pescadeRías Newsletter

Desde 1987, convócase anualmente o Premio «Alimentos de España» en recoñecemento aos profesionais ou entidades que contribúen a impulsar este importante sector. No ano 2021, estes premios alcanzan a súa XXXIV edición. Na categoría Premio Alimentos de España Produción da Pesca e da Acuicultura, valorarase a traxectoria empresarial, así como a relevancia socioeconómica ou o carácter innovador do produto.

Preme aquí para ver as bases da convocatoria.

RESOLUCIÓN do 18 de febreiro de 2022 da Dirección Xeral de Desenvolvemento Pesqueiro pola que se convoca un curso de recolector/a de recursos específicos con técnicas de mergullo no Instituto Galego de Formación en Acuicultura (IGAFA) en A Illa de Arousa.

O prazo de matrícula é do 18 de febreiro ao 09 de marzo de 2022 e o curso terá lugar do 04 de abril ao 07 de xuño de 2022, os luns e martes de 09:00 a 15:00. O numero de prazas é de 12.

Durante o mes de febreiro impartiuse formación en Manipulación de Produtos Pesqueiros a responsables e persoal da lonxa da Confraría de Pescadores de A Guarda, a persoal responsable da manipulación do ourizo na empresa Mariscos Calimar, S.L. e a persoal da depuradora da Confraría de Pescadores de Cedeira. Estes últimos recibiron tamén formación sobre sistemas de Análise de Puntos de Control Crítico así como información sobre o selo pescadeRías, ¿de onde se non?.

A Lonxa de Vilanova de Arousa, certificada polo selo pescadeRías para a primeira venta de bivalvos, algas e crustáceos, está xestionada pola Confraría de Pescadores A Pastoriza. A extracción dos seus recursos marisqueiros é realizada por preto de 250 mariscadoras/es a pé e en torno a 80 embarcacións autorizadas para o marisqueo a flote. A maiores da actividade extractiva, realizan actividades de semicultivo e de vixilancia dos bancos. Conta, así mesmo, con 6 embarcacións autorizadas para a extracción de solénidos e de algas con técnicas de mergullo

En febreiro adheríronse ao selo pescadeRías, ¿de onde se non? a Peixería Manuela, que conta cun posto no Mercado de Abastos de Porto do Son e Cris Peixes e Mariscos, cun posto no Mercado Municipal de Fisterra.

Pola súa banda, adherironse tamén ao selo o Bodegón Pescador, o restaurante O Noso Bar e o restaurante Portofino, os tres na localidade de Portosín, así como o restaurante A Xarda en Porto do Son. Todos eles ofrecen á súa clientela productos de tempada procedentes da pesca artesanal da contorna.

A empresa Susión e Hijos, S.L. (transformación e distribución de cefalópodos) e as lonxas da Confraría de Pescadores de Portosín (peixes) e de Celeiro (peixes, cefalópodos, crustáceos, equinodermos, antozoos) foron auditadas en febreiro para a súa certificación no selo pescadeRías.

Por outra banda, a depuradora Aurelio Silva Abalo, S.L. (bivalvos), a lonxa da Confraría de A Guarda (cefalópodos, crustáceos, equinodermos e peixe), e a da Confraría de Cedeira (peixe, cefalópodos, crustáceos e bivalvos) superaron auditorías de seguemento no selo.

Convocado o proceso selectivo para o outorgamento da modalidade de Navalla/longueirón, mergullo con subministro de aire dende superficie, para o plan conxunto das Confrarías de A Coruña, Ferrol, Barallobre, Miño e Mugardos e para a Confraría de Cedeira. Convocado o proceso selectivo para o acceso ao permiso de explotación na modalidade de marisqueo a pé da Confraría de Raxó. Convocado o proceso selectivo para o recurso específico algas modalidade mergullo e algas modalidade marisqueo a pé, para a Confraría de Corcubión.

As praderías de fanerógamas mariñas proporcionan importantes servizos ecosistémicos: captan carbono e producen osíxeno, atenúan o hidrodinamismo, son hábitat de numerosas especies e serven como bioindicadores.

O proxecto “ZOSTERA. Praderías mariñas, tesouros de biodiversidade” levado a cabo polo CEIDA, gracias ao apoio da Fundación Biodiversidad, foi creado para concienciar sobre a importancia da súa conservación. Premendo aquí podes acceder a un artigo sobre o mesmo.

O inverno, xa a piques de rematar, é o mellor momento do ano para o consumo da centola. Este crustáceo é unha importante fonte de proteínas de alto valor biolóxico e de ácidos graxos poliinsaturados e nel destaca o seu contido en minerais como selenio, fósforo, zinc e iodo así como de niacina e vitaminas B6 e E.

Mariscos Laxe de Rons (O Grove), empresa certificada polo selo pescadeRías, ¿de onde se non?, ofrécenos esta receita para preparala cun toque picante. Preme aquí para acceder a ela.