Feiras internacionais en xaneiro

Publicado el por purificacion.alfonso@ardoraformacion.com

Este mes de xaneiro, a Consellería do Mar reforzará a promoción internacional dos produtos do mar galegos en tres feiras de referencia. Do 11 ao 13 de xaneiro participará na Winter FancyFaire* 2026, en San Diego, xunto a catro empresas galegas, entre elas Costas y Miñán S.L.

Do 26 ao 30 de xaneiro os produtos da pesca artesanal galega estarán presentes na Gulfood 2026, en Dubai, con dous espazos diferenciados: Seafood, con seis empresas, e World Food, con 14 entidades, entre as que se atopan Conservas La Brújula S.L., El Percebeiro S.L. e Conservas Portomar SLU.

Ademais, do 26 ao 28 de xaneiro, 15 empresas participarán no stand institucional en Madrid Fusión, incluídas as empresas certificadas Mariscos Daporta S.L., Costas y Miñán S.L., Artesa Rías Baixas S.L., HQ Seaweed S.L., Fish Factory S.L. e El Percebeiro S.L.

Axudas

Publicado el por purificacion.alfonso@ardoraformacion.com

A Consellería do Mar vén de publicar varias convocatorias de axudas para o sector pesqueiro e marisqueiro:

• PE155C: axudas destinadas á preparación e aplicación dos plans de produción e comercialización das organizacións de produtores pesqueiros e das súas asociacións.

• PE209H: axudas a proxectos de rexeneración de bancos marisqueiros con problemas de perda de produtividade, orientadas á mellora da xestión e á conservación sostible dos recursos mariños.

• PE209B: axudas a proxectos colectivos para a restauración da biodiversidade e dos ecosistemas mariños no marco de actividades marisqueiras sostibles.

• PE119A: axudas destinadas á primeira adquisición dun buque de pesca.

Tripulación pescadeRías: Alberto Ribas-Alvientooo

Publicado el por purificacion.alfonso@ardoraformacion.com

Comezamos o ano en Tripulación pescadeRías acompañando a Alberto Ribas nunha xornada de compras na Praza de Abastos de Pontevedra, onde a elección do produto e o contacto directo cos praceiros e praceiras son parte esencial da experiencia.

Creador de contidos de gastronomía e turismo e autor do blog Alvientooo, Alberto comparte connosco os seus criterios á hora de mercar, que produtos escolle e en que detalles se fixa para dar forma ás súas receitas. A visita complétase cunha elaboración culinaria no Espazo Oroza, onde prepara unhas albóndegas de choco aprendidas de Ricardo Fernández, cociñeiro e profesor no CIFP Carlos Oroza. A receita xa está dispoñible na sección A receita do mes deste boletín.

Preme aquí para ver o vídeo.

Formación a entidades certificadas

Publicado el por purificacion.alfonso@ardoraformacion.com

En decembro impartiuse na lonxa de Baiona o curso de Hixiene alimentaria e manipulación de alimentos dirixido ao seu persoal. Esta acción formativa enmárcase no compromiso coa calidade e coa correcta xestión dos produtos do mar certificados baixo o selo pescadeRías de onde se non?

 A actualización continua en materia de trazabilidade, hixiene e seguridade alimentaria resulta un requisito clave para garantir a confianza do consumidor e o cumprimento da normativa vixente. A formación permitiu reforzar coñecementos prácticos sobre boas prácticas, control sanitario e manexo adecuado do produto na primeira venda. O equipo técnico da marca imparte este tipo de cursos ás entidades certificadas como parte do seu labor de acompañamento, mellora continua e posta en valor da pesca artesanal galega.

Nova entidade certificada

Publicado el por purificacion.alfonso@ardoraformacion.com

A Organización de Produtores Pesqueiros OPP-95 Noia superou recentemente o proceso de auditoría inicial e quedou certificada como entidade usuaria da marca de calidade pescadeRías de onde se non? para a xestión da depuradora de bivalvos de Testal, en Noia.

A OPP-95 Noia foi creada pola Confraría de Pescadores de Noia co obxectivo de reforzar a xestión colectiva da actividade pesqueira e a comercialización dos seus produtos, e asume agora a xestión da depuradora, anteriormente a cargo da confraría.

A certificación da OPP-95 garante a continuidade dos criterios de funcionamento, control e seguimento esixidos pola marca na xestión das instalacións e na comercialización dos bivalvos.

