Formación na Confraría de Portonovo

Publicado el por purificacion.alfonso@ardoraformacion.com

O pasado 27 de abril, o equipo de xestión da marca pescadeRías de onde se non? impartiu unha xornada formativa sobre manipulación e hixiene alimentaria na Confraría de Pescadores San Roque de Portonovo.

Esta acción permitiu actualizar coñecementos en aspectos clave como a hixiene, a seguridade alimentaria, a trazabilidade e as boas prácticas na manipulación dos produtos do mar. A formación está orientada a reforzar a calidade e as garantías no traballo diario coa pesca artesanal galega.

A iniciativa enmárcase no compromiso da marca coa formación continua do sector, co fin de contribuír á profesionalización e á mellora dos estándares en toda a cadea de valor.

Envimar obtén a certificación ISO 22000:2018

Publicado el por purificacion.alfonso@ardoraformacion.com

Grupo Envimar NW S.L., empresa distribuidora situada na lonxa de Ribeira e certificada pola marca pescadeRías de onde se non?, vén de obter a certificación, o que reforza o seu compromiso coa seguridade alimentaria no sector pesqueiro.

Esta norma internacional garante un control rigoroso da inocuidade e da trazabilidade ao longo de toda a cadea, desde a recepción ata a entrega de produto fresco e conxelado. O sistema integra os principios APPCC e aposta pola mellora continua dos procesos.

Con este recoñecemento, Envimar consolídase como unha empresa aliñada cos máis altos estándares internacionais, ofrecendo unha garantía adicional de calidade e confianza para clientes e distribuidores.

Nova pílula formativa sobre anisakis

Publicado el por purificacion.alfonso@ardoraformacion.com

A marca pescadeRías de onde se non? vén de lanzar a primeira dunha serie de pílulas formativas dirixidas ao persoal das entidades usuarias, co obxectivo de reforzar os coñecementos en ámbitos clave como a seguridade alimentaria, a trazabilidade, a manipulación e hixiene, os envases, a xestión de residuos e a lexislación vixente.

Esta nova liña de materiais divulgativos preséntase en formato visual e accesible, facilitando a súa aplicación práctica no traballo diario ao longo de toda a cadea de valor.

A primeira pílula, en formato infografía, está centrada no anisakis. Inclúe información sobre que é, as patoloxías asociadas, a súa presenza nos peixes, o ciclo de vida e as principais medidas de control, tanto a bordo como en terra e nos puntos de venda, así como métodos de inactivación e recomendacións para as persoas consumidoras.

Podes acceder á infografía aquí.

Charla no Programa Integrado de Emprego do Concello de Ribeira

Publicado el por purificacion.alfonso@ardoraformacion.com

O equipo de xestión da marca impartiu unha charla formativa no marco do Programa Integrado de Emprego do Concello de Ribeira. A sesión, celebrada na Aula de Cociña da Praza de Abastos, estivo dirixida ao alumnado do curso de operacións básicas de cociña do SEPE.

A formación tivo un carácter práctico e abordou cuestións como o etiquetado e a trazabilidade dos produtos do mar, a seguridade alimentaria, os tamaños mínimos das especies e a diferenciación de moluscos bivalvos de interese comercial. Tamén incluíu a presentación de ferramentas dixitais de consulta que permiten acceder a información actualizada sobre especies, e a ecoetiqueta pescaenverde.

Formación a entidades certificadas

Publicado el por purificacion.alfonso@ardoraformacion.com

En decembro impartiuse na lonxa de Baiona o curso de Hixiene alimentaria e manipulación de alimentos dirixido ao seu persoal. Esta acción formativa enmárcase no compromiso coa calidade e coa correcta xestión dos produtos do mar certificados baixo o selo pescadeRías de onde se non?

 A actualización continua en materia de trazabilidade, hixiene e seguridade alimentaria resulta un requisito clave para garantir a confianza do consumidor e o cumprimento da normativa vixente. A formación permitiu reforzar coñecementos prácticos sobre boas prácticas, control sanitario e manexo adecuado do produto na primeira venda. O equipo técnico da marca imparte este tipo de cursos ás entidades certificadas como parte do seu labor de acompañamento, mellora continua e posta en valor da pesca artesanal galega.

