Estaremos en Auténtica Sevilla

Publicado el por purificacion.alfonso@ardoraformacion.com

Un total de 12 empresas de produtos do mar participarán como coexpositoras no stand da Consellería do Mar en Auténtica Sevilla, que se celebra os días 14 e 15 de setembro.

Entre elas estarán tres entidades certificadas coa marca pescadeRías, de onde se non?: El Percebeiro, S.L., a Confraría de Pescadores Santiago Apóstol de Barallobre e Costas y Miñán, S.L.

A súa participación permitirá amosar aos profesionais da restauración e da gastronomía presentes no encontro unha selección de produtos do mar galegos e dar visibilidade á súa orixe, calidade e sustentabilidade.

Formación para futuros profesionais da hostalaría

Publicado el por purificacion.alfonso@ardoraformacion.com

En setembro e outubro continuaremos a achegar a marca pescadeRías, de onde se non? aos futuros profesionais da hostalaría con dúas novas actividades formativas.

O 29 de setembro, o alumnado do Obradoiro de Hostalaría do Salnés, de Sanxenxo, visitará a praza de abastos de Portonovo e participará nunha charla e nun taller práctico de diferenciación de moluscos.

O 2 de outubro será a quenda do Obradoiro de Hostalaría Marín II, cunha sesión sobre a marca, os seus requisitos, as artes de pesca e os produtos que poden certificarse. A actividade completarase cun taller de diferenciación de moluscos.

Nova edición de #OMarEnTapas

Publicado el por purificacion.alfonso@ardoraformacion.com

Os días 12 e 13 de setembro, A Illa de Arousa acolle a IV edición de #OMarEnTapas, unha proposta da OPP20 para percorrer diferentes establecementos da localidade e gozar dos produtos do mar a través da gastronomía.

Nesta ocasión, a ameixa rubia e as algas serán as protagonistas das tapas elaboradas polos locais participantes, que poderán degustarse ao mediodía durante as dúas xornadas.

A iniciativa inclúe tamén un concurso: o público poderá puntuar as tapas e participar no sorteo de 2 kg de Marisco de A Illa. A proposta máis valorada recibirá o recoñecemento á mellor tapa desta cuarta edición.

Máis info aquí.

Entidades usuarias da marca

Publicado el por purificacion.alfonso@ardoraformacion.com

Durante o pasado mes de agosto realizáronse novas auditorías de seguimento e recertificación de entidades usuarias da marca pescadeRías, de onde se non?

Mariscos Inés S.L., certificada desde 2017 como depuradora, centro de expedición e distribuidora, superou a súa auditoría de seguimento. A certificación abrangue bivalvos, gasterópodos, crustáceos, cefalópodos, peixes e equinodermos.

Pola súa banda, a Confraría de Pescadores de Porto do Son, usuaria do selo desde 2021, pasou a auditoría de recertificación para bivalvos, crustáceos, peixes, cefalópodos e equinodermos. Ademais, ampliou a súa certificación ás algas, incorporando este novo grupo de produtos ao alcance do selo.

Novo membro da Tripulación pescadeRías: Iago Conde

Publicado el por purificacion.alfonso@ardoraformacion.com

Este mes incorporamos á Tripulación pescadeRías a Iago Conde, director comercial e de marketing de Real Conservera Española S.L.

Con el falamos do seu traballo, da importancia das marcas e da evolución das conservas artesanais de peixes e mariscos, que pasaron de ser un produto habitual nas nosas despensas a ocupar un lugar destacado na gastronomía e ser consideradas hoxe un produto premium.

Tamén descubrimos como se elaboran estas conservas, o valor da materia prima procedente da pesca artesanal galega e o latoturismo como unha nova forma de achegarse á tradición e á cultura conserveira galega.

Non deixes de ver a entrevista!

A especie do mes: caramuxo

Publicado el por purificacion.alfonso@ardoraformacion.com

O caramuxo (Littorina littorea) é un pequeno molusco gasterópodo que vive sobre fondos rochosos, desde a zona intermareal ata os 40-50 metros de profundidade. A súa captura realízase a pé durante a baixamar, coa axuda de rasquetas ou coitelos, e está regulada polos plans de explotación de marisqueo.

