Formación a entidades usuarias

Publicado el por purificacion.alfonso@ardoraformacion.com

Seguimos avanzando no programa de formación en materia de seguridade, trazabilidade e hixiene alimentaria para entidades certificadas pola marca pescadeRías de onde se non? O obxectivo principal desta formación é garantir a máxima calidade, trazabilidade e seguridade alimentaria dos produtos que chegan aos consumidores/as.

En novembro organizamos unha sesión destinada ao persoal encargado da comercialización dos produtos do mar na Lonxa de Campelo. Contamos tamén coa participación das directivas das agrupacións de marisqueo das tres confrarías que xestionan a lonxa: Pontevedra, Raxó e Lourizán. Este enfoque colaborativo reforza a importancia de traballar conxuntamente para promover a excelencia no sector.

Se necesitas información, consúltanos!

Charla-coloquio sobre consumo responsable

Publicado el por purificacion.alfonso@ardoraformacion.com

O pasado 19 de novembro presentamos a marca pescadeRías de onde se non? á Asociación Provincial de Amas de Casa, Consumidores e Usuarios no Sporting Club Casino da Coruña.

Contamos cun público interesado e participativo, co que falamos das características dos produtos da pesca artesanal galega, frescura, etiquetado de produtos do mar, trazabilidade e boas prácticas de consumo.

Ademais da presentación cun formato charla-coloquio, impartimos un obradoiro de identificación de moluscos, no que as participantes puxeron a proba os seus coñecementos e fixeron gala da súa experiencia como consumidoras de produtos do mar de proximidade.

Entidades certificadas

Publicado el por purificacion.alfonso@ardoraformacion.com

Durante o mes de novembro renovaron a súa certificación pescadeRías de onde se non? as seguintes entidades:

Confraría de Corcubión: primeira venda de bivalvos, cefalópodos, equinodermos, crustáceos, peixes, algas e antozoos.

Mar da Morosa S. L.: depuradora e distribuidor de bivalvos, cefalópodos, crustáceos e peixes.

Porto de Cambados S.L.: Distribuidor de bivalvos, cefalópodos, crustáceos, equinodermos e peixes.

Ademais, tiveron lugar as auditorías de seguimento das entidades certificadas Mariscos Malliño S.L. (depuradora de bivalvos) e Lonxa de Campelo A.I.E. (primeira venda de bivalvos, cefalópodos, crustáceos e peixes).

Campaña da vieira en Arousa

Publicado el por purificacion.alfonso@ardoraformacion.com

O día 2 comezou a campaña de extracción de vieira (Pecten maximus) na Ría de Arousa, na que participan as confrarías de Cambados e Rianxo. Cun tope de 35 quilos por tripulante e un máximo de 100 quilos por embarcación, o primeiro día de campaña saíron a faenar 18 barcos do plan de xestión da confraría de Cambados, e nove embarcacións do plan de xestión da confraría de Rianxo.

As vieiras capturadas pola flota cambadesa pasarán por un proceso de depuración e evisceración nas instalacións de Porto de Cambados S.L., mentres que as capturas da flota de Rianxo serán depuradas e procesadas por Artesa Rías Baixas S.L. Ambas entidades están certificadas pola marca pescadeRías de onde se non?, que garante a orixe e trazabilidade deste produto.

Novos establecementos adheridos

Publicado el por purificacion.alfonso@ardoraformacion.com

Noaru Gourmet é un establecemento especializado en alimentación e degustación de produtos de alta gama, situado en Ares. Apostan polos produtos de proximidade e de elaboración artesanal, incluíndo unha selección destacada de conservas de peixes e mariscos procedentes da pesca artesanal galega, certificados co selo pescadeRías de onde se non?. Durante as fins de semana ofrecen tamén berberecho e camarón fresco, procedentes de lonxas locais como a de Barallobre.

