Receita do mes: tapenade de olivas e kombu

Publicado el por purificacion.alfonso@ardoraformacion.com

A nosa receita deste mes é unha proposta sinxela, saborosa e chea de matices mariños: tapenade de olivas e kombu. Elaborada por Mariví Otero, cociñeira do Chiringuito Coco Bao (A Illa de Arousa), combina ingredientes tradicionais coa alga kombu para crear un aperitivo versátil, perfecto para untar en torradas ou como acompañamento de peixes, mariscos e verduras.

Esta elaboración foi presentada no Obradoiro de Cociña con Algas e Mariscos organizado pola OPP20 Illa de Arousa, unha iniciativa que pon en valor as posibilidades gastronómicas dos produtos do mar e fomenta novas formas de incorporalos á nosa cociña.

Podes consultar a receita completa e seguir a elaboración paso a paso aquí.

A receita do mes: cornicha con salsa verde do mar

Publicado el por purificacion.alfonso@ardoraformacion.com

A cornicha (Spisula solida) é a protagonista da receita deste mes, unha proposta que reivindica o potencial gastronómico deste molusco. O seu autor é Ángel Parada, cociñeiro de Ribeira, chef da Bodega Gran Bazán e colaborador de Espazo Remollo, quen presenta un prato inspirado nos sabores do Atlántico.

A elaboración combina a delicadeza da cornicha cunha salsa elaborada a partir de diferentes algas mariñas que potencia a súa intensidade e achega unha gran profundidade de sabor.

Unha proposta que demostra a versatilidade da cornicha na cociña e pon en valor este produto a través dunha interpretación contemporánea, respectuosa coa materia prima e coa identidade da gastronomía atlántica.

Podes ver aquí os ingredientes e a elaboración paso a paso.

Pani puri de mousse de brandada de sargo e alga encurtida

Publicado el por purificacion.alfonso@ardoraformacion.com

Este mes propoñémosvos unha receita creativa que combina tradición mariñeira e inspiración internacional. Trátase de pani puris recheos de mousse de brandada de sargo e acompañados de alga encurtida, unha elaboración presentada pola cociñeira Emma Pinal, do gastrobar O Birrán, nunha das últimas edicións de Xantar.

A receita ten como protagonista o sargo, unha especie de gran valor gastronómico da pesca artesanal galega. O peixe emprégase en dúas preparacións: unha mousse suave e cremosa elaborada con nata e ceboliña tenra, e un lombo curado en sal que achega textura e intensidade de sabor.

O conxunto complétase cunha vinagreta de wakame, enriquecida con cebola roxa, allo, herbas aromáticas e sésamo torrado.

Podes consultar a receita completa aquí.

A receita do mes: Navalla con miso de albariño e maionesa de alga codium

Publicado el por purificacion.alfonso@ardoraformacion.com

O cociñeiro Ángel Parada, colaborador de Espazo Remollo, presentou esta proposta culinaria na aula de catas do Salón Gourmets 2026: navalla con miso de albariño e maionesa de alga codium.

Trátase dunha receita delicada na que as navallas son as protagonistas, acompañadas por unha velouté de albariño e miso, e unha maionesa de codium. Estes ingredientes achegan equilibrio, profundidade e matices, de xeito que realzan o sabor do produto sen enmascaralo. A proposta destaca pola súa coidada execución e polo respecto ao produto, ao combinar técnica culinaria e creatividade cun enfoque contemporáneo.

Un prato que pon en valor o potencial gastronómico deste produto.

Podes ver a receita completa aquí.

A receita do mes: Vieira con manteiga de améndoas e vinagreta de pistacho

Publicado el por purificacion.alfonso@ardoraformacion.com

A vieira galega convértese na protagonista desta proposta gastronómica asinada polo cociñeiro Marcos Arufe, de Espazo Remollo. Unha receita que aposta polo produto e pola súa esencia, combinado con elaboracións sutís que realzan o seu sabor sen enmascaralo. A manteiga de améndoas achega cremosidade e suavidade, mentres que a vinagreta de pistacho incorpora matices frescos e lixeiramente ácidos, e fan que acade un equilibrio perfecto no prato.

Esta creación formou parte do showcooking “Galicia sabe amar, pescadeRías: de proximidade e con selo propio”, celebrado na pasada edición de Gastrónoma Valencia, que puxo en valor a calidade e versatilidade da vieira galega.

