A rede de restaurantes adheridos a pescadeRías de onde se non? suma dous novos establecementos: BaceLo, en Ferrol, e Ronsel, en Cabo de Cruz.
Situado no barrio da Magdalena, BaceLo aposta por unha cociña tradicional actualizada, con protagonismo do produto e pequenos toques de vangarda. Poucos meses despois da súa apertura entrou na selección de restaurantes recomendados pola Guía Michelin.
Pola súa banda, Ronsel, situado no Náutico de Cabo de Cruz, ofrece unha cociña estreitamente ligada ao mar e ao territorio. Peixes e mariscos da ría, produto local e de tempada e preparacións á brasa protagonizan unha proposta baseada na proximidade, na orixe e no respecto polo produto.