Sorteo de verán pescadeRías de onde se non?

Publicado el por purificacion.alfonso@ardoraformacion.com

Chegou o verán e queremos celebrar a fidelidade da audiencia da marca nas redes sociais cun sorteo que se levará a cabo en Facebook e Instagram entre o 10 e o 21 de xullo.

Para iso sortearemos catro lotes de produtos de merchandising da campaña Galicia sabe Amar e da marca pescadeRías de onde se non?, composto de bolsa-mochila, mandil, botella, plato, abanico, libro de receitas, libreta, bolígrafo, abrebotellas, chaveiro, bolsa de algodón, identificador de maletas, bloc de notas e pegatinas. Dous dos lotes sortearanse en Facebook e os outros dous en Instagram.

Os resultados do sorteo publicaranse nas páxinas de Instagram e Facebook da marca, e no boletín de novas de agosto.

Bases do sorteo en Facebook aquí.

Bases do sorteo en Instagram aquí.

Busca o sorteo nas nosas redes a partir do 10 de xullo e participa!!

Obradoiros de cociña con algas

Publicado el por purificacion.alfonso@ardoraformacion.com

A Organización de Produtores do Marisco e Cultivos Mariños da Provincia de Pontevedra O.P.P.20 organizou durante o mes de xuño tres obradoiros de cociña con algas e mariscos que resultaron ser todo un éxito. Os obradoiros desenvolvéronse no chiringuito Coco Bao da Illa de Arousa, conducidos por Mariví Otero, cociñeira do propio local.

As persoas participantes tiveron a oportunidade de cociñar coas algas wakame e kombu, carneiro e navallas.

A OPP20 é entidade usuaria da marca pescadeRías de onde se non? e está certificada para bivalvos, algas, crustáceos e antozoos.

Sabores e Paladares Ibéricos

Publicado el por purificacion.alfonso@ardoraformacion.com

Participamos no evento XI Sessão Sabores e Paladares Ibéricos: Sustentabilidade na Fronteira Norte na sala de ámbito cultural de El Corte Inglés de Gaia, en Portugal.

Dentro do programa desta sesión, organizada por Vida Ibérica Lda., presentouse a campaña Galicia sabe Amar, a marca pescadeRías de onde se non? e as prácticas sustentables do sector pesqueiro artesanal galego. A presentación completouse cunha sesión de degustación conducida polas cociñeiras Emma Pinal e Susana Freita, onde se presentaron os produtos do mar galegos certificados, con maridaxe de viños das rexións do Turismo de Porto e Norte.

Podes ver aquí un vídeo do evento.

Summer Fancy Food Show Nova York

Publicado el por purificacion.alfonso@ardoraformacion.com

Do 23 ao 25 de xuño estivemos na 68ª edición da feira do sector gourmet Summer Fancy Food Show en Nova York, un dos eventos internacionais máis importantes da gastronomía especializada, organizado pola Specialty Food Association.

Acudiron máis de 2.300 fabricantes de alimentos e bebidas de élite procedentes de 56 países, entre eles sete empresas galegas do sector mar-industria, apoiadas pola Consellería do Mar e o ICEX.

Os produtos do mar certificados estiveron presentes na feira da man das seguintes empresas usuarias da marca: Conservas La Brújula S.L., Conservas Portomar S.L., HQ Seaweed S.L. e Fish Factory S.L.

Eventos gastronómicos

Publicado el por purificacion.alfonso@ardoraformacion.com

O mes de xullo vén cargado de eventos de exaltación dos produtos da pesca artesanal galega en distintos puntos da nosa xeografía. Apuntade:

Encontro Gastronómico Azul de Portosín, organizado pola Confraría de Pescadores de Portosín. 6 de xullo.

Festa do Polbo de Mugardos. 13 de xullo.

Festa da Vieira de Cambados. 19 ao 21 de xullo.

Degustación Popular Produtos da Reserva Mariña de Lira. 20 de xullo e 3 de agosto.

Festa da Xouba de Rianxo. 25 de xullo.

Festa do Percebe de Aguiño. 28 de xullo.

Formación a entidades usuarias

Publicado el por purificacion.alfonso@ardoraformacion.com

A formación en trazabilidade e seguridade alimentaria do persoal das entidades usuarias da marca é imprescindible para levar a cabo unha correcta xestión dos produtos certificados no día a día. O equipo técnico da marca encárgase de asesorar e impartir formación ás persoas implicadas no proceso de comercialización das entidades certificadas.

No mes de xuño impartiuse asesoramento e formación en hixiene e manipulación de alimentos e Análise de Perigos e Puntos de Control Crítico APPC a membros da plantilla das seguintes entidades certificadas pola marca: Lonxa de Ferrol, Lonxa de Baiona, Lonxa de Mugardos e Mariscos Calimar.

Obradoiros de emprego

Publicado el por purificacion.alfonso@ardoraformacion.com

Neste momento estanse a impartir distintos obradoiros de emprego de hostalaría ao longo da nosa xeografía. As persoas que se están a formar terán distintas responsabilidades no futuro á hora de tomar decisións relacionadas coa compra, deseño de menús, información ao cliente ou tratamento culinario dos produtos do mar.

No mes de xuño acudimos aos Obradoiros de Emprego de Hostalaría Vigo Capacita IX, O Salnés XV e Porriño Cualifica II para dar a coñecer aos futuros profesionais de cociña e restauración os produtos da pesca artesanal galega e a marca pescadeRías de onde se non? Tamén se levaron a cabo actividades de diferenciación de moluscos bivalvos.

Centenario da Confraría de Barallobre

Publicado el por purificacion.alfonso@ardoraformacion.com

A Confraría de Pescadores de Barallobre presentou en rolda de prensa os actos de celebración do centenario da fundación da confraría, que se levarán a cabo o 17 e 18 de agosto. Está programado un acto conmemorativo e unha homenaxe ás persoas socias. Paralelamente á celebración do aniversario, esa mesma fin de semana terá lugar a Festa do Marisco de Barallobre.

Os actos inclúen showcookings e degustacións de produtos certificados, actuacións musicais, actividades infantís e atraccións.

Podes ampliar esta información na nota de prensa e no cartel.

Certificacións e adhesións

Publicado el por purificacion.alfonso@ardoraformacion.com

No mes de xuño leváronse a cabo as auditorías de seguimento das lonxas xestionadas pola Confraría de Pescadores de Portosín (peixe), a Confraría de Pescadores Pedra da Oliveira de Vilaboa (bivalvos e cefalópodos); e da empresa de distribución e transformación Susión e Hijos S.L. (cefalópodos). Ademais, realizouse a auditoría de recertificación da lonxa e depuradora da Confraría de Pescadores de Ferrol (bivalvos, cefalópodos, crustáceos, equinodermos e peixes).

Damos a benvida á marca a unha nova entidade adherida, a Peixería Mareas Vivas da Picota, Mazaricos, que ten como proveedores a entidades certificadas pola marca.

Aperturas e peches

Publicado el por purificacion.alfonso@ardoraformacion.com

Demos a despedida á campaña da centola, que estará en veda ata o 10 de novembro entre a desembocadura do Miño e Estaca de Bares, e ata o 1 de decembro entre Estaca de Bares e o Río Eo.

O 1 de xullo abriu a veda da nécora, lumbrigante e polbo, que xa están de novo nos mercados. Ademais, comezou a campaña do boliche entre Monte Louro e Cabo Silleiro, que ten como especie obxectivo a lura e durará ata o fin de outubro.

Preme aquí para descargar o plan da centola e do boi de mar 2024-2025.

Preme aquí para descargar o plan de xestión do boliche.