Feiras Internacionais

Publicado el por purificacion.alfonso@ardoraformacion.com

No mes de xuño a Consellería do Mar asistirá a dúas feiras internacionais para ampliar a proxección internacional dos produtos do mar galegos.

Á Seoul Food & Hotel 2025 de Corea, do 13 ao 15 de xuño, asistirá en colaboración coa Federación Española de Industrias de Alimentación y Bebidas-FIAB. Participarán catro empresas coexpositoras, incluída a empresa certificada Conservas La Brújula S.L.

Na Summer Fancy Food Show de Nova York, do 29 de xuño ao 1 de xullo, a consellería acudirá da man do ICEX , con 8 empresas, entre as que se atopan as entidades certificadas: Costas y Miñán S.L., Conservas La Brújula S.L., Fish Factory S.L. e Conservas Portomar, SLU.

Congreso AECOC en Baiona

Publicado el por purificacion.alfonso@ardoraformacion.com

A Asociación AECOC celebra en Baiona a 25ª edición do Congreso de Produtos do Mar os días 17 e 18 de xuño. O encontro reúne profesionais da cadea mar-industria para abordar retos actuais como a caída do consumo, os novos hábitos alimentarios, a dispoñibilidade de produto, a regulación crecente ou a sustentabilidade no marco da economía azul.

A marca pescadeRías de onde se non? participará neste espazo para reflexionar, compartir experiencias e explorar vías de colaboración para poñer en valor os produtos do mar galegos. O congreso incluirá mesas de debate e zonas de networking para fomentar o intercambio de ideas entre empresas, administración e distribución.

Pilar Otero únese á Tripulación pescadeRías

Publicado el por purificacion.alfonso@ardoraformacion.com

Este mes incorpórase á Tripulación pescadeRías Pilar Otero, responsable de administración de Frigoríficos Rosa de los Vientos S.L. e presidenta da Asociación Nacional de Mulleres da Pesca (ANMUPESCA).

Frigoríficos Rosa de los Vientos é unha empresa familiar creada no ano 1991 en Bueu para o procesado e ultraconxelado de polbo capturado na Illa de Ons. Pilar cóntanos a súa historia e a súa evolución como empresa dedicada á produción e comercialización de produtos do mar tanto frescos como conxelados. Unha entrega chea de tradición, cultura e innovación!

Podes ver o vídeo aquí.

Festa do Marisco de Barallobre

Publicado el por purificacion.alfonso@ardoraformacion.com

O sábado 7 de xullo celebrouse unha nova edición da Festa do Marisco organizada pola Confraría de Pescadores Santiago Apostol de Barallobre, entidade certificada pola marca pescadeRías de onde se non?, en colaboración co Concello de Narón. Nesta ocasión, levouse a cabo no paseo marítimo de Xuvia, en Narón, de 12:00 a 00:00 horas.

Puideronse degustar produtos certificados da lonxa de Barallobre e asistir a dúas demostracións de cociña gratuítas.

A confraría instalou un stand expositor con produtos do mar e unha pantalla na que se proxectou un audiovisual para coñecer o proceso desde que se captura o marisco ata que chega ao prato.

Certificacións

Publicado el por purificacion.alfonso@ardoraformacion.com

Damos a benvida á empresa Peixoto Alimentación S.L., entidade que se dedica á conxelación de polbo nas súas instalacións no Porto de Marín e acaba de certificarse para a transformación de cefalópodos.

En maio leváronse a cabo as auditorías de seguimento da Confraría de Pescadores de Cangas, como lonxa, centro de expedición e distribuidor de produto fresco e transformado, con alcance de bivalvos, gasterópodos, cefalópodos, crustáceos, equinodermos, peixes, algas e antozoos; Cultivos Marinos Vilanova S.L., depuradora e centro de expedición pertencente ao distribuidor Mares de Galicia S.A. pasou a auditoría de seguimento co alcance de bivalvos, equinodermos, gasterópodos e crustáceos.

