Inauguración da Peixería de Barallobre

Publicado el por purificacion.alfonso@ardoraformacion.com

A Confraría de Pescadores Santiago Apóstol de Barallobre inaugurou o pasado mes unha tenda física para reforzar a aposta pola venda directa e a valorización dos produtos do mar de proximidade.

A peixería de Barallobre, situada no edificio da lonxa, está aberta de martes a venres, de 09:30 a 13:30 e os sábados de 09:30 a 12:00. A peixería incorpora ademais un acuario de grandes dimensións que combina función comercial e divulgativa, e dá continuidade a unha traxectoria iniciada en 2008 coa venda directa de marisco.

Esta iniciativa enmárcase nun modelo de cadea curta de comercialización que busca achegar o produto ao consumidor final, reducir intermediarios e mellorar os retornos para o sector. Dámoslles a benvida á marca!

Formación para futuros profesionais de peixerías na Confraría de Ferrol

Publicado el por purificacion.alfonso@ardoraformacion.com

As instalacións da Confraría de Pescadores de Ferrol acollen actualmente un curso de peixería dirixido á formación de novos profesionais para o sector. Esta iniciativa, organizada e promovida polo Concello de Ferrol, conta coa participación de 11 persoas de distintas nacionalidades, e favorece a integración e a capacitación laboral.

O curso ten un enfoque eminentemente práctico e inclúe un período de prácticas en establecementos comerciais, que se desenvolverá nas próximas semanas. Esta acción formativa dá resposta á crecente demanda de persoal cualificado no ámbito da venda de peixe, un perfil clave para garantir o relevo xeracional nas peixeirías tradicionais, tanto nas prazas de abastos como noutros puntos de venda especializados.

Nova adhesión: Peixería Carmiña

Publicado el por purificacion.alfonso@ardoraformacion.com

Damos a benvida á marca pescadeRías de onde se non? a Peixería Carmiña, situada no Mercado Municipal de Carballo. Este establecemento tradicional súmase ao proxecto coa súa aposta firme polos produtos da pesca artesanal galega, ofrecendo peixe e marisco de proximidade, seleccionado directamente nas lonxas e con total garantía de frescura, orixe e trazabilidade.

A incorporación de Peixería Carmiña supón unha nova canle para dar visibilidade aos produtos da frota artesanal e achega unha opción segura e de confianza para mercar produto do mar de alta calidade.

Celebramos a súa adhesión e o seu compromiso coa nosa pesca artesanal.

Nova entidade adherida: Pescadería Áncora

Publicado el por purificacion.alfonso@ardoraformacion.com

A Pescadería Áncora, situada en Bandeira (Silleda), vén de incorporarse á rede de entidades adheridas á marca de calidade pescadeRías de onde se non?, consolidando así a súa aposta polos produtos da pesca artesanal galega.

O establecemento ofrece peixe e marisco fresco procedente maioritariamente da lonxa de Ribeira, o que garante orixe certificada, frescura e trazabilidade. O seu horario de apertura é de martes a sábado, de 09:00 a 14:00 horas, e conta cun servizo a domicilio que facilita o acceso ao mellor produto do mar. Ademais, admite pagamentos con tarxeta e Bizum, que da resposta ás novas necesidades da clientela.

Nova peixería adherida: Oso Polar

Publicado el por purificacion.alfonso@ardoraformacion.com

A Peixería Oso Polar, en Cee, súmase á marca pescadeRías de onde se non?, afianzando o seu compromiso coa pesca artesanal galega. Baixo unha nova dirección, o establecemento continúa a ofrecer produtos do mar frescos, de calidade e proximidade.

A súa oferta inclúe peixes e mariscos procedentes das lonxas de Fisterra e Corcubión, capturados de xeito artesanal e coa garantía da certificación de orixe.

A peixería realiza envíos a toda a península e ás Illas Baleares, achegando o mellor do mar galego aos residentes noutras comunidades.

A entidade do mes: Pescados Rabina

Publicado el por purificacion.alfonso@ardoraformacion.com

Con máis de cen anos de historia, Pescados Rabina é sinónimo de calidade, frescura e tradición na selección, venda e distribución de peixe e marisco galego. Fundada en 1895, mantivo sempre un firme compromiso coa excelencia e o respecto polo produto do mar. 

Situada no mercado da Praza de Lugo, na Coruña, a empresa adquire maioritariamente os seus produtos en Ribeira e Coruña, que comercializa a restaurantes, peixarías e consumidores de toda España. 

Marcos Rabina, cuarta xeración da familia, destaca que a súa filosofía non é só vender peixe, senón custodiar o legado familiar e a riqueza das nosas costas.

Novas peixerías adheridas

Publicado el por purificacion.alfonso@ardoraformacion.com

Este mes damos a benvida a dúas novas peixerías, la Pescadería de mi Barrio e a Peixaría Oia.

La Pescadería de Mi Barrio atópase no mercado de Teis, en Vigo. Comercializa produtos da pesca artesanal que adquire a diferentes provedores certificados. Un dos seus obxectivos é achegar o mercado tradicional á cidadanía. Realiza servizos a domicilio no concello de Vigo e envíos a toda a península.

A Peixaría Oia está situada no concello de Oía. A clientela pode atopar no seu punto de venda produtos de proximidade procedentes das confrarías da contorna, principalmente da lonxa de A Guarda.

Peixes e Mariscos Mónica

Publicado el por purificacion.alfonso@ardoraformacion.com

Peixes e Mariscos Mónica, peixería adherida á marca pescadeRías de onde se non?, continúa a súa expansión. Ademais do seu establecemento na Praza de Abastos de Vilagarcía de Arousa, agora tamén ofrece os seus produtos no Novo Mercado da Estrada.

En ámbolos dous puntos de venda a clientela pode atopar peixes e mariscos frescos procedentes das lonxas de Rianxo e Ribeira, capturados de xeito artesanal, con certificación de orixe, e garantía de máxima calidade e frescura.

Reapertura de A Túa Lonxa

Publicado el por purificacion.alfonso@ardoraformacion.com

A peixería A Túa Lonxa, da Confraría de Ferrol, volveu abrir despois dunha reforma integral que inclúe unha nova imaxe de marca e fachada acristalada. Ofrece, de martes a sábado, peixe e marisco fresco capturado de forma artesanal e certificado por pescadeRías de onde se non?

Ademais, modernizouse e ampliouse a depuradora para atender á crecente demanda de moluscos bivalvos.

A confraría ten o proxecto de habilitar a medio prazo unha terraza ao aire libre, de aproximadamente 300 metros cadrados, con vistas ao mar, onde os visitantes poderán gozar de peixes e mariscos da lonxa de Ferrol.

Certificacións e adhesións

Publicado el por purificacion.alfonso@ardoraformacion.com

No mes de xuño leváronse a cabo as auditorías de seguimento das lonxas xestionadas pola Confraría de Pescadores de Portosín (peixe), a Confraría de Pescadores Pedra da Oliveira de Vilaboa (bivalvos e cefalópodos); e da empresa de distribución e transformación Susión e Hijos S.L. (cefalópodos). Ademais, realizouse a auditoría de recertificación da lonxa e depuradora da Confraría de Pescadores de Ferrol (bivalvos, cefalópodos, crustáceos, equinodermos e peixes).

Damos a benvida á marca a unha nova entidade adherida, a Peixería Mareas Vivas da Picota, Mazaricos, que ten como proveedores a entidades certificadas pola marca.