Podes ver a receita completa aquí.

Abadexo ao forno con salsa de tomates asados e repolo

Publicado el por purificacion.alfonso@ardoraformacion.com

O cociñeiro Xoanqui Ameixeiras presenta unha nova proposta gastronómica con abadexo, salsa de tomates asados e repolo como protagonistas.

Trátase dunha combinación que une peixe branco e verdura de tempada, cun resultado equilibrado e de elevado valor nutricional.

A receita ofrece dúas alternativas de preparación: sacos de repolo recheos de lombo de abadexo e cubertos coa salsa, ou o peixe ao forno con base de cebola fritida e acompañado dun salteado de repolo e cenoria. Pode elaborarse tamén con outros peixes brancos dispoñibles no mercado, adaptando os tempos de cocción ao tamaño das pezas.

Todos os pasos da receita aquí.

A receita do mes: pastel de escacho

Publicado el por purificacion.alfonso@ardoraformacion.com

Ricardo Fernández, cociñeiro e profesor dos ciclos de formación profesional de cociña no CIFP Carlos Oroza de Pontevedra, propón unha receita de pastel de escacho sinxela, saborosa e moi agradecida na cociña do día a día. Con esta receita, Ricardo quere poñer o foco no coñecemento do produto e no aproveitamento responsable dos recursos mariños.

Trátase dunha elaboración versátil, que admite variacións segundo o peixe dispoñible e permite adaptarse facilmente ao que marca a tempada e a lonxa. O resultado é un prato equilibrado, de textura suave e sabor limpo, no que o produto do mar é o verdadeiro protagonista. Un bo peixe, unha salsa de tomate caseira e unha elaboración coidada fan deste pastel unha opción perfecta tanto para menús familiares como para restauración colectiva.

Podes ver aquí a receita completa.

Tripulación pescadeRías: Alberto Ribas-Alvientooo

Publicado el por purificacion.alfonso@ardoraformacion.com

Comezamos o ano en Tripulación pescadeRías acompañando a Alberto Ribas nunha xornada de compras na Praza de Abastos de Pontevedra, onde a elección do produto e o contacto directo cos praceiros e praceiras son parte esencial da experiencia.

Creador de contidos de gastronomía e turismo e autor do blog Alvientooo, Alberto comparte connosco os seus criterios á hora de mercar, que produtos escolle e en que detalles se fixa para dar forma ás súas receitas. A visita complétase cunha elaboración culinaria no Espazo Oroza, onde prepara unhas albóndegas de choco aprendidas de Ricardo Fernández, cociñeiro e profesor no CIFP Carlos Oroza. A receita xa está dispoñible na sección A receita do mes deste boletín.

Preme aquí para ver o vídeo.

A receita do mes: albóndegas de choco

Publicado el por purificacion.alfonso@ardoraformacion.com

Este mes achegámonos á cociña da man de Alberto Ribas, creador de contidos de gastronomía e turismo e autor do blog Alvientoooo. Alberto convídanos a preparar unha receita con sabor a mar e moita personalidade: unhas albóndegas de choco que aprendeu do cociñeiro e profesor de cociña Ricardo Fernández.

Apaixonado por experimentar e saír do convencional, Alberto aposta polo choco como un dos seus ingredientes estrela, pola súa versatilidade e pola súa fonda ligazón coa nosa cociña mariñeira. Unha proposta sinxela pero chea de matices, perfecta para poñer en valor os produtos da pesca artesanal galega e gozar do mar na mesa.

Pon o mandil e anímate a cociñar estas albóndegas. Podes ver a receita completa aquí.

A receita do mes

Publicado el por purificacion.alfonso@ardoraformacion.com

A receita do mes chega da man de Javier Rodríguez Ponte “Taky”, xefe de cociña do Catering Boketé. Proponnos un lombo de alfóndega á tixola con crema de apiorravo e vinagreta de encurtidos, unha elaboración saborosa e moi sinxela de adaptar á cociña da casa.

O prato foi presentado na cata “pescadeRías de onde se non?: o mellor da nosa pesca artesanal “ durante a última edición de San Sebastián Gastronómika, onde destacou pola textura e polo protagonismo do produto.

Podes consultar aquí o paso a paso desta receita e animarte a preparala na túa propia cociña.