Actividades formativas

Publicado el por purificacion.alfonso@ardoraformacion.com

En novembro desenvolvéronse diversas accións formativas dirixidas a entidades certificadas pola marca pescadeRías de onde se non?, co obxectivo de reforzar a seguridade alimentaria e a trazabilidade dos produtos certificados.

En Da Lonxa ao Prato S.L. impartíuse formación en hixiene e manipulación de alimentos tanto ao persoal de planta como ao persoal de oficina.

En Mariscos Calimar S.L. realizouse unha sesión de hixiene e manipulación dirixida ao persoal de planta e outra centrada nos sistemas APPCC, destinada ao equipo de administración.

Estas actividades contribúen a garantir procesos seguros e unha xestión rigorosa dos produtos da pesca artesanal.

Certificacións

Publicado el por purificacion.alfonso@ardoraformacion.com

Durante o mes de xullo realizáronse auditorías de seguimento a catro axentes certificados pola marca pescadeRías de onde se non?

– Sociedade Cooperativa Galega Ría de Arosa, con sede en Abanqueiro e certificada desde 2017 para bivalvos, crustáceos, equinodermos e gasterópodos.

– Porto-Muiños S.L., transformadora especializada en algas ecolóxicas, certificada desde 2012.

–Descaexport S.L., distribuidora de polbo con sede en Burela e certificación para cefalópodos desde 2017.

–Lonxa de Baixura do Porto Pesqueiro de Vigo, certificada desde 2009 para peixe, cefalópodos e crustáceos.

Visitamos o Obradoiro de Emprego Vigo Capacita X

Publicado el por purificacion.alfonso@ardoraformacion.com

O pasado 20 de xuño impartiuse unha acción formativa ao alumnado do Obradoiro de Emprego Vigo Capacita X, das especialidades de Operacións Básicas de Restaurante e Cociña. O obxectivo foi achegar a marca pescadeRías de onde se non? aos futuros profesionais da hostalaría, dando a coñecer os seus valores, requisitos e a importancia da trazabilidade nos produtos do mar.

A sesión abordou os criterios da marca e a súa relevancia na pesca artesanal e no consumo responsable. Na parte práctica, realizouse un obradoiro de identificación de moluscos bivalvos que incluíu seguimento da trazabilidade dos produtos da pesca artesanal a través do código QR das etiquetas.

X Reunión da Rede de Laboratorios Oficiais de Biotoxinas Mariñas

Publicado el por purificacion.alfonso@ardoraformacion.com

En marzo tivo lugar a X Reunión da Rede de Laboratorios Oficiais de Biotoxinas Mariñas no Intecmar, designado Laboratorio Nacional de Referencia en 2021. Covadonga Salgado, directora do Intecmar, destaca os avances no control da calidade das augas, cambios lexislativos e a cooperación entre centros de toda España.

O encontro reuniu sete das oito entidades da rede e reforzou o intercambio técnico e científico. Galicia, cunha ampla rede de puntos de mostraxe, lidera a resposta ante episodios tóxicos, emitindo anualmente máis de 600 informes e 400 resolucións para garantir a seguridade dos produtos do mar.

Podes ler o artigo completo aquí.

Formación

Publicado el por purificacion.alfonso@ardoraformacion.com

En abril recibiron formación en Hixiene e Manipulación de Alimentos o patrón maior, a asistencia técnica e o persoal administrativo da Confraría de Pescadores de Miño. Esta acción, orientada á implantación do sistema APPCC (Análise de Perigos e Puntos de Control Crítico), busca formar ao equipo no aseguramento da calidade e seguridade dos produtos.

A formación enmárcase no proceso de preparación para a obtención da certificación pescadeRías de onde se non?, que garante a orixe e frescura dos produtos do mar, reforzando o compromiso da confraría coa sustentabilidade e a trazabilidade.