Co inicio de xullo rematan as vedas biolóxicas do polbo, a nécora e o lumbrigante, polo que estas tres especies regresan ás lonxas galegas e aos puntos de venda tras varios meses sen actividade extractiva.
No caso do polbo, a campaña comezou o 1 de xullo cun novo plan de xestión que mantén medidas destinadas a regular o esforzo pesqueiro e favorecer a recuperación do recurso. O plan divide o litoral galego en tres zonas: a Zona A, desde A Guarda ata a Pedra do Sal (Caión); a Zona B, desde a Pedra do Sal ata a Illa de San Vicente (Estaca de Bares); e a Zona C, desde a Illa de San Vicente ata o río Eo, no litoral cantábrico.
Nas zonas A e B autorízanse 200 nasas por tripulante enrolado e a bordo, cun máximo de entre 300 e 600 nasas por embarcación, segundo o tipo de barco e a zona de pesca. Na Zona C, as embarcacións máis pequenas poden calar ata 175 nasas, mentres que as de maior porte dispoñen de 250 nasas máis 50 por tripulante, cun máximo de 550 nasas por embarcación.
En canto ás cotas de captura, durante os meses de xullo e agosto cada embarcación poderá desembarcar un máximo de 35 quilos diarios, aos que se engaden 35 quilos por cada tripulante enrolado e a bordo, ata un límite de 240 quilos por embarcación e día. Desde o 1 de setembro, a cota increméntase a 55 quilos por embarcación máis 55 quilos por tripulante, cun máximo de 380 quilos diarios.
Pola súa banda, a nécora e o lumbrigante tamén volveron aos mercados tras finalizar a súa veda biolóxica, de xeito que se recupera o abastecemento de dúas especies moi demandadas.
Tamén comezou a campaña da lura coa arte de boliche, autorizada entre os meses de xullo e outubro. A actividade poderá desenvolverse de luns a venres, en horario diúrno, nas augas interiores comprendidas entre Punta Carreiro (Monte Louro) e Cabo Silleiro, tendo como especie obxectivo a lura e as súas especies acompañantes.
Consulta aquí o Plan experimental para a xestión do polbo (Octopus vulgaris) para a campaña 2026/27.
Consulta aquí o Plan de xestión coa arte de boliche entre os meses de xullo e outubro de 2026.