Formación

Publicado el por purificacion.alfonso@ardoraformacion.com

Durante o mes de maio impartiuse formación aos responsables dos equipos APPCC da Confraría de Pescadores de Miño e de Cíes Artesanais S. Coop. Galega. O obxectivo foi reforzar as capacidades técnicas dos equipos que aplican os sistemas de xestión APPCC nas entidades produtoras.

A correcta implantación destes sistemas é fundamental para garantir a trazabilidade e seguridade alimentaria dos produtos pesqueiros. Esta acción formativa está aliñada cos valores da marca pescadeRías de onde se non?, que aposta pola profesionalización do sector e pola valorización dos recursos pesqueiros galegos mediante a formación continua e o compromiso coa calidade.

Nova entidade: tenda online Lonxa de Sada

Publicado el por purificacion.alfonso@ardoraformacion.com

A Lonxa de Sada dá un paso máis no seu compromiso coa pesca sostible coa posta en marcha dunha tenda online. Os consumidores poden adquirir peixe azul e marisco fresco, como sardiña, xurelo, centola ou camarón, con total trazabilidade e procedentes da pesca artesanal local.

Coa adhesión da tenda online ao selo pescadeRías de onde se non?, a Lonxa de Sada garante orixe galega, frescura e calidade. Esta nova canle de comercialización achega o produto do mar directamente á mesa dos consumidores, reforzando a visibilidade do traballo das confrarías e facilitando o acceso a produtos frescos e sostibles desde calquera punto de Galicia.

Especie do mes: Congro

Publicado el por purificacion.alfonso@ardoraformacion.com

O congro (Conger conger) é unha especie de peixe anguiliforme presente nas costas galegas, onde habita en fondos rochosos, agochado entre fendas e pedras. A súa captura realízase mediante técnicas artesanais como o palangre e a liña.

Aliméntase de cefalópodos e pequenos crustáceos, o que lle confire unha carne saborosa, especialmente apreciada na cociña tradicional. A parte dianteira emprégase en caldeiradas, guisos e empanadas, mentres que a traseira, máis espiñenta, é ideal como base para caldos.

Comercialízase en fresco e destaca polo seu alto valor nutricional: é baixo en graxas saturadas e rico en proteínas, vitaminas e minerais esenciais. Amplía a información aquí.

A entidade do mes: Mariscos Daporta

Publicado el por purificacion.alfonso@ardoraformacion.com

Mariscos Daporta S.L. é unha empresa familiar con longa traxectoria no sector, fundada en 1955 e constituída como sociedade no ano 1999. Está situada no porto de Tragove, en Cambados, e opera como depuradora de moluscos.

Desde 2015 conta coa certificación pescadeRías de onde senon? para o grupo biolóxico dos bivalvos. A empresa realiza compras nas principais lonxas galegas onde os bivalvos son o produto principal.

O compromiso coa pesca artesanal e a calidade dos seus procesos avalan a renovación da súa certificación a través de auditorías anuais, que recoñecen o seu esforzo pola sustentabilidade e pola proximidade ao consumidor.

X Reunión da Rede de Laboratorios Oficiais de Biotoxinas Mariñas

Publicado el por purificacion.alfonso@ardoraformacion.com

En marzo tivo lugar a X Reunión da Rede de Laboratorios Oficiais de Biotoxinas Mariñas no Intecmar, designado Laboratorio Nacional de Referencia en 2021. Covadonga Salgado, directora do Intecmar, destaca os avances no control da calidade das augas, cambios lexislativos e a cooperación entre centros de toda España.

O encontro reuniu sete das oito entidades da rede e reforzou o intercambio técnico e científico. Galicia, cunha ampla rede de puntos de mostraxe, lidera a resposta ante episodios tóxicos, emitindo anualmente máis de 600 informes e 400 resolucións para garantir a seguridade dos produtos do mar.

Podes ler o artigo completo aquí.