Moi apreciado como aperitivo, consómese habitualmente cocido e a súa carne extráese da cuncha coa axuda dun alfinete. Ademais, o caramuxo forma parte da nosa cultura gastronómica desde hai séculos: atopáronse cunchas desta especie en xacementos castrexos.

Descubre na nosa ficha máis curiosidades sobre o caramuxo, as súas propiedades nutricionais e como consumilo. Podes vela aquí.

Entidade do mes: Frigoríficos Moldes

Publicado el por purificacion.alfonso@ardoraformacion.com

Este mes destacamos Frigoríficos Moldes S.L., empresa certificada desde 2015 co selo pescadeRías, de onde se non? para a transformación de cefalópodos.

O seu produto estrela é o polbo conxelado, que comercializa baixo a marca Congelados La Marina. O produto envásase respectando a súa calidade e frescura, sen ningún tipo de aditivos.

Desde as súas instalacións en Pontevedra, Frigoríficos Moldes abastece diferentes canles de comercialización, como hostalaría e restauración, tendas, cadeas de supermercados e colectividades.

A certificación permite que os cefalópodos amparados pola marca manteñan a súa identificación e trazabilidade ao longo da cadea de comercialización. Deste xeito,  as persoas consumidoras poden coñecer a procedencia dos produtos do mar no momento de facer as súas compras.

Proxecto VOLARIA

Publicado el por purificacion.alfonso@ardoraformacion.com

Este mes achegámonos ao proxecto VOLARIA da man de Paula Sánchez Marín, científica titular do Centro Oceanográfico de Vigo, pertencente ao Instituto Español de Oceanografía (IEO-CSIC).

A iniciativa investiga as causas dos elevados niveis de chumbo que desde hai anos impiden a comercialización da volandeira (Aequipecten opercularis) na Ría de Vigo. O estudo analiza os factores biolóxicos que condicionan a súa acumulación nos exemplares e a distribución e posible orixe deste metal na ría.

VOLARIA reúne persoal investigador de diferentes institucións e conta coa colaboración do sector. O obxectivo é obter coñecemento científico que permita identificar posibles vías para recuperar a comercialización deste recurso.

Podes ler o artigo aquí.

A receita do mes: xurelo afumado sobre auga de tomate, cogombro e aceite de alfábega

Publicado el por purificacion.alfonso@ardoraformacion.com

O xurelo é o protagonista da receita deste mes, unha proposta fresca e sorprendente que Alejandro Iglesias, de Alex Iglesias Gastro (Lalín), presentou na última edición do Salón Gourmets.

O prato combina xurelo afumado en frío cunha delicada auga de tomate, dados de cogombro, raviños, algas e gromos de fiúncho ou aneto. O toque final pono un aceite de alfábega que achega cor, aroma e frescura ao conxunto.

Unha elaboración que aproveita a intensidade e a textura dun dos nosos peixes azuis máis apreciados e o combina con ingredientes frescos para conseguir un prato lixeiro, equilibrado e moi saboroso.

Consulta a receita completa aquí e anímate a preparala na casa!

Entregados os premios do sorteo de verán de pescadeRías, de onde se non?

Publicado el por purificacion.alfonso@ardoraformacion.com

As gañadoras do sorteo de verán de pescadeRías, de onde se non?, celebrado durante o mes de agosto nas nosas redes sociais, xa teñen os seus premios.

Lola González, gañadora do sorteo realizado en Facebook, e Ángela Barrán, premiada entre as persoas participantes en Instagram, recibiron cadanseu lote de agasallos da marca.

Con esta iniciativa quixemos agradecer a participación e a fidelidade da comunidade que nos acompaña nas redes sociais e, ao mesmo tempo, seguir dando a coñecer pescadeRías, de onde se non? e os valores que representa.

Durante todo o ano, as nosas canles en Facebook e Instagram achegan información sobre as especies que se capturan nas nosas rías, receitas de cociña, entidades certificadas pola marca, actividades de promoción e divulgación, e o traballo das persoas que forman parte da pesca artesanal galega.

Moitas grazas a todas as persoas que participastes no sorteo e parabéns a Lola e Ángela!