A peixería SUPECO, na rúa Manuel Murguía da Coruña, está xestionada pola distribuidora Orixe da Ría S.L., tamén certificada pola marca pescadeRías de onde se non?. SUPECO ofrece peixes e mariscos frescos do día, de martes a sábado, en horario de 9:00 a 15:00 horas, garantindo calidade e frescura directa das rías galegas.

Entidade do mes: Artesa Rías Baixas

Publicado el por purificacion.alfonso@ardoraformacion.com

Artesa Rías Baixas, S.L., baixo a súa marca Artesa Despensa Atlántica, posicionase como un referente na comercialización de produtos da pesca artesanal galega. Situada no Polígono Industrial de Barro-Meis (Pontevedra), a empresa está especializada en fornecer produtos de alta gama ao sector da restauración e ás tendas gourmet.

Artesa Rías Baixas S.L. está certificada pola marca pescadeRías de onde se non? como centro de expedición, depuradora, distribuidora e empresa transformadora para a comercialización de bivalvos, cefalópodos, crustáceos, equinodermos e peixes. Entre os seus produtos estrela atópanse a vieira, a volandeira, o polbo e o ourizo de mar procedentes das rías galegas, que comercializan en fresco, con orixe e trazabilidade garantidas.

A especie do mes: O boi

Publicado el por purificacion.alfonso@ardoraformacion.com

O boi (Cancer pagurus) procedente da pesca artesanal galega é un dos crustáceos que se incorporou en novembro aos mercados.

Ademais de ser unha excelente opción gastronómica, tamén é un produto saudable de alto contido proteico e moderado contido en graxas, sendo os ácidos graxos poliinsaturados os máis elevados do seu perfil lipídico.

A súa extracción regúlase a través de plans de explotación anuais, nos que se determinan, entre outros aspectos, os períodos de veda, normalmente entre xuño e novembro.

Podes ampliar a información sobre esta especie aquí.

Reapertura de A Túa Lonxa

Publicado el por purificacion.alfonso@ardoraformacion.com

A peixería A Túa Lonxa, da Confraría de Ferrol, volveu abrir despois dunha reforma integral que inclúe unha nova imaxe de marca e fachada acristalada. Ofrece, de martes a sábado, peixe e marisco fresco capturado de forma artesanal e certificado por pescadeRías de onde se non?

Ademais, modernizouse e ampliouse a depuradora para atender á crecente demanda de moluscos bivalvos.

A confraría ten o proxecto de habilitar a medio prazo unha terraza ao aire libre, de aproximadamente 300 metros cadrados, con vistas ao mar, onde os visitantes poderán gozar de peixes e mariscos da lonxa de Ferrol.

Explotación dos recursos marisqueiros das rías ante o cambio climático

Publicado el por purificacion.alfonso@ardoraformacion.com

No artigo deste mes, os investigadores Xosé Antón Álvarez-Salgado, Isabel Fuentes Santos e Silvia Piedracoba Varela analizan a evolución temporal das variables que inflúen na explotación dos recursos mariños das rías galegas: o réxime de ventos predominantes, a temperatura superficial da auga costeira, a salinidade, a variación do nivel medio do mar e a acidificación oceánica.

A través do estudo de modelos de proxección climática, o artigo explora posibles escenarios para responder á pregunta: Que nos depara o futuro?

Podes ler o artigo completo aquí.

A receita do mes

Publicado el por purificacion.alfonso@ardoraformacion.com

A receita deste mes ten un marcado carácter festivo: Javier Rodríguez Ponte «Taky», de Boketé Catering, proponnos un prato ideal para gozar da celebración do Nadal: Crema de tomate ao aceite de oliva con salpicón cremoso de centola.

O prato só ten vantaxes: un ingrediente estrela, unha elaboración sinxela e apta para amateurs, un toque de orixinalidade e sofisticación, é lixeiro e fresco, e ademais pode prepararse con anticipación!

Podes ver a receita aquí.

Que o disfrutes!