.alfonso@ardoraformacion.com

Este mes a especie protagonista é o longueirón vello (Solen marginatus). Trátase dun molusco bivalvo de cuncha alongada e brillante que destaca pola súa calidade e valor gastronómico. Presente nos fondos areosos e lamacentos das rías, captúrase principalmente a mergullo, e tamén a pé nas baixamares vivas. A técnica de extracción, individuo a individuo, é selectiva e sostible.

Cun baixo contido en graxa e rico en proteínas, vitaminas e minerais, o longueirón é unha excelente opción para unha dieta equilibrada. Na cociña, resulta versátil e saboroso, e admite múltiples elaboracións tradicionais.

Amplía aquí a información.

A entidade do mes: Confraría de Pescadores de Sada

Publicado el por purificacion.alfonso@ardoraformacion.com

A Confraría de Pescadores de Sada forma parte da marca de calidade pescadeRías de onde se non? desde o ano 2008. A súa actividade principal céntrase na comercialización de peixe azul procedente da flota do cerco, coa sardiña como principal recurso.

A certificación abrangue a lonxa, como punto de primeira venda, e a actividade de distribución, e inclúe os grupos biolóxicos de peixes, crustáceos e cefalópodos.

A confraría dispón dun punto de venda directa ao consumidor na lonxa de Sada e tamén dunha tenda online que realiza envíos á Península Ibérica.

Relación talla-peso do ameixón nun banco de libre marisqueo da Ría de Arousa

Publicado el por purificacion.alfonso@ardoraformacion.com

O artigo deste mes está asinado por Carlos Mariño, asistencia técnica da Confraría de Pescadores San Antonio de Cambados, e por Jesús A. Fernández Barreiro, biólogo da Xefatura Comarcal da Consellería do Mar en Carril.

Os autores presentan un estudo centrado na relación talla-peso do ameixón (Callista chione), un recurso que gaña presenza e valor tanto nas lonxas como nas mesas galegas. A análise deste parámetro permite coñecer o estado dos bancos marisqueiros e garantir unha explotación sostible.

Podes ler o artigo completo aquí.

A receita do mes: Polbo á mugardesa

Publicado el por purificacion.alfonso@ardoraformacion.com

A cociñeira Nair González, do restaurante Muelle 43, tráenos a súa versión do tradicional polbo á mugardesa, unha das elaboracións máis emblemáticas da tradición mariñeira galega, nacida no porto de Mugardos e estendida co tempo a moitas mesas da toda Galicia.

Esta receita, sinxela na súa base pero chea de personalidade, é froito da sabedoría popular das xentes do mar, que souberon aproveitar un produto tan noso como o polbo para crear un prato inconfundible. Co seu punto xusto de pemento, cebola e aceite, mantén un carácter recoñecible que transmite memoria colectiva e identidade.

Podes ver a receita completa aquí.

Chega o noso Sorteo con Sabor a Mar!

Publicado el por purificacion.alfonso@ardoraformacion.com

Desde pescadeRías, de onde se non? queremos agradecer aos nosos seguidores e seguidoras o seu apoio á pesca artesanal galega.

E para iso sorteamos dous lotes -un en Facebook e o outro en Instagram- con agasallos exclusivos da marca pescadeRías de onde se non? e da campaña Galicia sabe Amar que che farán levar o espírito do mar alí onde vaias.

O pack inclúe:
Cunca, mandil, paraugas plegable, calcetíns, bolsa de alimentos, táboa de cociña, libro de receitas con conservas, báscula de cociña, paleta de cociña, fiambreira e pano de cociña.

Como participar?

En Facebook
1️⃣ Segue a nosa páxina.
2️⃣ Dálle Gústame á publicación principal.
3️⃣ Comenta cal é o teu agasallo favorito do lote que sorteamos.

En Instagram
1️⃣ Segue a nosa páxina.
2️⃣ Dálle Gústame á publicación principal.
3️⃣ Comenta etiquetando a esa persoa coa que compartirías mar, peixe e alegría!

Podes participar ata o 16 de setembro ás 23:59 horas.
Sorteo válido para territorio español (Excepto Canarias e as cidades autónomas de Ceuta e Melilla).

Consulta as bases do sorteo en Facebook aquí.

Consulta as bases do sorteo en Instagram aquí.