Restaurantes adheridos

Publicado el por purificacion.alfonso@ardoraformacion.com

Rematamos o ano cunha campaña de adhesión de restaurantes á marca pescadeRías de onde se non? nas comarcas de Ferrolterra, A Coruña e Santiago de Compostela, o que reforza a visibilidade dos produtos da pesca artesanal galega no ámbito da restauración.

Damos a benvida ao Restaurante Sinxelo e ao Restaurante Modesto de Ferrol; A Rampa do Solpor (Mugardos), Hotel Restaurante A Roldana (Narón), Restaurante Licar e Restaurante Pepecho de Sada, Fogar do Santiso (A Coruña) e á Barra de Mercado O Testo (Santiago de Compostela).

Agradecemos a súa aposta por dar visibilidade a un produto local con garantía de frescura, orixe e trazabilidade, xunto cunha oferta gastronómica comprometida co territorio e co mar.

Peche de campañas

Publicado el por purificacion.alfonso@ardoraformacion.com

O pasado 5 de xaneiro pechouse a campaña da lagosta (Palinurus elephas), a nécora (Necora puber) e o santiaguiño (Scyllarus arctus), tres especies emblemáticas que volverán progresivamente aos mercados ao longo do ano: a lagosta o 1 de abril, a nécora o 1 de xullo e o santiaguiño o 1 de outubro.

Durante a campaña da nécora comercializáronse 81 toneladas, cun valor próximo aos dous millóns de euros. As lonxas de Vigo, A Coruña, Ribeira, O Grove e Cangas concentraron o 65% do volume de primeira venda.

No caso do santiaguiño, nos seus tres meses de campaña capturáronse 850 quilos, cunha facturación de 105.000 euros. O prezo medio en lonxa foi de 123 euros por quilo, acadando máximos de 280 euros.

Especie do mes: a cornicha

Publicado el por purificacion.alfonso@ardoraformacion.com

Recoñecible pola súa cuncha branca de forma oval tirando a triangular, a cornicha (Spisula solida) captúrase principalmente mediante marisqueo a flote co raño, e adoita aparecer asociada á ameixa babosa e á rubia. En determinadas zonas tamén pode recollerse a pé con ganchas.

O seu prezo nos mercados é máis económico que o doutras especies como a rubia, a babosa ou a xapónica, polo que é unha excelente opción para axustar o orzamento da cesta da compra.

Na cociña ofrece múltiples posibilidades: en fresco encaixa perfectamente cunha salsa mariñeira tradicional, en empanada ou guisada con patacas. Tamén resulta moi saborosa acompañando pastas ou fabas.

Podes ampliar aquí a información.

Entidade do mes: Confraría de Pescadores de Carreira e Aguiño

Publicado el por purificacion.alfonso@ardoraformacion.com

A Confraría de Pescadores de Carreira – Aguiño, fundada no ano 1924, é unha das entidades históricas do sector pesqueiro galego e un referente na posta en valor dos produtos do mar.

Certificada pola marca pescadeRías de onde se non? desde 2008, a súa certificación abrangue crustáceos, bivalvos e equinodermos. No ano 2025, o principal recurso comercializado por volume foi o ourizo, con 60 toneladas capturadas, seguido da navalla, o percebe e a ameixa babosa. Por importe de vendas, o percebe destacou como o recurso máis relevante, cunha facturación próxima aos 950.000 euros, que representou o 34% da recadación total.

Cada mes de xullo, a confraría organiza a tradicional Festa do Percebe de Aguiño, unha cita clave para achegar este produto de alta calidade ao público.

O artigo do mes: Ferramentas para o coidado dos bancos de marisqueo

Publicado el por purificacion.alfonso@ardoraformacion.com

Achegámonos á evolución das tarefas asociadas ao marisqueo na Ría de Pontevedra a través da experiencia de Andrés Simón, Asistencia Técnica da Lonxa de Campelo AIE, Miguel Prado, patrón da embarcación Lonxa de Campelo, e Iban Cortegoso, mariñeiro da mesma embarcación.

O artigo analiza como a innovación e a mecanización poden convivir cun modelo extractivo tradicional, socialmente sostible e profundamente vencellado ao territorio. A partir do traballo desenvolvido nas confrarías de Pontevedra, Lourizán e Raxó, os autores expoñen retos ambientais, solucións técnicas e resultados concretos que amosan que é posible avanzar sen renunciar á esencia do marisqueo galego.

Podes ler o artigo completo aquí.