San Sebastián Gastronomika

Publicado el por purificacion.alfonso@ardoraformacion.com

Do 9 ao 11 de outubro celebrarase a XXV edición de San Sebastián Gastronomika. O Kursaal acollerá este encontro gastronómico de referencia mundial da alta cociña.

A Consellería do Mar estará presente co stand institucional da Xunta de Galicia, xunto con 6 empresas coexpositoras, entre as que se atopan as entidades certificadas Costas y Miñán S.L. e O Percebeiro S.L.

Os produtos certificados pola marca pescadeRías, ¿de onde se non? serán protagonistas nas degustacións guiadas que se levarán a cabo durante o evento.

Confrarías centenarias

Publicado el por purificacion.alfonso@ardoraformacion.com

Dúas entidades certificadas conmemoraron os seus cen anos de historia no mes de setembro: a Confraría de Pescadores Nuestra Señora de las Arenas de Fisterra, o día 2, e a Confraría de Pescadores San Andrés de Portosín, o día 16.

Na celebración de ámbolos dous centenarios homenaxeouse aos patróns maiores que dirixiron as entidades ao longo dos 100 anos, poñendo en valor o compromiso e o labor realizado na defensa dos intereses dos profesionais do mar.

Parabéns pola traxectoria!

Podes ver varias imaxes dos eventos aquí.

Empresa do mes

Publicado el por purificacion.alfonso@ardoraformacion.com

Pulponor Sociedade Cooperativa Galega, certificada pola marca pescadeRías, ¿de onde se non? dende o ano 2015, dedícase á distribución de produtos conxelados, sendo o polbo o seu produto estrela.

O polbo da pesca artesanal galega que comercializan conxelado é un produto da mellor calidade, totalmente natural e cun sistema de embalaxe exclusiva con garantía de orixe das lonxas de baixura galegas.

O obxectivo da cooperativa é satisfacer, de forma eficiente, as necesidades de todos os profesionais do sector aos que se dirixen: pulpeiros/as, restauración e grandes superficies. Contan tamén con servizo para particulares a través da súa web www.pulponor.com

Especie do mes: a choupa

Publicado el por purificacion.alfonso@ardoraformacion.com

A choupa (Spondyliosoma cantharus) é un peixe semigraxo co corpo ovalado, alto e compacto. Pódese confundir co sargo. Para diferencialos podemos fixarnos na lixeira chepa que ten a choupa por detrás da cabeza. Ademais, carece da mancha negra que ten o sargo onde nace a aleta pectoral.

Os adultos presentan unha tonalidade gris azul prateada, con estrías douradas e discontInuas nos costados que van desde o opérculo ata a aleta caudal. Os exemplares novos son de cor gris escura. Entre os ollos presenta unha característica banda escura que chega ata o fociño.

Podes atopar máis información sobre esta especie nesta ligazón.

Accións formativas

Publicado el por purificacion.alfonso@ardoraformacion.com

No mes de setembro impartiuse formación en hixiene e manipulación dos produtos da pesca ao persoal da empresa Da Lonxa ao Prato S.L., situada na Lonxa de Ribeira.

Esta empresa conta con depuradora de bivalvos, cetaria de crustáceos e realiza distribución dos produtos da pesca dende a Lonxa de Ribeira.

Todo o persoal da industria alimentaria ten que contar con formación actualizada en manipulación de alimentos, así como coñecer os principios básicos do APPCC, segundo a frecuencia que determine o Plan de Formación de cada empresa.

Novas adhesións

Publicado el por purificacion.alfonso@ardoraformacion.com

En setembro adheríronse á marca a peixería do Centro Carrefour As Cancelas e os restaurantes O Souto e Nómade.

Na peixería do Centro Carrefour As Cancelas de Santiago de Compostela podemos atopar produtos certificados procedentes da pesca artesanal.

O Souto é un bar restaurante situado no casco histórico de Pontevedra. Aposta por unha cociña de produto que adquire en provedores de proximidade certificados.

Nómade é un bar de viños de autor con cociña de proximidade en Santiago de Compostela. Centrados na calidade e na sustentabilidade, viño e cociña fan protagonista ao pequeno produtor e ao produto de tempada.

Certificacións

Publicado el por purificacion.alfonso@ardoraformacion.com

A depuradora de moluscos Mariscos Ramais S.L. renova a súa certificación na marca pescadeRías, ¿de onde se non? para o grupo biolóxico bivalvos.

Así mesmo, a empresa distribuidora Mares de Galicia S.A. tamén renova a súa certificación para bivalvos, estando ademais certificada como transformadora deste grupo biolóxico.

Da Lonxa ao Prato S.L., depuradora de bivalvos ubicada na Lonxa de Ribeira, amplía a súa certificación na marca como distribuidora de peixe, cefalópodos, crustáceos, equinodermos e antozoos.

Apertura de campañas e axudas

Publicado el por purificacion.alfonso@ardoraformacion.com

O 2 de outubro comeza a campaña 2023-2024 do ourizo (Paracentrotus lividus) nas Confrarías de Pescadores da provincia de Pontevedra. Así mesmo, o 1 de outubro iniciarase o período autorizado para a extracción do santiaguiño (Scyllarus arctus) nas costas galegas, que se extenderá ata o 5 de xaneiro do vindeiro ano.

Por outra banda, xa está aberta a convocatoria das axudas autonómicas para proxectos ao abeiro das Estratexias de Desenvolvemento Local Participativas. Máis información aquí.

O artigo do mes

Publicado el por purificacion.alfonso@ardoraformacion.com

Pedro Montero, Garbiñe Ayensa, Silvia Calvo e Silvia Allen-Perkins, do INTECMAR, presentan o artigo Mellorando o coñecemento das condicións hidrográficas nas zonas dedicadas ao cultivo de especies marisqueiras.

O INTECMAR, xunto con MeteoGalicia e o CETMAR, leva máis de dez anos participando no Observatorio Costeiro da Xunta de Galicia que se dedica á observación e predición das condicións meteorolóxicas e oceanográficas da costa de Galicia. Esta información resulta de grande utilidade para os técnicos de marisqueo, xa que dá soporte na xestión sostible e coordinada do medio mariño.

Para ver o artigo completo, preme aquí.

A receita do mes

Publicado el por purificacion.alfonso@ardoraformacion.com

Este mes propoñemos unha receita elaborada por Sergio Roma, do Restaurante O Souto de Pontevedra, que foi presentada no FICBUEU: Nigiri, croqueta de kimchi, cheddar e robaliza lañada. Esta curiosa combinación é fantástica para degustar como aperitivo.

A robaliza (Dicentrarchus labrax) é un peixe semigraxo que está no seu mellor momento de consumo durante o outono e inverno. Ademais de ser fonte de proteínas de alto valor biolóxico e ácidos graxos omega3, destaca o seu contido en fósforo e selenio e en vitaminas do grupo B.

Podes acceder á receita aquí.